|
Yanvarın 8-də Karl adına Praqa Universitetinin rektoru,
professor Vaclav Hamplın başçılıq etdiyi nümayəndə
heyəti Bakı Dövlət Universitetində (BDU) olmuşdur.
AzərTAc xəbər verir ki, tanınmış alimlərin, mütəxəssis
və müəllimlərin də iştirak etdikləri görüşdə BDU-nun
rektoru, Milli Məclisin deputatı, akademik Abel
Məhərrəmov Azərbaycan Prezidenti İlham Əliyevin elmin,
təhsilin inkişafına daim xüsusi önəm verdiyini
vurğulamışdır.
Müasir dünyada elmin, təhsilin mühüm rolunu xatırladan
rektor BDU-nun inkişaf mərhələləri, fəaliyyəti,
beynəlxalq əlaqələri, o cümlədən Praqa Universiteti ilə
əməkdaşlığından danışmışdır.
Rəhbərlik etdiyi təhsil müəssisəsi barədə məlumat verən
professor Vaclav Hampl qeyd etmişdir ki, Avropanın ən
qədim universitetlərindən olan bu ali məktəbdə 300-dən
çox ixtisas və ixtisaslaşma üzrə 54 min tələbə oxuyur.
Ümumilikdə 17 fakültəsi və nəzdində bir neçə
elmi-tədqiqat institutu olan universitetdə Albert
Eynşteyn, Alois Musil, İosif Fişer və dünyanın digər
məşhur alim və mütəfəkkirləri təhsil almışlar.
Sonra Bakı Dövlət Universiteti ilə Karl adına Praqa
Universiteti arasında Anlaşma Memorandumu imzalanmışdır.
Sənədi akademik A.Məhərrəmov və professor V.Hampl
imzalamışlar.
Memorandumda müəllim, tədqiqatçı və tələbələrin,
həmçinin elmi nəşrlərin, tədris materiallarının
mübadiləsi, Avropa İttifaqının qarşılıqlı maraq doğuran
layihə və proqramlarında birgə iştirak etmək və s.
nəzərdə tutulur. |
