|
Yanvarın 7-dən Azərbaycan Dillər Universitetində qış
imtahan sessiyasına start verildi.
ADU-nun rektoru, Milli Məclisin deputatı, professor
Səməd Seyidov 2013/2014-cü tədris ilinin qış imtahan
sessiyasının müvafiq təlimatlara və əsasnamələrə uyğun
keçirilməsini təmin etmək məqsədilə müvafiq əmr
imzalayıb. Qış imtahan sessiyası əyani şöbədə 30
dekabr 2013-ci il tarixindən 4 fevral 2014-cü il
tarixinədəkdir. Qiyabi şöbədə isə sessiya müddəti
yanvarın 7-dən fevralın 10-dək müəyyən edilib. Qış
imtahan sessiyası 4 fakültənin (tərcümə, pedaqoji,
filologiya və jurnalistika, regionşünaslıq və beynəlxalq
münasibətlər) əyani gündüz, pedaqoji fakültənin əyani
gündüz və qiyabi şöbələrində aparılır.
Qış imtahan sessiyası dövründə yarana biləcək neqativ
halları dərhal araşdırmaq və müvafiq tədbirlər görmək,
habelə sessiyanın normativ sənədlərə uyğun keçirilməsinə
kömək etmək məqsədilə Operativ Qərargah da yaradılıb.
Tədris şöbəsinin müdiri Şəfəq Şahməmmədovanın rəhbərlik
etdiyi Operativ Qərargahın üzvləri rektorun müşaviri
Vazeh Əsgərov, Xüsusi şöbənin rəisi Elçin Tağıyev,
xarici dillərin tədrisi metodikası kafedrasının baş
müəllimi Hafiz Rəhimov və Tələbə Gənclər Təşkilatının
sədri Xıdır Kazımovdur. Bununla yanaşı, ADU-nun
440-35-05, 440-35-02, 440-64-82 nömrəli şəhər və 141,
146, 264 nömrəli daxili telefonları, eləcə də
mail@adu.edu.az ünvanlı elektron poçtu "Qaynar xətt"
elan edilib.
Tədris binalarında sessiya ilə bağlı yazılı müraciətləri
və təklifləri qəbul etmək üçün binaların daha çox diqqət
çəkən yerlərində müvafiq qutular qoyulub. Fakültə
dekanları və kafedra müdirlərinə tapşırılıb ki, imtahan
sessiyasının mövcud normativ sənədlərə uyğun təşkil
olunmasını təmin etsinlər.
ADU-nun Mətbuat xidməti |
