|
Yanvarın 17-də Bakı Dövlət Universitetində Təhsil
Nazirliyinin tədbirlər planına uyğun olaraq 20 Yanvar
şəhidlərinin anım mərasimi keçirilib. Öncə universitetin
imtahan keçirilən 225 auditoriyasında tələbələrə faciə
haqqında qısa məlumat verilib. Sonra rektor, akademik
Abel Məhərrəmovun iştirakı ilə 443 və 900 saylı
otaqlarda anım mərasimləri başlayıb və tədbir BDU-nun
həyətindəki Şəhidlər abidəsinin qarşısında davam
etdirilib. İştirakçılar abidə önünə gül qoyaraq,
şəhidlərin ruhunu bir dəqiqəlik sükutla yad ediblər.
Çıxış edən rektor, akademik Abel Məhərrəmov Azərbaycan
xalqının tarixinə Qanlı Yanvar faciəsi kimi daxil olmuş
1990-cı il 20 Yanvar hadisələrindən 24 il keçdiyini qeyd
edərək bildirib ki, keçmiş sovet imperiyasının həmin gün
Azərbaycan xalqına qarşı həyata keçirdiyi terror aktı
insanlığa qarşı törədilmiş ən ağır cinayətlərdən biri
kimi bəşər tarixində qalacaqdır. 20 Yanvarda Bakı Dövlət
Universitetinin də şəhidlər verdiyini deyən rektor
bildirib ki, hər il şəhidlərimizin əziz xatirəsini yad
etmək üçün universitetimizin önündə ucaldılmış bu
möhtəşəm abidə qarşısına toplaşırıq. Tələbələrimiz
tez-tez bu abidəni ziyarət edir və şəhidlərimizlə fəxr
edirlər. Rektor 20 Yanvar faciəsinə ulu öndər Heydər
Əliyev tərəfindən hüquqi-siyasi qiymət verildiyini,
faciə qurbanlarının xatirəsinin hər il dövlət
səviyyəsində anıldığını, Prezident İlham Əliyevin bu
siyasəti uğurla davam etdirdiyini bildirib.
Sonra kafedra müdiri, professor İzzət Rüstəmov faciə ilə
bağlı fikirlərini bölüşüb. Tədbir tələbələrin çıxışı ilə
yekunlaşıb.
BDU-nun Mətbuat və informasiya şöbəsi |
