|
Bakıdakı fizika-riyaziyyat və informatika təmayüllü
liseydə Azərbaycan xalqının tarixinə qanlı hərflərlə
yazılmış 20 Yanvar faciəsinin 24-cü ildönümü
münasibətilə ədəbi -bədii kompozisiya keçirildi. İlk
öncə Dövlət himni səsləndi. Bir dəqiqəlik sükutla
şəhidlərin ruhu yad edildi. Qanlı Yanvar hadisələrini
törədən cinayətkarlardan söz açan liseyin direktor
müavini Valeh Bəyalıyev xalqın müstəqilliyi uğrunda
canlarından keçən şəhidlərin qəhrəmanlıq salnamələri
barədə ətraflı danışdı. Qeyd etdi ki, bu tarixi hadisə
bütün dünyaya bir daha göstərdi ki, Azərbaycan xalqı
qəhrəman xalqdır və müstəqilliyini əldə etmək üçün bütün
çətinlikləri adlamağa qadirdir. Əminlik ifadə olundu ki,
Azərbaycan Prezidenti İlham Əliyevin rəhbərliyi
altında həyata keçirilən siyasət nəticəsində işğal
altında olan torpaqlarımız tezliklə geri qaytarılacaq,
şəhidlərimizin müqəddəs ruhu şad olacaqdır. Vurğulandı
ki, ulu öndərimiz Heydər Əliyev 20 Yanvar hadisələri
zamanı həlak olmuş insanların xatirəsinin
əbədiləşdirilməsi istiqamətində bir sıra mühüm addımlar
atmışdır. Məhz onun məlum sərəncamı ilə 20 Yanvar
Ümumxalq hüzn günü elan olunmuşdur. Şəhidlərin
xatirəsinə ucaldılmış xüsusi memorial kompleks də
ümummilli liderin təşəbbüsü ilə ərsəyə gəlmişdir.
V.Bəyalıyev o günləri xatırlayaraq o müdhiş gecənin
şahidi olduğu hadisələrdən, İlqar, Larisa, Vera və
Nəriman kimi yeniyetmələrin, tələbə Ülvi Bünyadzadənin,
əbədi məhəbbət dastanı olan İlhamla Fərizənin yarımçıq
qalmış nakam talelərindən də söz açdı.
Aparıcılar Orxan Miriyev, Nuray Kərimzadə qanlı
Yanvar hadisələrində tarixdə misli-bərabəri olmayan
yüzlərlə şəhid olmuş, itkin düşmüş, yaralanmış
insanlardan bəhs etdilər.
Sonra həzin musiqi sədaları altında məktəbin şagirdləri
- Xədicə, Royal, Orxan, Nuray, Rəna, Şəhla, Solmaz
"Şəhidlər", "Ağla, qərənfil, ağla", "Al bayraq",
"Azərbaycan", "Qəhrəmanlar unudulmur", "Bir kərə
yüksələn bayraq", "Vətən bayatıları" və sair şeirlər
söylədilər, kompozisiya nümayiş etdirdilər.
Məktəbin direktoru Tariyel Talıbov, müəllimlər -
Sərfinaz Əkbərova, Südabə Hüseynova, Allahverdi
Məmmədov xalqımızın qəhrəmanlıq tarixindən,
şəhidlərimiztin ölməz xatirəsindən söz açdılar.
Çıxışlarda qeyd olundu ki, Azərbaycanın çağdaş tarixinə
yazılan 20 Yanvar faciəsi xalqımızın milli müstəqilliyi
uğrunda apardığı mübarizənin ən parlaq nümunəsidir.
Sonda qanlı Yanvar hadisələrini əks etdirən
videogörüntülər nümayiş olundu.
Sifai SƏFƏROVA,
"Azərbaycan müəllimi" |
