|
Elmə
aparan uğurlu yolun astanasında
Əgər əvvəllər mənə "Müasir tələbə necə olmalıdır"
sualını versəydilər, yəqin ki, cavabında müasir tələbə
üçün zəruri olan keyfiyyətləri sayardım. Amma indi o
sualı versəl ər,
deyərəm, "Müasir tələbə Ayşən Sadıqlı kimi olar".
Bakı Dövlət Universiteti filologiya fakültəsinin II kurs
magistrantı Ayşən Sadıqlı haqqında uzun-uzadı danışmıram.
Sadəcə onun tərcümeyi-halından son 3 ilə aid bəzi
faktları diqqətə çatdırıram. A.Sadıqlı indiyədək 15-dən
çox konfrans, seminar və müsabiqədə iştirak edib və
diplomlarla, sertifikatlarla mükafatlandırılıb.
Universitetdə keçirilən müxtəlif tədbirlərdə və
layihələrdə fəal iştirak edir. O, filologiya
fakültəsinin bu günə qədərki tarixini əks etdirən slayd,
Hüseyn Cavidin 130, Firidun bəy Köçərlinin 150, Mir
Cəlalın 105 illik yubileyləri münasibətilə BDU-da
keçirilən tədbirlərdə videoçarx və slayd hazırlayıb.
Bakalavr pilləsini Nizami Gəncəvi adına təqaüdlə,
fərqlənmə diplomu ilə bitirib.
Ayşən Sadıqlı fakültə Tələbə Elmi Cəmiyyətinin sədri,
fakültə Elmi Şurasının üzvüdür. Bakalavr pilləsinin
birinci kursundan universitet xorunda iştirak edir.
2010-cu və 2011-ci illərdə Bakı Dövlət Universiteti üzrə
"İlin ən yaxşı tələbəsi" adına layiq görülüb.
Bir qrant, 2 kitab, 10 elmi və 4 publisistik məqalənin
müəllifi olan A.Sadıqlı akademik Abel Məhərrəmovun
təşəbbüsü ilə Bakı Dövlət Universitetində müəllim və
tələbələrin yaradıcılıq potensialının dəstəklənməsi
məqsədilə 2009-cu ildən elan olunmuş "50+50" qrant
proqramının qaliblərindəndir. 2010-cu ildə həmin qrant
proqramı çərçivəsində A.Sadıqlının "Heydər Əliyev və
Azərbaycan dili" mövzusunda təqdim etdiyi layihə qalib
olub. Bu layihə çərçivəsində bir neçə elmi məqalə çap
edilib. 2011-ci ildə "Heydər Əliyev və Azərbaycan dili"
adlı kitabı nəşr edilib. Kitab Azərbaycan
Respublikasının müstəqilliyinin bərpasının 20 illiyinə
həsr olunub. Kitabda ulu öndər Heydər Əliyevin həm
keçmiş sovet dövründə, həm də Azərbaycan müstəqilliyi
illərində Azərbaycan dilinə həsr olunmuş məqalə və
çıxışları, fərmanları verilib.
Bu günlərdə Ayşən Sadıqlının ümummilli liderə həsr
olunmuş ikinci kitabı çap olunub. Kitab "Ümummilli lider
Heydər Əliyev və Azərbaycan ədəbiyyatı" adlanır.
Kitabda milli mənəvi sərvətimiz hesab edilən Azərbaycan
ədəbiyyatının inkişafında əvəzsiz xidmətləri olan
Heydər Əliyevin çıxışları, nitqləri və məruzələri
toplanılıb, ulu öndərin Azərbaycan ədəbiyyatı ilə bağlı
imzaladığı fərman və sərəncamlar öz əksini tapıb.
Ayşən Sadıqlı hazırda "M.S.Ordubadinin yaradıcılığında
Nizami mövzusu" adlı magistr dissertasiyasının üzərində
çalışır.
Eyni zamanda BDU-da təşkil edilən tyutor kursunda təhsil
alır. Bu il magistraturanı bitirib doktorantura
pilləsinə daxil olmaq istəyir. Gələcəkdə Bakı Dövlət
Universitetində çalışmaq arzusundadır. Biz də gənc alim
olmaq yolunda addımlayan Ayşən Sadıqlıya yeni-yeni elmi
nailiyyətlər arzu edirik.
Azərbaycan qadını cəmiyyətdə öz sözünü deməyi bacarır
 Kəmalə
MƏMMƏDOVA,
Bakıdakı 250 nömrəli tam orta məktəbin Azərbaycan dili
və ədəbiyyat müəllimi,
"Ən yaxşı müəllim" müsabiqəsinin (2013-cü il) qalibi
Respublikamızın sosial, iqtisadi və mədəni həyatında
qadınların rolunun artdığı müasir dövrdə Azərbaycan
qadınının elmə, mədəniyyətə, incəsənətə yeni töhfələr
verməsi prioritet hesab olunur. Təhsil sahəsində
çalışanların böyük əksəriyyəti qadınlardır. Onlar
analıq və qadınlıq məsuliyyəti ilə bərabər, bu çətin və
şərəfli peşənin yükünü də çiyinlərində layiqincə
daşıyırlar. İnkişaf edən respublikamızda qadınların yeri
və rolu danılmazdır. Azərbaycan qadını cəmiyyətdə öz
sözünü deməyi bacarır, dövlət idarəçiliyində, müxtəlif
sahələrdə kişilərlə bərabər fəaliyyət göstərir. Gənc
nəslin təlim-tərbiyəsində əldə edilən uğurlara görə
cəmiyyətimiz qadınlara minnətdardır. Ümid edirəm ki,
Azərbaycan qadını bundan sonra da ölkəmizin ictimai,
siyasi, elm, təhsil və mədəni həyatında fəal rol
oynayacaq, üzərinə düşən şərəfli analıq və vətəndaşlıq
vəzifələrini uğurla yerinə yetirəcəkdir.
Dahilərdən biri demişdir: "Bəzi şeylər sevilir, çünki
onlar dəyərlidir, bəzi şeylər dəyərlidir, çünki onlar
sevilir. Qadınlar isə hər ikisinə layiqdir". Qadınlıq,
analıq, fədakarlıq kimi mənəvi dəyərləri özündə
birləşdirməyi bacaran xanımlar, bu bayram dünyanın
qadınlar qarşısında baş əydiyi gündür. Hamı varlığına
görə sizə borcludur.
Əziz qadınlar, hörmətli həmkarlarım, sizi 8 mart
Beynəlxalq Qadınlar Günü münasibətilə səmimi-qəlbdən
təbrik edirəm. Həyatınız hər zaman sevgi ilə dolu olsun.
Arzu edirəm ki, su qədər təmiz, həyat qədər canlı, çiçək
qədər təravətli və gözəl qalasınız.
Qadın həyatın bəzəyidir
 Validə
AĞAMALIYEVA,
Bakıdakı 246 nömrəli məktəb-liseyin fizika müəllimi,
"Ən yaxşı müəllim" müsabiqəsinin (2013) qalibi
8 Mart - qadın və gözəllik bayramıdır. Bu gün əks cinsin
nümayəndələri ətrafdakı qadınlara diqqət, qayğı və
sevgilərini nümayiş etdirirlər. Qadınlar gül-çiçək,
müxtəlif hədiyyələr, həmçinin gözəl sözlərlə
mükafatlanırlar.
Qadın həyatın bəzəyidir. Ölkəmizdə qadın hüquqları
qorunur. Ta qədimdən Azərbaycanda qadına - anaya daim
böyük ehtiram və hörmət bəslənilmiş, ana həmişə müqəddəs
olmuşdur.
Ulu öndər Heydər Əliyevin imzaladığı "Azərbaycan
Respublikasında dövlət qadın siyasətinin həyata
keçirilməsi haqqında" 2000-ci il 6 mart tarixli fərmanın
icrası ilə əlaqədar olaraq mühüm işlər görüldü. Bu gün
ulu öndərimizin imzaladığı fərmandan irəli gələn
məsələlərin həlli Azərbaycan Respublikasının Prezidenti
İlham Əliyev tərəfindən uğurla davam etdirilir.
Qadınlar ölkənin bütün ali orqanlarında əzmlə çalışırlar.
Azərbaycanın birinci xanımı YUNESKO-nun və İSESKO- nun
xoşməramlı səfiri, Milli Məclisin deputatı Mehriban
Əliyeva istər ölkəmizdə, istərsə də vətəndən uzaqlarda
öz işi, bacarığı və əvəzsiz keyfiyyətləri ilə Azərbaycan
xanımlarını ən yüksək səviyyədə təmsil edir və
Azərbaycan qadınının nələrə qadir ola biləcəyini gördüyü
işlərlə sübut edir.
Ulu öndərimiz Heydər Əliyev demişdir: "Qadınlar bir belə
əziyyət çəkərkən nə istəyirlər? Sadəcə onlara diqqət,
qayğı və ehtiram! Bu anlayışlar çox genişdir. Diqqət də,
qayğı da müxtəlif formalarda ola bilər. Ancaq kişilər
gərək qadınları həmişə yüksəkdə görsünlər, qadınlara
gərək xüsusi hörmət etsinlər, qadınlara diqqətlə
yanaşsınlar".
Qadınlar həmişə mənəvi dayağa, ülvi məhəbbətə, ilıq
nəfəsə ehtiyac duyurlar.
Analar gözlərinin nurunu, saçlarının rəngini, gecələr
yuxularını balalarından əsirgəmirlər. Yaşımızdan asılı
olmayaraq hər an aradığımız, soraqladığımız analar! Nə
yaxşı ki, sizlər varsınız.
Bu bayram bayramlar içərisində ən gözəl bayramdır, çünki
bu, biz qadınlara həsr olunub.
Aydın səma, bahar təravətli çiçəklər nəsibiniz olsun
 Mətanət
ƏHMƏDOVA,
Bakıdakı 264 nömrəli tam orta məktəbin informatika
müəllimi, əməkdar müəllim,
"Ən yaxşı müəllim" müsabiqəsinin (2013-cü il) qalibi
Baharın ilk günlərində gözəl bir bayramı qeyd edirik.
Elə bahar çiçəkləri kimi gözəl, təravətli xanımların bu
bayramı həm də ona görə əziz və müqəddəsdir ki, bizi
dünyaya gətirən, böyüdən, bizə həyat verən analarımızı
təbrik etməyə, onların ünvanına ən hərarətli sözlərimizi
deməyə tələsirik.
Müəllim sözünün altında çox böyük mənalar gizlənir.
Gələcək nəslin təlim-tərbiyəsi məhz bizim - müəllimlərin
üzərinə düşür.
Müəllimlik etdiyim illər ərzində həmişə işimə
məsuliyyətlə yanaşıb öhdəmə düşən vəzifəni vicdanla
yerinə yetirməyə çalışmışam. Belə bir deyim var: "Həyat
nə əzabdır, nə də əyləncə. Həyat işdir. Bu işi namusla,
vicdanla başa vurmalısan". Mən işimə həmişə məhz bu
prizmadan yanaşmışam və ona görə də çəkdiyim zəhmət
hədər getməyib. Keçən tədris ilində "Ən yaxşı müəllim"
müsabiqəsinə təkrar qatılaraq ikinci dəfə qalib olmağım
buna gözəl bir nümunədir.
Bu gün həyatımızı İKT-siz təsəvvür etmək mümkün
deyil. Təsadüfi deyil ki, cənab İlham Əliyev ötən ili
ölkəmizdə "İKT ili" elan etmişdi. İl başa çatsa da
bünövrəsi qoyulan işlər davam edir. Mən də bu
sahədə bildiklərimi həmkarlarımla bölüşməyə çalışıram.
Ümidvaram ki, bu tədris ilini də uğurla başa
vuracağıq.
Sonda ən səmimi sözlərimi xanımlarımıza ünvanlamaq
istəyirəm. Bayramınız mübarək, əziz xanımlar! Aydın
səma, xoş günlər, bahar təravətli çiçəklər nəsibiniz
olsun!
Çöhrənizdən təbəssüm, qəlbinizdən sevinc əskik olmasın
 Lalə
HƏSƏNOVA,
Bakı şəhər R.Pirnəzərov adına 299 nömrəli məktəb-liseyin
ibtidai sinif müəllimi,
"Ən yaxşı müəllim" müsabiqəsinin (2013) qalibi
Bu gün bütün dünyada olduğu kimi, Azərbaycanda da
qadınlar üçün əziz gündür. Yer üzünün əşrəfi sayılan
qadınların bayramıdır! 8 Mart Beynəlxalq Qadınlar Günü
respublikamızda geniş miqyasda qeyd olunur.
8 Mart qadın hüquqlarının genişləndirilməsinin və
bügünkü qadının azad olmasının tarixi səbəblərinin
xatırlanması baxımından da xüsusi bir gündür.
Azərbaycan qadını ölkəmizin ictimai-siyasi, elm, təhsil
və mədəni həyatında daim öz fəallığı ilə seçilir. Bu gün
Azərbaycan qadını cəmiyyətdə öz sözünü deməyi bacarır,
müxtəlif sahələrdə kişilərlə bərabər fəaliyyət göstərir.
Təhsil sahəsində fəaliyyət göstərən kadrların böyük
əksəriyyətinin qadınlar olması bəşəriyyətin gələcək
inkişafının daha çox qadınlardan asılı olmasının bariz
nümunəsidir. Bu gün həmin qadınlar təhsilimizin
inkişafına öz töhfələrini sevə-sevə verirlər.
Mənə verilən bu fürsətdən istifadə edərək ömrünü
balalarımızın gələcəyi yolunda şam kimi əridən qadın
müəllimləri ürəkdən təbrik edirəm. Onlara möhkəm
cansağlığı, xoşbəxtlik, ailə səadəti arzulayıram. Qoy
çöhrənizdən təbəssüm, qəlbinizdən sevinc əskik olmasın!
Hər anınız bayram əhvali-ruhiyyəli olsun!
Bayramınız mübarək, əziz qadınlar!
Mart ayında böyük sevinclə gözlədiyimiz ilk bayram
 Röya
YAQUBOVA,
Bakı şəhərindəki 272 nömrəli tam orta məktəbin tarix
müəllimi,
"Ən yaxsı müəllim" müsabiqəsinin (2013-cü il) qalibi
Bəşər tarixinin ilk dövrlərindən başlayaraq qadınların
ictimai həyatda rolu əvəzolunmazdır. Qadın bəşər
tarixinin yaranmasında və təşəkkül tapmasında öz nəcib
əməyi, zövqü və səliqəsi ilə misilsiz xidmətlər
göstərmişdir. Qadına hələ qədim zamanlardan böyük
ehtiram və hörmət bəslənilib. Əbəs yerə deyilməyib ki,
cənnət analarımızın ayaqları altındadır. Odur ki,
cəmiyyətin zərif cinsinə daim diqqət və qayğı qaçılmaz
olmuşdur. Qadınlar tarixi şəxsiyyətləri yetişdirmiş,
neçə-neçə nəsillər böyütmüş, dünyaya dahilər bəxş etmiş,
xalqımızın çoxcəhətli mədəniyyətinin tərəqqisində böyük
rol oynamışlar. Azərbaycan qadınları da tarix boyu bir
çox önəmli hadisələrə imzalarını qoymuşlar. Bu gün
şagirdlərə türk qadınlarından Tomris, Sara xatun, Zərifə
xanım Əliyeva, eləcə də Heydər Əliyev Fondunun
prezidenti, YUNESKO-nun və İSESKO-nun xoşməramlı səfiri
Mehriban xanım Əliyevanın misilsiz xidmətlərindən
ətraflı bəhs edirik. 8 Mart Beynəlxalq Qadınlar Günü
dünyanın bir çox ölkələri kimi Azərbaycan
Respublikasında da xüsusi diqqət və ehtiramla qeyd
edilir. Mart ayı Azərbaycan xalqı üçün ən gözəl aylardan
biridir. Bu ayda ana torpaq canlanır, qədim dövrlərdən
günümüzə qədər çərşənbələr və Novruz bayramını
qarşılayırıq. Mart ayında böyük sevinclə gözlədiyimiz
ilk bayram isə 8 Mart Beynəlxalq Qadınlar Günüdür. Mən
də baharın ilk günlərində qeyd olunan bu qadınlar
bayramı münasibətilə bütün xanımlarımızı təbrik edirəm.
Zərifliyi, ağlı, səliqəsi ilə tanınan hər bir Azərbaycan
qadınına, milli mənəvi dəyərlərimizin aşılanmasında
böyük əməyi olan qadın həmkarlarıma ailə səadəti,
xoşbəxtlik, cansağlığı, pedaqoji fəaliyyətlərində böyük
uğurlar arzulayıram.
Özümüzü çox xoşbəxt hiss edirik
 Alagöz
QULİYEVA,
Ağcabədi rayonu, Pərioğullar kənd tam orta məktəbinin
kimya müəllimi, əməkdar müəllim
Bayramlar ayı olduğu üçün hamı martı səbirsizliklə
gözləyir. Bu ayın əlamətdar günlərindən biri olan 8 Mart
Beynəlxalq Qadınlar Günündə biz qadınlar özümüzü çox
xoşbəxt hiss edirik.
Mən hər il olduğu kimi, bu il də indiki şagirdlərimdən,
məktəbimizin yetirmələri olan və müxtəlif ali
məktəblərdə təhsil alan tələbələrdən və əlbəttə ki,
övladlarımdan təbrik gözləyirəm.
Yeri gəlmişkən, mən tələbə yoldaşlarımla sıx əlaqə
saxlayıram. İnanıram ki, qadınlar üçün çox əziz olan bu
bayram günündə məni təbrik edənlər arasında onlar da
olacaq. Fürsətdən istifadə edib mən də bütün Azərbaycan
qadınlarını, həmkarlarımı bu bayram münasibətilə səmimi-qəlbdən
təbrik edir, onlara cansağlığı, xoşbəxtlik, xalqımızın
övladlarının savadlanması yolunda böyük uğurlar
arzulayıram.
Ölkəmizdə təhsilə, müəllimə verilən böyük qiymət,
göstərilən qayğı hər kəsə yaxşı məlumdur. Bu sahədə ulu
öndərimizin yeritdiyi siyasət uğurla davam etdirilir.
2013-cü ildə möhtərəm Prezidentimiz İlham Əliyevin
sərəncamı ilə mənə "Əməkdar müəllim" fəxri adı verilib.
Əməyimə verilən bu yüksək qiymət məndə qürur hissi
oyatmaqla yanaşı, həm də işimə böyük məsuliyyətlə
yanaşmağıma səbəb olub. Məhz buna görə tədris ilinin
sonunda əvvəlki illərlə müqayisədə təlimdə daha yüksək
nəticələr əldə edəcəyimə inanıram.
Şagirdlərim, övladlarım tərəfindən təbrik gözləyirəm
 Sevda
İSMAYILOVA,
Mingəçevir şəhər texniki-humanitar liseyin riyaziyyat
müəllimi,
"Ən yaxşı müəllim" müsabiqəsinin (2010-cu il) qalibi,
əməkdar müəllim
8 Mart Beynəlxalq Qadınlar Günü hər kəsin sevdiyi
qadınların bayramıdır. Ana, bacı, ömür-gün yoldaşı kimi
sevilən qadın sevginin ən ülvisinə layiqdir. Bizim
cəmiyyətdə qadının rolu böyük olduğu kimi, ona verilən
qiymət və hörmət də yüksəkdir. Mən sadə bir riyaziyyat
müəllimiyəm. 20 ildən artıqdır ki, bu işlə məşğulam və
öz işimlə fəxr edirəm. Əlbəttə ki, cəmiyyət
qarşısındakı vəzifəmi yalnız müəllim olmaqla
məhdudlaşdırmıram. Bu gün Azərbaycanın siyasi, ictimai
həyatında, təhsil sahəsində baş verən hər cür
islahatların biz müəllimlərin üzərinə düşən
vəzifələrini layiqincə həyata keçirməyə, şagirdlərimi də
bu yöndə istiqamətləndirməyə çalışıram. Çalışıram ki,
gücüm çatan hər sahədə mənim də əməyim olsun. Orta
məktəblərdə tədris olunan 6-cı sinif üçün riyaziyyat
dərsliyinin həmmüəlliflərindən biriyəm.
Hər bir layiqli vətəndaş kimi mənim də əməyim Azərbaycan
Prezidenti tərəfindən yüksək qiymətləndirilib. 2013-cü
ildə "Əməkdar müəllim" fəxri adına layiq görülməyim
mənim üçün gözlənilməz oldu. Məni bu yüksək ada layiq
görənlərə dərin minnətdarlığımı bildirirəm. Bu qiymət
məni bundan sonra da yüksək nailiyyətlər əldə etməyə
sövq edir.
Qadınlar bayramı mənim ən çox sevdiyim bayramlardandır.
Bu bayramda hər bir qadın kimi mən də diqqət mərkəzində
olmağı xoşlayıram. Şagirdlərim, övladlarım tərəfindən
təbrik gözləyirəm bu gözəl gündə. Müəllim üçün
şagirdinin ona verdiyi qiymətdən, göstərdiyi diqqətdən
yüksək nə ola bilər ki? Əlbəttə ki, özüm də anamı,
yaxınlarımı, müəllimlərimi təbrik etməyə tələsirəm.
Sevinc paylaşdıqca çoxalar. Mən də bu gözəl gündə
sevincimi ən yaxınlarımla paylaşmaq, onları hər zaman
şad-xürrəm görmək istəyirəm.
Əziz qadınlar! 8 Mart Beynəlxalq Qadınlar Günü
münasibətilə sizləri ürəkdən təbrik edir, sizə
cansağlığı, ailə səadəti və bütün işlərinizdə uğurlar
arzulayıram. Qoy məhəbbət qəlbinizdən, təbəssüm
çöhrənizdən, sevinc gözlərinizdən əskik olmasın!
Sevinc üstünə sevinc gəldi
 Yeganə
ƏFƏNDİYEVA,
Ağstafa şəhər 2 nömrəli tam orta məktəbin biologiya
müəllimi
İnsanların kamilliyi, həyatdakı izləri, insanlar
arasında qazandığı hörmət məhz bu həyat yolunda əldə
etdiyi biliklərdən asılıdır.
Ümummilli liderimiz Heydər Əliyev demişdir: "Müəllimlik
çox şöhrətli bir sənətdir. Həqiqi müəllim olmaq cəmiyyət
üçün doğrudan da çox qiymətlidir".
Bəli, bu şərəfli peşəyə həvəslə, tam məsuliyyətlə və
iradəsi ilə yanaşan müəllimlər şagird qəlbində əbədi
məskən salır, xalq arasında sevgi və hörmətlə qarşılanır,
rəhbərliyin diqqətindən kənarda qalmırlar.
30 ilə yaxındır ki, Ağstafa şəhər A.Abdullayev adına 2
nömrəli tam orta məktəbdə biologiya müəllimi işləyirəm.
İqtisadiyyatda, mədəniyyətdə, elmdə, həyatın bütün
sahələrində əldə olunmuş nailiyyətlərin əsasını təşkil
edən məktəbdir, təhsildir, müəllimdir. Təhsil verdiyim
məktəbdə şagirdlərimin və yetirmələrimin əksəriyyəti bir
çox ali məktəblərə yüksək ballarla daxil olurlar. O
zaman sevincimin hədd-hüdudu olmur. Bu mənə
şagirdlərimin verdiyi ən böyük hədiyyə olur.
2013-cü ildə sevinc üstünə sevinc gəldi. Azərbaycan
Respublikasının Prezidenti cənab İlham Əliyevin
sərəncamı ilə "Tərəqqi" medalı ilə təltif olundum. Bu
mənə sözlə ifadə olunmayacaq gözəl duyğular yaşatdı.
Əməyinin belə yüksək dəyərləndirilməsini Azərbaycan
xalqının hər bir şərəfli və ləyaqətli müəlliminə
arzulayıram.
Qarşıdan 8 Mart Beynəlxalq Qadınlar Günü gəlir.
Azərbaycanın bütün qadın təhsil işçilərini bu bayram
münasibəti ilə təbrik edərək deyirəm: "Elmin yollarında
atdığınız addımlarınız daim sayalı olsun. Sizin
yetirmələrinizin xoş sorağı dünyanın ən mötəbər elm və
təhsil ocaqlarından gəlsin". Müəllimlik peşəsi ilə ülfət
bağlamış xanımlarımıza uzun ömür, cansağlığı və ailə
səadəti arzulayıram.
Həyatımın ən uğurlu ili
 Güləbənzər
SƏRKƏROVA,
N.Allahverdiyev adına Qax şəhər 2 nömrəli məktəb-liseyin
ibtidai sinif müəllimi
Ömrümün 45 ilini müəllimlik peşəsinə həsr etmişəm.
Azərbaycan Dövlət Pedaqoji İnstitutunun ibtidai
təhsil metodikası və pedaqogikası fakültəsini
bitirərək ibtidai sinif müəllimi ixtisasına
yiyələnmişəm. Qax rayonunun ümumtəhsil məktəblərində
ibtidai sinif müəllimi, 1975-1976-cı illər ərzində
Qax rayon Xalq Maarif Şöbəsində metodist
vəzifəsində çalışmışam. Hazırda Qax şəhər 2 nömrəli
məktəb-liseydə ibtidai sinif müəllimi işləyirəm.
Yaxşı bilirəm ki, müxtəlif xarakterli, hərəsi bir
evin, ailənin təcəssümü olan azyaşlılara-ibtidai
sinif şagirdlərinə bilik öyrətmək son dərəcə
həssaslıq tələb edir. Ona görə də hər bir
şagirdə fərdi xüsusiyyətlərinə görə yanaşır, gələcək
addımlarını uğurla atmaqda kömək edirəm.
Hərdən düşünürəm ki, nə qədər yetirmələrim ümidimi
doğruldub, peşə sahibi olub. Onlarla rastlaşanda,
həyatda layiqli mövqe tutmalarını eşidəndə iftixar
hissi keçirirəm. Yetirmələrimin uğurları məni
həmişə öndə olmağa sövq etmişdir. Zəhmətimə,
qabiliyyətimə qiymət veriblər. Azərbaycan
Respublikasının "Qabaqcıl maarif xadimi" (1975), "Metodist
müəllim" (1986), "Ali dərəcəli müəllim" (1998)
adlarına layiq görülmüşəm. "İlin ən yaxşı müəllimi"
(1998), "Ən yaxşı fənn kabineti", pedaqoji
mühazirələrin respublika turlarının qalibi olaraq
mükafatlandırılmışam. Dəfələrlə Təhsil Nazirliyinin
fəxri fərmanları ilə təltif olunmuşam. 1998-ci ildə
Azərbaycan müəllimlərinin və qadınlarının
qurultaylarının nümayəndəsi olmağım da həyatımda
unudulmaz hadisələrdir.
2013-cü ili həyatımın ən uğurlu ili hesab edirəm.
Bu il pedaqoji sahədə fəaliyyətim yüksək
qiymətləndirilib. Azərbaycan Respublikasının
Prezidenti İlham Əliyevin 3 oktyabr 2013-cü il
tarixli sərəncamı ilə Azərbaycan təhsilinin
inkişafındakı xidmətlərimə görə "Tərəqqi" medalına
layiq görülmüşəm. Bu mükafatı əməyimə, eləcə də
Qax rayonunun təhsil işçilərinə verilən ən yüksək
qiymət hesab edirəm, ölkə rəhbərinə dərin
minnətdarlığımı bildirirəm. Qarşıdan gələn 8 Mart
Beynəlxalq Qadınlar Günü münasibətilə gözünün nuru,
qəlbinin odu ilə şagirdlərinin yoluna işıq saçan
qadın müəllimlərimizi, eləcə də bütün Azərbaycan
qadınlarını təbrik edir, hər birinə şərəfli
peşələrində uğurlar qazanmağı arzulayıram.
Səhifəni hazırladı: Hicran ƏKBƏROVA,
"Azərbaycan müəllimi" |
