|
 Fevralın
25-də Sumqayıt Dövlət Universitetində Xocalı
soyqırımının 22-ci ildönümünə həsr edilmiş anma
mərasimi keçirildi.
Əvvəlcə mərasim iştirakçıları böyük akt zalının
foyesində filologiya fakültəsinin III kurs tələbəsi
Altun Rəcəblinin Xocalı soyqırımını əks etdirən rəsm
əsərlərindən ibarət sərgisinə baxdılar.
Universitetin rektor vəzifəsini icra edən dosent Elxan
Hüseynov tədbiri ümummilli lider Heydər Əliyevin
"Bütövlükdə Azərbaycan xalqına qarşı yönəldilmiş Xocalı
soyqırımı öz ağlasığmaz qəddarlığı və qeyri-insani cəza
üsulları ilə bəşər tarixində bir vəhşilik aktıdır. Bu
soyqırım eyni zamanda, bütün bəşəriyyətə qarşı tarixi
bir cinayətdir" sözləri ilə açdı.
O, 1992-ci il fevralın 25-dən 26-na keçən gecə erməni
qəsbkarları tərəfindən törədilən XX əsrin ən dəhşətli
qətliamlarından biri-Xocalı soyqırımını bütünlükdə türk
dünyasına qarşı yönəldilmiş genosid aktı olduğunu
diqqətə çatdırdı. Bildirdi ki, Azərbaycan tarixində
analoqu olmayan Xocalı faciəsi yalnız ümummilli lider
Heydər Əliyev xalqın təkidli tələbi ilə siyasi
hakimiyyətə gəldikdən sonra həqiqi qiymətini almışdır.
Bu istiqamətdə Heydər Əliyev Fondunun prezidenti,
YUNESKO-nun və İSESKO-nun xoşməramlı səfiri, millət
vəkili Mehriban xanım Əliyevanın həyata keçirdiyi
genişmiqyaslı layihələr, Heydər Əliyev Fondunun
vitse-prezidenti Leyla xanım Əliyevanın təşəbbüsü ilə
2008-ci ildə başlamış "Xocalıya ədalət" kampaniyası öz
bəhrəsini verməkdədir.
Beynəlxalq təşkilatların, o cümlədən, Birləşmiş
Millətlər Təşkilatının, Avropa İttifaqının, Avropa
Təhlükəsizlik və Əməkdaşlıq Təşkilatının diqqəti
məsələyə cəlb olunub.
Tədbirdə Azərbaycan tarixi kafedrasının baş müəllimi
Elmar Xəlilovun "Erməni barbarlığının və aqressiyasının
qısa xronologiyası", tədris hissəsinin əməkdaşı,
şair-dramaturq Əvəz Mahmud Lələdağın "Xocalı soyqırımı -
rus-erməni cəlladlarının xalqımıza qarşı törətdiyi
amansız humanitar fəlakətdir" məruzələri dinlənildi.
Sonra filologiya fakültəsinin III kurs tələbəsi Altun
Rəcəbli çıxış edərək bütün gəncləri ölkə Prezidenti
İlham Əliyevin apardığı uğurlu daxili və xarici
siyasətin ətrafında sıx birləşməyə və Xocalı soyqırımı
həqiqətlərini dünyaya çatdırmaqda bir olmağa səslədi.
Mərasimdə şair Nizami Məmmədcanlının "Xocalıda qopan
haray" poeması əsasında qurulmuş SDU-nun Tələbə Gənclər
Klubunun üzvlərinin iştirakı ilə ədəbi-bədii
kompozisiya nümayiş olundu.
SDU-nun Mətbuat xidməti |
