|
 2013-cü
ildən Astara rayonunun ucqar dağ kəndi olan Şümrüd
kəndində müəllimlik fəaliyyətinə başladım. Fəaliyyətə
başladığım ilk gündən dağ məktəbində işləməyin çətin
olduğunun şahidi oldum. Lakin sənətini sevən gənc bir
müəllim kimi üzərimə düşən məsuliyyəti dərk edib özümü
təhsil ordusunun əsgəri sandım. Müəllim bir şamdır ki,
özünü əridərək ətrafına işıq saçar aforizmini xatırlayıb
yaradıcı fəaliyyət göstərəcəyimə dair söz verdim. İlk
gündən mən öz fəaliyyətimi şagirdlərin özünə inam
hissinin, məktəbə, təhsilə maraqlarının artması
istiqamətində qurmağa başlayaraq məntiqdən dərsdənkənar
məşğələlər keçirməyə başladım. Şagirdlərin istər fərdi
şəkildə bir-biri ilə, istərsə də komandalar şəklində
məntiqi sualları həll edərək yarışması onların
maraqlarının artmasına səbəb oldu. Şagirdlərimin artan
marağını nəzərə alıb I yarımilin sonunda "Dünya
Azərbaycanlılarının Həmrəylik Gününə həsr olunmuş Şümrüd
kənd orta məktəbinin məntiq yarışı"nı keçirməyə qərar
verdim. Daşıdığım müəllim adına layiq olmaq üçün bütün
təşkilati məsələləri üzərimə götürüb uşaqlara sevincli
və unudulmaz anlar yaşatmaq istədim. Yarışın daha
maraqlı keçməsi üçün üzərində "Dünya Azərbaycanlılarının
Həmrəylik Gününə həsr olunmuş Şümrüd kənd orta
məktəbinin məntiq yarışı" yazısı həkk olunmuş fincanlar
və qələmlər, eyni zamanda qaliblər üçün fəxri fərman
hazırladaraq uşaqların yarışa hazırlanması yönündə
fəaliyyətə başladım. Və elə bu dövrdə daha sevincli bir
xəbər aldıq ki, uşaqların sevincinə sevinc qatıldı.
Aztv-də yayımlanan Müasir Azərbaycan Gənci (MAG)
verilişi həmin gün qonağımız olaraq tədbirimizi
işıqlandıracaqdı. Bunu bilən şagirdlərimin gözlərindəki
sevinci görmək bir müəllim kimi mənə ruh verdi.
Yarışda müəllim və şagird kollektivindən başqa xüsusi
qonaqlarımız da vardı. Astara Rayon Təhsil Şöbəsinin
məsləhətçisi Səfərəli Məmmədov, Pəlikəş bələdiyyəsinin
sədri Eynəli Əzizov, Pəlikəş kənd inzibati ərazi dairəsi
üzrə nümayəndə Zakir Bunyadov, telejurnalist, "MZ
production"un baş redaktoru İradə Sultanova həmin gün
bizi tək qoymamışdılar. Hər kəs öz yerini tutduqdan
sonra Dünya Azərbaycanlılarının Həmrəylik Gününə həsr
edilmiş Şümrüd kənd orta məktəbinin məntiq yarışının
bədii hissəsinin açılışı oldu. Əsgər geyimində olan
şagird dövlət bayrağını otağa gətirdi və respublikamızın
Dövlət himni səsləndi. Məktəbin direktoru Məmmədhüseyn
Dadaşov qonaqları təqdim edərək onları, müəllimləri,
yarış iştirakçılarını salamladı, belə tədbirlərin,
yarışların məktəb və şagirdlər üçün faydasından danışdı.
Yarışın təşkilatçısı kimi məntiq yarışı keçirməyimin və
bu yarışın Həmrəylik gününə həsr etməyimin
zəruriliyindən söz açdım. Bu gün təhsilə yanaşmanın
dəyişdiyini şagirdlərə hazır əzbəri biliklərin
verilməsinin yox, məhz onlarda bacarıq və vərdişlərin
formalaşmasının, məntiqi təfəkkürün inkişafının başlıca
məqsədimiz olduğunu qeyd edərək məntiq elmi, onun
tarixi, əhəmiyyəti, eləcə də IQ haqda maraqlı
məlumatları iştirakçıların nəzərinə çatdırdım.
Daha sonra məktəbimizin ingilis dili müəllimi Şahin
müəllim Həmrəylik Gününün tarixi və Heydər Əliyevin
Azərbaycanın inkişafındakı xidmətlərindən danışdı.
Şagirdlərin ifasında "Ulu bir sərkərdə, ulu bir öndər"
şeirinin sonunda Heydər Əliyevin 2001-ci ildə Dünya
Azərbaycanlılarının I Qurultayındakı çıxışından "Hər bir
insan üçün onun milli mənsubiyyəti onun qürur
mənbəyidir. Mən həmişə fəxr etmişəm və bu gün də fəxr
edirəm ki, mən Azərbaycanlıyam" fikrinin səsləndirilməsi
alqışlara səbəb oldu.
Çıxış edənlər dağ məktəbində belə bir tədbirin
keçirilməsini təqdirəlayiq hal kimi qiymətləndirərək
yarış iştirakçılarına uğurlar arzuladılar. 11-ci sinif
şagirdi Xaqani Riyazi sofizmlər haqqında çıxış edib 5-in
6-ya bərabər olduğunu isbat edərək hər kəsin marağına
səbəb oldu. 6-cı və 8-ci sinif şagirdləri Əfrail və
Samran kibrit çöpləri ilə məntiqi məsələlər nümayiş
etdirdilər. Daha sonra hərəsində dörd nəfər olmaqla 2
komanda - "Zəka" və "Xəzər" komandalarının arasında 3
mərhələdən ibarət kiçik yarış oldu. I mərhələdə 6 və
7-ci sinif şagirdləri onlara riyazi tapmacalar təqdim
etdi. II mərhələdə qonaqlara əyləncəli və məntiqi
suallar yazılmış kiçik vərəqlər paylandı ki, onlar bu
sualları komandalara ünvanladılar. Nəhayət, III
mərhələdə komandalar bir-birinə keçmiş həlqələri, dəmir
parçalarını ayırmaq kimi praktik tapşırığın öhdəsindən
gəlməyə çalışdılar. 3 mərhələnin yekununa görə "Zəka"
komandası qalib gəldi. Məktəb direktoru və qonaqlar 5
şagirdə yarışın sual kitabçasını təqdim edərək uğur
arzuladılar. Bundan sonra 25 IQ testindən ibarət sual
kitabçaları şagirdlərə paylanaraq onlara bir saat vaxt
verildi. Yarışın yekununa görə 6-cı sinif şagirdləri
Əfrail I, Elçin II və 10-cu sinif şagirdi Ayaz III
yerləri tutaraq fəxri fərman və hədiyyələrlə
mükafatlandırıldılar.
Bu yarış bir daha sübut etdi ki, məntiq yaş və sərhəd
tanımır. 6-11-ci sinif şagirdlərinin qatıldığı yarışda
ilk 5 yerdə qərarlaşanlardan 3 məktəblinin 6-cı sinfi
təmsil etməsi diqqətçəkən məqam idi. Bu da yeni təlim
metodlarının, kurikulumun şagirdlərin məntiqi
təfəkkürünün inkişafında müsbət təsirinin bariz nümunəsi
idi.
Sonda qeyd edim ki, yarışın təşkilatçısı kimi mən bu gün
özümü zəngin hesab etdim. Şagirdlərimin üzündəki sevinc
və sabaha inam hissi məndə bu duyğunu yaratdı. Onlar
yarışın keçiriləcəyini bildikdə buna sevinclə
hazırlaşırdılar. Lakin çəkilişin gələcəyi xəbəri onların
həvəsini daha da artırdı. Hər bir müəllim şagirdinə
nümunə olmağı bacarmalı, onları öz şəxsində tərbiyə
etməlidir. Deyirlər müəllim necədirsə, sinif də elədir
və mən fəaliyyətim zamanı bu deyimləri daim nəzərə alır,
işlədiyim kənd üçün, eləcə də xalqımız üçün sağlam
düşüncəli gənclər formalaşdırmağa çalışıram.
Fikrət ABDULOV,
Astara rayonu Şümrüd kənd orta məktəbinin fizika
müəllimi |
