|
Azərbaycanın Tacikistandakı səfiri Abbasəli Həsənov bu
ölkənin təhsil və elm naziri Nuriddin Saidov ilə
görüşmüşdür.
Səfir ölkələrimiz arasında əməkdaşlığın inkişafında
təhsilin ən vacib istiqamətlərdən biri olmasından geniş
söhbət açmışdır. O, XIV əsrdə yaşamış tacik mütəfəkkiri
Kamal Xucəndinin Gəncəyə və Təbrizə gedərək elmlə məşğul
olduğunu diqqətə çatdırmış, bu ənənənin davam
etdirilməsinin əhəmiyyətini vurğulamışdır.
Diplomat, həmçinin hər iki ölkənin əlyazmalar
institutlarının arxivlərindən qarşılıqlı istifadənin
mümkünlüyünü, ayrı-ayrı əlyazmaların surətlərinin
mübadiləsini, azərbaycanlı və tacik alimlərinin birgə
tədqiqat aparmalarını məqsədəuyğun hesab etmişdir.
Bildirmişdir ki, Azərbaycan geologiya və neft-qaz
sənayesi sahəsində böyük təcrübəyə malikdir. Dünyada ilk
dəfə Azərbaycanda 1846-cı ildə sənaye üsulu ilə neft
hasil edilmiş, 1949-cu ildə dünyada ilk dəfə Xəzər
dənizində neft çıxarılmasına başlanmışdır. Uzun illərdir
ki, fəaliyyət göstərən Azərbaycan Dövlət Neft
Akademiyasında dünyanın bir çox ölkələrindən tələbələr
təhsil alırlar.
Nuriddin Saidov bildirmişdir ki, 2012-ci ilin iyul
ayında Tacikistan Prezidenti Emoməli Rəhmonun
Azərbaycana rəsmi səfəri zamanı nümayəndə heyətinin
tərkibində iştirak etmiş və ölkələrimiz arasında təhsil
sahəsində saziş imzalanmışdır. Nazir Azərbaycanda
təhsilin neft-qaz, geologiya, kibernetika, tibb və digər
sahələrində inkişaf etdiyini bildirmiş, bu sahədə tələbə
və müəllim mübadiləsinin vacibliyindən danışmışdır. Qeyd
etmişdir ki, Tacikistanın bir çox alimləri vaxtilə
Azərbaycanda ali təhsil almış, dissertasiya müdafiə
etmişlər.
Tərəflər iki ölkə arasında elm və təhsil sahəsində
əməkdaşlığın ayrıca iş planının tərtib və təsdiq
olunmasını və ondan sonra müvafiq sahələrdə əməli
işlərin həyata keçirilməsini məqsədəuyğun hesab
etmişlər.
Abbasəli Həsənov 2013-cü ildə Azərbaycanın
Tacikistandakı səfirliyinin fəaliyyəti barədə danışmış,
dost ölkənin müxtəlif regionlarında və şəhərlərində
dünya şöhrətli siyasi xadim, Azərbaycan xalqının
ümummilli lideri Heydər Əliyevin 90 illik yubileyi ilə
əlaqədar 13 muğam konsertinin təşkil olunduğunu, "Leyli
və Məcnun" operasının Düşənbədəki S.Ayni adına Dövlət
Opera və Balet Teatrında Tacikistan və Azərbaycan
incəsənət ustalarının birgə iştirakı ilə səhnəyə
qoyulduğunu bildirmişdir.
AzərTAc |
