|
Fevralın 17-də Azərbaycan Dillər Universitetinin (ADU)
pedaqoji və filologiya və jurnalistika fakültələrinin
2013-2014-cü tədris ilində bakalavriat ali təhsil
pilləsində əyani və qiyabi təhsil alan IV kurs
tələbələrinin pedaqoji təcrübəsinə həsr olunan pedaqoji
konfrans keçirildi.
Konfransı giriş sözü ilə açan universitetin elmi işlər
üzrə prorektoru, professor Dünyamin Yunusov pedaqoji
təcrübənin tələbələrin müəllim kimi formalaşmasında
mühüm rol oynadığını qeyd etdi. ADU-nun hər cəhətdən ən
öndə gedən ali təhsil ocağı olduğunu bildirən prorektor
tələbələrə hər zaman öz fəaliyyətləri ilə universitetin
adına layiq olmağı və pedaqoji təcrübənin bütün
imkanlarından yararlanmağı tövsiyə etdi.
Pedaqogika kafedrasının müdiri, professor Nurəddin
Kazımov çıxışında respublikada xarici dil müəllimlərinə
hər zaman ehtiyac olduğunu bildirdi. O, müəllim peşəsinə
yiyələnməklə yanaşı, hər bir gəncin vətəni layiqincə
təmsil edən yüksək ixtisaslı Azərbaycan vətəndaşı
olmalarını tövsiyə etdi.
Linqvodidaktika kafedrasının müdiri, professor Gülnar
Hüseynzadə əsas məqsədin peşə keyfiyyətinə malik olan
mütəxəssislər hazırlanması olduğunu vurğuladı.
Psixologiya kafedrasının müdiri, dosent Ceyhun Alıyev
pedaqoji təcrübənin psixoloji cəhətlərindən bəhs etdi.
O vurğuladı ki, prosesin uğurla həyata keçirilməsində
hazırlıqların yüksək səviyyədə təşkili, pedaqoji
təcrübədə iştirak edən şəxslərin qarşılıqlı münasibəti
və təhkim olunduqları məktəblərin tələbələrə
göstərdikləri münasibət əsas rol oynayır.
Pedaqoji fakültənin dekanı, professor Əfqan Abdullayev
tələbələrdə peşə təəssübkeşliyi olmasının önəmini
bildirdi. Dekan Bakı Şəhəri üzrə Təhsil İdarəsi ilə
universitetin müqavilə bağladığını və bu müqaviləyə
əsasən tələbələrin təhkim olunduqları məktəblərin artıq
universitetin baza məktəbləri olduğunu söylədi.
Universitet üzrə pedaqoji təcrübə rəhbəri Bəxtiyar
Həmzəyev isə təcrübənin mahiyyətindən və qaydalarından
danışdı. Pedaqoji təcrübə rəhbəri orta məktəblərin
daxili nizam-intizam qaydalarına ciddi riayət etməyin
vacibliyini vurğuladı. Qiymətləndirmə mexanizminə
toxunan B.Həmzəyev tələbələrin vəzifələri haqqında da
məlumat verdi.
Qeyd edək ki, təcrübə martın 17-dən mayın 24-dək davam
edəcək. Pedaqoji fakültənin əyani təhsil forması üzrə
423, qiyabi təhsil forması üzrə 63 tələbəsi, filologiya
və jurnalistika fakültəsinin 143 tələbəsi Bakının 36-ya
yaxın orta ümumtəhsil məktəbində təcrübə keçəcək.
ADU-nun Mətbuat xidməti |
