|
 Fransada
fəaliyyət göstərən Ərəb Mədəni İrs Mərkəzi və Misirin
"Nefertiti Media Productions" şirkətinin birgə keçirdiyi
sorğunun nəticəsinə görə, Azərbaycanın birinci xanımı,
YUNESKO-nun və İSESKO-nun xoşməramlı səfiri Mehriban
Əliyeva 2014-cü ilin "Ən nüfuzlu qadını" adına layiq
görülmüşdür.
Bu barədə Azərbaycanın Fransadakı səfirliyinin mətbuat
xidməti məlumat yaymışdır.
Məlumatda bildirilir ki, sorğu 2013-cü il martın 8-dən
2014-cü il yanvarın 10-dək Fransada və ərəb dünyasında
tələbələr, jurnalistlər və internet şəbəkəsi
istifadəçiləri arasında keçirilmişdir. Sorğu siyahısına
dövlət başçıları, iri müəssisə və xeyriyyə
təşkilatlarının rəhbərlərinin adları daxil edilmişdir.
Mehriban Əliyeva bu ada YUNESKO-nun xoşməramlı səfiri
kimi fəaliyyətinə, həmçinin mədəniyyətin təbliği və
beynəlxalq mədəniyyət mübadiləsi, elm, səhiyyə, idman,
təhsil, texnologiya və ekologiyanın inkişafı işinə
verdiyi töhfələrə görə layiq görülmüşdür.
Azərbaycanın birinci xanımının xidmətləri sırasında
Bakıda Beynəlxalq Muğam Mərkəzinin yaradılması, valideyn
himayəsindən məhrum olmuş uşaqlara yardım göstərilməsi
və digər çoxsaylı xeyriyyə aksiyaları da qeyd
edilmişdir.
Ərəb Mədəni İrs Mərkəzinin direktoru Rey Əlqətri
Belhasusun adından Azərbaycanın Fransadakı səfirliyinə
göndərilən məktubda sorğunun nəticələri barədə məlumat
verilmişdir.
AzərTAc |
