|
 Azərbaycan
Prezidenti İlham Əliyev mərasimdə iştirak edib
Dekabrın 27-də Fövqəladə Hallar Nazirliyi Akademiyası
binasının açılış mərasimi olmuşdur.
Azərbaycan Respublikasının Prezidenti İlham Əliyev
mərasimdə iştirak etmişdir.
2005-ci ildə Prezident İlham Əliyevin sərəncamına uyğun
olaraq Azərbaycanda Fövqəladə Hallar Nazirliyinin
yaradılması ilə ölkədə mülki müdafiə, ərazilərin təbii,
həmçinin texnogen xarakterli fövqəladə hallardan
qorunması və əhalinin təhlükəsizliyinin təmin edilməsi
sahəsində kompleks tədbirlərin həyata keçirilməsinə
başlandı. Dövlətimizin başçısının diqqəti sayəsində
nazirliyin maddi-texniki bazası gücləndirildi, kadr
hazırlığının təşkili, məlumat mübadiləsinin aparılması
və digər sahələrdə nailiyyətlər əldə olundu. Ən müasir
texnika, xilasetmə ləvazimatları, xüsusi geyimlər,
texniki vasitələr, cihazlar alındı. Bu illərdə
nazirliyin strukturuna daxil olan 9 regional mərkəz
yaradıldı, yeni inzibati binalar tikilərək istifadəyə
verildi. Bütün bunlar 2010-cu ildə baş verən Kür
daşqınlarının, 2012-ci ildə respublikanın qərb
bölgəsində qeydə alınan zəlzələnin nəticələrinin uğurla
aradan qaldırılmasında mühüm rol oynadı. Ötən dövrdə
nazirliyin kadr potensialının artırılması və bu
istiqamətdə mühüm tədbirlərin görülməsi də Prezident
İlham Əliyevin diqqət mərkəzində oldu. Odur ki,
dövlətimizin başçısının 2008-ci ildə imzaladığı
sərəncama əsasən yaradılan Fövqəladə Hallar Nazirliyinin
Akademiyası da bu baxımdan mühüm əhəmiyyətə malikdir.
2009-cu ildən fəaliyyətə başlayan və elə həmin il də ilk
qəbulu həyata keçirən akademiya 2013-cü ildə ilk
məzunlarını buraxmışdır. Heç şübhəsiz ki, ölkəmizdə və
onun hüdudlarından kənarda baş verən təbii fəlakətlərin
nəticələrinin aradan qaldırılmasında əsl fədakarlıq
göstərən nazirliyin qüvvələri bundan sonra da
vətəndaşlarımızın təhlükəsizliyinin keşiyində
dayanacaqlar.
Fövqəladə hallar naziri, general-polkovnik Kəmaləddin
Heydərov Azərbaycan Prezidenti, Silahlı Qüvvələrin Ali
Baş Komandanı İlham Əliyevə raport verdi.
Dövlətimizin başçısı əvvəlcə xalqımızın ümummilli lideri
Heydər Əliyevin akademiyanın həyətində ucaldılmış
abidəsini ziyarət etdi, önünə gül dəstəsi qoydu.
Prezident İlham Əliyev akademiyanın binasının rəmzi
açılışını bildirən lenti kəsdi.
Bildirildi ki, akademiya müasir tələblərə cavab verən
xüsusi ixtisaslı ali təhsilli kadrların hazırlanmasını,
Fövqəladə Hallar Nazirliyinin fəaliyyət istiqamətləri
üzrə əlavə təhsilin həyata keçirilməsini və fövqəladə
hallar sahəsində fundamental və tətbiqi elmi tədqiqat
işlərinin aparılmasını təmin edən xüsusi təyinatlı
təhsil müəssisəsidir. Bu təhsil ocağının ixtisaslı
kadrlarla komplektləşdirilməsi, tədris prosesinin
normativ-hüquqi aktlara və normativlərə uyğun qurulması,
fövqəladə hallar sahəsində elmi tədqiqatların aparılması
və digər mühüm vəzifələrin yerinə yetirilməsi üçün son
illərdə bir çox işlər görülmüşdür. Hazırda akademiyada
502 kursant təhsil alır və 62 professor-müəllim heyəti
çalışır. 2013-cü ildə akademiyanı 100 nəfər bitirmişdir.
Onlar həyat fəaliyyətinin təhlükəsizliyi və yanğın
təhlükəsizliyi mühəndisliyi ixtisaslarına yiyələnmişlər.
Məlumat verildi ki, akademiyanın strukturuna həyat
fəaliyyətinin təhlükəsizliyi, yanğın təhlükəsizliyi,
əlavə təhsilin təşkili, qiyabi təhsil fakültələri və
altı kafedra daxildir. Fəaliyyətə başladığı ilk gündən
akademiyada təhsilin məzmununun Bolonya prosesinin
prinsiplərinə, tədrisin Avropa Kredit Köçürmə Sisteminin
tələblərinə uyğun keçirilməsi təmin edilmişdir.
Yüksək tədris prosesinin hökm sürdüyü, fənn
kabinetlərinin, auditoriyaların hər cür zəruri
avadanlıqla təchiz olunduğu akademiyanın peşə ixtisası
və xüsusi hazırlıq kompleksində yaradılan şəraitlə tanış
olan Prezident İlham Əliyevin diqqətinə çatdırıldı ki,
burada xilasetmə, tibbi hazırlıq, dalğıc və alpinist
hazırlığı, siqnalizasiya və digər sahələr üzrə xüsusi
tədris kabinetləri mövcuddur. Bundan əlavə, zəruri
avadanlıqla təchiz edilən laboratoriyalar da tədrisin
yüksək səviyyədə aparılmasına geniş imkanlar açır.
Qeyd olundu ki, tədris prosesi, eləcə də imtahanların
qəbulu kompüter və İnternet texnologiyalarının tətbiqi
ilə həyata keçirilir. Akademiyada tədris prosesi ilə
yanaşı, gənclərin vətənpərvərlik ruhunda tərbiyəsinə
xüsusi diqqət göstərilir. İndiyədək müxtəlif ölkələrin
müvafiq tədris müəssisələri ilə səmərəli əməkdaşlıq
yaradılmışdır. Akademiyanın əməkdaşları və kursantları
bir sıra beynəlxalq konfranslarda və tədbirlərdə iştirak
etmişlər.
Akademiyanın həyətində böyük stadion da inşa edilmiş,
kursantların idmanla məşğul olmaları üçün hər cür şərait
yaradılmışdır.
Prezident İlham Əliyev son vaxtlar alınaraq Fövqəladə
Hallar Nazirliyinin istifadəsinə verilən texnikalara
baxdı.
Sonra dövlətimizin başçısı akademiyada yaradılan Heydər
Əliyev Mərkəzində oldu. Bu mərkəz ulu öndərin zəngin
həyat yolunun səhifələrini vərəqləməyə, Azərbaycan
tarixinin bütöv bir qərinəsinə nəzər salmağa imkan
verir. Ulu öndərin irsinin geniş əks olunduğu bu
mərkəzdə yaradılan şərait, geniş ekspozisiya və
fotoguşələr imkan verəcəkdir ki, akademiyanın
kursantları ümummilli lider Heydər Əliyev irsinə
dərindən yiyələnsinlər. Burada ulu öndərin zəngin
irsinin gələcək nəsillərə çatdırılması üçün virtual
tədris sinfi, kitabxana, ümummilli liderə aid sənədlərin
saxlandığı xüsusi guşə fəaliyyət göstərir.
Prezident İlham Əliyev Fövqəladə Hallar Nazirliyinin
Akademiyasında yaradılan muzeyə də baxdı. Burada
akademiyanın yaranma tarixi və son beş ildə əldə olunan
uğurlar barədə geniş məlumatlar toplanmışdır.
Akademiyanın bayrağı da bu muzeydədir. Xatırladaq ki,
Prezident İlham Əliyev bu ilin martında akademiyanın
bayrağının əsasnaməsi haqqında fərman imzalamışdır.
Daha sonra Prezident İlham Əliyev akademiyanın
kollektivi ilə görüşdü.
Akademiyanın kafedra müdiri Bahar CƏFƏROVA
dövlətimizin başçısına minnətdarlıq edərək dedi:
- Cənab Prezident, akademiyamıza xoş gəlmisiniz. Sizi
görməyimizə çox şadıq. Bu gözəl binanı bizə bəxş
etdiyinizə görə Sizə təşəkkür edirik. Sizin
sərəncamınızla Aydın Qafarov əməkdar elm xadimi adını
almışdır. Mən isə əməkdar müəllim adına layiq
görülmüşəm. Sizə çox minnətdarıq.
***
Mərasim iştirakçılarını salamlayan Prezident İlham
ƏLİYEV dedi:
- Sizi qarşıdan gələn Dünya Azərbaycanlılarının
Həmrəyliyi Günü və Yeni il bayramı münasibətilə təbrik
edirəm. Bayramlar ərəfəsində akademiyanın yeni binasının
açılışını qeyd edirik. Çox gözəl binadır. Ən müasir
avadanlıqlar, trenajorlar quraşdırılıbdır. Yəni, tədris
prosesi üçün bütün şərait yaradılıbdır. Gözəl zövqlə,
keyfiyyətlə tikilibdir. Ümumiyyətlə, Fövqəladə Hallar
Nazirliyinin Akademiyası qısa müddət ərzində gözəl bir
tədris mərkəzinə çevrilibdir. Ümid edirəm ki, biz
gələcəkdə bu akademiyanın bazasında beynəlxalq tədris və
təlim mərkəzi yaradacağıq. Burada mövcud olan imkanlar
bunu deməyə əsas verir. Çünki hesab edirəm ki, bu
bölgədə, yerləşdiyimiz regionda bu akademiyanın əlbəttə,
öz yeri vardır. Əminəm ki, burada təhsil almaq üçün
qonşu ölkələrdən də vətəndaşlar gələcəklər. Bu bazada
əminəm ki, beynəlxalq tədris mərkəzini yarada bilərik.
Əlbəttə ki, burada ilk növbədə xilasedicilərimiz öz
biliklərini artıracaqlar. Gənclər müxtəlif peşələr üzrə
öz ixtisaslarını təmin edəcəklər. Buna böyük ehtiyac
vardır.
Ümumiyyətlə, Fövqəladə Hallar Nazirliyi yaranandan bu
günə qədər böyük bir yol keçmişdir. Ölkə daxilində,
xaricdə böyük işlər görmüşdür. Əfsuslar olsun ki, təbii
fəlakətlər bizdən də yan keçmədi. Həm sel, daşqın, ondan
sonra zəlzələ iqtisadiyyatımıza, insanların yaşayış
səviyyəsinə böyük zərbə vurdu. Ancaq xoşbəxtlikdən nə
daşqın, nə sel, nə də son zəlzələ zamanı heç bir bədbəxt
hadisə, ölüm hadisəsi olmamışdır. Bütün vətəndaşlar
vaxtında müvəqqəti yaşayış yerlərinə köçürülmüşlər.
Ondan sonra əlbəttə ki, gərgin iş başlanmışdır. Çünki
daşqın nəticəsində 10 minlərlə hektar torpaq, minlərlə
ev su altında qalmışdır. Biz qısa müddət ərzində bütün
bu vəziyyətdən əziyyət çəkən insanları yeni evlərlə
təmin etdik. Dövlət hesabına minlərlə yeni ev tikilmiş,
vətəndaşlara pulsuz, hədiyyə kimi verilmişdir. Məktəblər
tikilmişdir. O cümlədən deyə bilərəm ki, biz zəlzələ
zonasında da bir il ərzində əsas işlərin görülməsinə
nail olduq. Ondan sonrakı dövrdə də tamamlama işləri
aparılmışdır.
Bəyan etdiyim kimi, heç bir təbii fəlakət bizi sarsıda
bilməz. Azərbaycan dövləti güclü dövlətdir.
Siyasətimizin mərkəzində Azərbaycan vətəndaşı dayanır.
Bütün bərpa işlərini və evlərin tikintisini Azərbaycan
dövləti öz üzərinə götürüb. Dövlət bütün maliyyə
xərclərini çəkmişdir. Texniki tərəfdən bu işləri
Azərbaycan mütəxəssisləri görmüşlər. Fövqəladə Hallar
Nazirliyinin bu işlərdə böyük rolu olmuşdur. Bu, bir
daha onu göstərir ki, vaxtilə nazirliyin yaradılmasında
böyük məna var idi. Eyni zamanda, bu gün bizim
xilasedicilərimiz xarici ölkələrdə xilasetmə missiyasını
icra edirlər. Bir neçə ölkədə zəlzələ, daşqın, yanğınlar
zamanı bizim qruplarımız xilasetmə işlərində iştirak
etmişlər, yüksək qiymətə layiq görülmüşlər, xarici
ölkələrin yüksək mükafatları ilə təltif edilmişlər. Mən
hesab edirəm ki, bu təcrübə də bizim üçün çox önəmlidir.
Xilasedicilərimiz həm daha çox təcrübə toplayırlar, eyni
zamanda, Azərbaycan bu sahədə də xoş niyyətini göstərir.
Çünki mən dəfələrlə demişəm ki, bizim beynəlxalq
siyasətimiz əməkdaşlıq əsasında qurulur. O cümlədən biz
də çətin vəziyyətdə olan ölkələrə yardım əlimizi
uzatmalıyıq, bunu edirik.
Bütövlükdə bu gün texniki təminat yüksək səviyyədədir.
Son illərdə lazım olan bütün texniki avadanlıq
alınmışdır. Burada quraşdırılan trenajorlar da bunun bir
hissəsidir. Yəni, bu gün texniki təchizatla bağlı heç
bir problem yoxdur. Düzdür, köhnədən bəzi avadanlıq hələ
qalıbdır. Tədricən o da yenilənəcəkdir. Bir sözlə,
Fövqəladə Hallar Nazirliyinin maddi-texniki bazası
möhkəmdir, işçilərin peşəkarlığı artır, tədris prosesi
düzgün təşkil edilibdir. Akademiyanın yeni binası bunu
bir daha göstərir. Əminəm ki, gələcəkdə nazirliyin
funksiyaları ilə bağlı heç bir problem olmayacaqdır.
Bu yaxınlarda nazirliyə əlavə funksiyalar verildi, o
cümlədən strateji obyektlərin mühafizəsi. Xüsusilə,
Mingəçevir və Ceyranbatan su anbarlarının mühafizəsi
nazirliyə tapşırılıbdır. Qısa müddət ərzində bütün
mühafizə tədbirləri görülübdür. Həm müşahidə kameraları,
həm mühafizə sistemi, siqnalizasiya ən müasir səviyyədə
qurulubdur. Yəni, strateji obyektlərimiz lazımi
səviyyədə qorunmalıdır və qorunur. Əminəm ki, gələcəkdə
də nazirliyin əməkdaşları ləyaqətlə işləyəcək, doğma
Vətəninə sədaqətlə xidmət edəcəklər.
Bu gözəl hadisə münasibətilə sizi bir daha təbrik
edirəm.
***
Sonda xatirə şəkli çəkdirildi.
AzərTAc |
