|
Naxçıvan Özəl Universitetində 2013-cü ilin yekunlarına
və 2014-cü ildə qarşıda duran vəzifələrə həsr olunmuş
tədbir keçirilib.
Tədbiri universitetin rektoru, professor İsmayıl Əliyev
açaraq bildirib ki, yola saldığımız 2013-cü il ali
təhsil ocağının fəaliyyətində bir sıra yeniliklərlə
yadda qalıb. Belə ki, ötən il universitet əməkdaşları 7
monoqrafiya, 1 dərslik, 5 dərs vəsaiti, 55 proqram və
metodik vəsait, 159 məqalə və tezis nəşr etdiriblər ki,
bu məqalə və tezislərin 27-i xaricdə nəşr olunub.
Beynəlxalq əlaqələr sahəsində də bir sıra uğurlar
qazanmış Naxçıvan Özəl Universiteti ilə Budapeşt
Corvinus Universiteti (Macarıstan), İstanbul Aydın
Universiteti (Türkiyə), Beynəlxalq Qaradəniz
Universiteti (Gürcüstan), Georgiya Universiteti
(Gürcüstan), Finis de Terrae Universiteti (Çili
Respublikası) arasında ikitərəfli əməkdaşlıq və tələbə
mübadiləsi sazişləri imzalanıb. Bundan başqa,
universitet 2 beynəlxalq layihədə partnyorluq qazanıb.
Rektor çıxışında diqqətə çatdırıb ki, yanvarın 30-da
Naxçıvan Muxtar Respublikası Ali Məclisində 2013-cü ilin
yekunları və qarşıda duran vəzifələrə dair keçirilmiş
müşavirədə Naxçıvan Muxtar Respublikası Ali Məclisinin
sədri cənab Vasif Talıbov sosial-iqtisadi sahədə əldə
edilən bir sıra nailiyyətlərlə yanaşı, ötən il işdə
buraxılmış nöqsanlara da toxunub. Muxtar respublika
rəhbəri bildirmişdir ki, ali təhsil müəssisələri müəllim
və tələbə mübadiləsi, digər ölkələrdən müəllimlərin
dəvət olunması və ya distant təhsilin təşkili
istiqamətində fəaliyyəti gücləndirməli, ixtisaslı kadr
hazırlığına və müvafiq ixtisaslar üzrə tədris və
tədris-metodik ədəbiyyatların hazırlanmasına nail
olmalıdırlar.
Tədbirdə iqtisadiyyat fakültəsinin dekanı, iqtisad üzrə
fəlsəfə doktoru, dosent Ceyhun Mahmudov, pedaqoji
fakültənin dekan müavini Nazim Mahmudov çıxış ediblər.
Tədbirə yekun vuran universitetin rektoru, professor
İsmayıl Əliyev mövcud nöqsanların aradan qaldırılması
istiqamətində əməli tədbirlər görülməsinin vacibliyini
vurğulayıb.
Nuray ƏSGƏROVA |
