|
Yanvarın 17-də Azərbaycan Dillər Universitetində (ADU)
20 Yanvar faciəsinin 24-cü ildönümünə həsr olunmuş
tədbir keçirildi. Universitetin tələbəsi olmuş 20
Yanvar şəhidi Ülvi Bünyadzadənin adına muzeyin
qarşısında keçirilən tədbiri giriş sözü ilə açan ADU-nun
rektoru, Milli Məclisin deputatı, professor Səməd
Seyidov 1990-cı il 20 yanvar tarixinin Azərbaycan
xalqının qəhrəmanlıq salnaməsi olduğunu bildirdi.
Hadisələri canlı yaşadıqlarını söyləyən ADU-nun rektoru
tədbirdə iştirak edən tələbələrin böyük əksəriyyətinin
həmin hadisələr haqqında kitablardan, arxivlərdən
öyrəndiklərini nəzərə çatdırdı. Rektor S. Seyidov
ADU-nun tələbəsi olmuş 20 Yanvar şəhidi Ülvi
Bünyadzadənin adına yaradılmış açıq muzeyin önündə
toplaşan gəncliyi onun kimi cəsur, vətənpərvər görmək
istədiyini dedi.
Rektor Səməd Seyidov 20 Yanvar hadisələrinin dünyaya
çatdırılmasında ümummilli lider Heydər Əliyevin əvəzsiz
xidmətlərinin olduğunu, Azərbaycan Respublikasının
Prezidenti İlham Əliyev tərəfindən bu siyasətin uğurla
davam etdirildiyini qeyd etdi.
ADU-nun ingilis dilinin leksikologiyası kafedrasının
müdiri, professor Fikrət Cahangirov bildirdi ki,
Azərbaycan xalqı müstəqilliyi igid övladlarının qanı
bahasına qazandı. Hadisələrin canlı şahidi olmuş
müasir alman dili kafedrasının dosenti Çərkəz Qurbanlı
20 Yanvar faciəsi haqqında danışdı.
İngilis dilinin fonetikası kafedrasının müdiri,
professor Fərman Zeynalov 20 Yanvarı ciddi şəkildə
düşünülmüş, ətraflı planlaşdırılmış hadisə kimi
xarakterizə etdi.
Anım tədbirində pedaqoji fakültənin II kurs tələbəsi
Nərgiz Məmmədova "Şəhidlər" şeirini söylədi.
ADU-nun Mətbuat xidməti |
