|
 Azərbaycan
Respublikasının təhsil naziri Mikayıl Cabbarovun 29
dekabr 2013-cü il tarixli əmrinə əsasən yanvarın 13-də
Bakı Pedaqoji Kadrların İxtisasartırma və
Yenidənhazırlanma İnstitutunda 20 Yanvar faciəsinin
24-cü ildönümünə həsr olunmuş "20 Yanvar - milli birlik
və mübarizlik günüdür" mövzusunda elmi-praktik konfrans
keçirildi. Əvvəlcə tədbir iştirakçıları faciə
qurbanlarının xatirəsini bir dəqiqəlik sükutla yad
etdilər.
İnstitutun professor-müəllim heyəti və tələbələrin
iştirak etdikləri tədbirdə rektor, professor Asəf
Zamanov çıxış edərək bildirdi ki, 20 Yanvar, ölkəmizin
tarixində ondan əvvəlki faciələr kimi, XX əsrdə
xalqımıza qarşı yeridilən düşünülmüş mənfur siyasətin
növbəti təzahürü idi. Sovet ordusunun böyük
kontingentinin, xüsusi təyinatlı bölmələrinin və daxili
qoşunların Bakıya yeridilməsi xüsusi qəddarlıq və
görünməmiş vəhşiliklə müşayiət olundu. Kommunist
diktaturası Çexoslovakiyaya, Macarıstana, Əfqanıstana
qarşı həyata keçirdiyi hərbi müdaxiləni, o zamankı Sovet
İttifaqının müttəfiq respublikalarından biri olan
Azərbaycanda da təkrarlamaqdan çəkinmədi. Həmin vaxt
Azərbaycan mənfur qonşu olan ermənilərin də təcavüzünə
məruz qalmışdı. Belə bir şəraitdə sovet rəhbərliyi
nəinki münaqişənin qarşısını almaq üçün qəti tədbirlər
görmədi, əksinə, Azərbaycana yeridilən ordu hissələrinin
tərkibinə səfərbərliyə alınan erməni əsgər və zabitləri,
sovet hərbi hissələrində xidmət edən ermənilər, hətta
erməni kursantlar da daxil edilmişdi.
Professor Asəf Zamanov qeyd etdi ki, Qorbaçovun
qısqanclığı nəticəsində rəsmi Moskvanın təqib və
təzyiqlərinə məruz qalan ümummilli lider Heydər Əliyev
Bakıda törədilən bu qanlı faciənin ertəsi günü -
yanvarın 21-də Azərbaycanın Moskvadakı daimi
nümayəndəliyinə gəlib mətbuat konfransı keçirdi və
kəskin bəyanatla çıxış edərək, sovet rəhbərliyinin
Azərbaycan xalqına qarşı təcavüzünü açıq şəkildə
pislədi.
Qeyd edildi ki, Azərbaycan xalqına qarşı soyqırımının
törədilməsi, sovet hakimiyyəti illərində əzəli və əbədi
torpaqlarımızın tədricən ilhaq olunması, nəticədə
ərazimizin 84 min kv.km-dək azalması, sovet
rəhbərlərinin havadarlığı ilə başlayan Ermənistan -
Azərbaycan, Dağlıq Qarabağ münaqişəsi, soydaşlarımızın
Ermənistandan - öz ata-baba torpaqlarından qovulması
düşünülmüş mənfur siyasətin mərhələləridir.
1990-cı il yanvar qırğını nə qədər faciəli olsa da,
Azərbaycan xalqının iradəsini, milli azadlıq uğrunda
mübarizə əzmini qıra bilmədi. Həmin müdhiş gecədə həlak
olan oğul və qızlarımız öz qanları ilə Azərbaycan
tarixinə parlaq səhifə yazdılar, milli azadlıq və
müstəqilliyimiz üçün yol açdılar, sovet imperiyasının
dağılması üçün katalizator rolu oynadılar.
Natiq çıxışında onu da vurğuladı ki, Azərbaycan dövlət
müstəqilliyini əldə etdikdən sonrakı ilk illərdə başları
hakimiyyət uğrunda çəkişmələrə qarışmış rəhbərlər 20
Yanvar faciəsinə siyasi-hüquqi qiymət verilməsi və
cinayətkarların müəyyən edilməsi istiqamətində
məqsədyönlü iş aparmadılar. Yalnız xalqımızın ümummilli
lideri Heydər Əliyevin hakimiyyətə qayıdışından sonra -
1994-cü ildə qanlı Yanvar hadisələrinə siyasi - hüquqi
qiymət verildi, faciənin günahkarlarının adları
açıqlandı.
Sonra institutun elmi işlər üzrə prorektoru, pedaqogika
üzrə fəlsəfə doktoru Mönsüm Alışov, tədris işləri üzrə
prorektor Məhəmməd Bayramov, pedaqogika kafedrasının
müdiri Fikrət Əliyev və digərləri çıxış edərək Vətənin
azadlığı və suverenliyi uğrunda canlarından keçən oğul
və qızlarımızın igidliklərindən nümunələr gətirdilər.
Tədbirin sonunda tarixi faciələrimizin xronikası
əsasında radioçarx səsləndirildi.
BPKİYİ-nin Mətbuat xidməti |
