|
Prezident İlham Əliyevin 2013-cü ili Azərbaycan
Respublikasında "İnformasiya-kommunikasiya
texnologiyaları ili" elan etməsi ölkəmizin bu sahədə
doğrudan da son illər çox böyük uğurlar əldə etməsinin
daha bir göstəricisidir. Yenilikçi və çalışqan təhsil
işçilərinin səyləri nəticəsində elektron təhsillə bağlı
yeniliklərin sayı durmadan artır.
Mən də bir yenilikçi pedaqoq kimi Azərbaycanda ilk
olaraq fərdi müəllim saytı - almazhasret.com və onun
ardınca da biologiya sahəsində ilk fənn saytını -
biologiya.org quraraq istifadəyə vermişəm. 2007-ci idən
başlayaraq ölkəmizdə ilk dəfə olaraq Web 2.0 - sosial
servislərin təhsildə tətbiqi və pedaqoji imkanları
barədə işlərimi şəxsi saytımda yerləşdirməyə
başlamışdım. Daha geniş istifadəçi auditoriyasına
çatdırmaqdan ötrü almazhasret.com saytında bütün
işlərimi paylaşırdım ki, təhsillə maraqlanan hər kəs
mənim qazandığım təcrübədən istifadə edə bilsin.
Qurduğum hər iki sayt və dərs nümunələrim 3 dəfə
Azərbaycanda keçirilən "Elektron təhsil" müsabiqəsinin
qalibləri sırasında olmuşdur.
Öncəki illərdə əldə etdiyim təcrübə 2013-cü ildə İKT-nin
təhsilə tətbiqi sahəsində daha böyük uğurlar qazanmağıma
səbəb oldu. Bu il ərzində də qazandığım bütün uğurlarıma
görə valideynlərimə, ailəmə, müəllimlərimə və sonra da
məni əhatə edən yaxşı insanlara minnətdaram. Amma ən
böyük təşəkkürümü cənab Prezidentə çatdırmaq istərdim
ki, mənim kimi yenilikçi müəllimlərin inkişafı üçün
ölkədə hər cür şərait yaradılıb.
Pedaqoji fəaliyyətimə 1996-cı ildə Xətai rayonundakı 204
nömrəli tam orta məktəbdə biologiya müəllimi kimi
başlamışdım. 2008-2009-cu tədris ilində "Ən yaxşı
müəllim" müsabiqəsinin qalibi olmuşam. 2010-cu ildə
biologiya fənn proqramının müəlliflərindən biri oldum,
biologiya fənn kurikulumunun hazırlanması və
dərsliklərin qiymətləndirilməsi işçi qrupunun üzvü,
Azərbaycan Respublikası Təhsil Nazirliyi Təhsil
Sektorunun İnkişafı üzrə İkinci Layihənin məsləhətçisi,
Kurikulum Portalının administratoru və veb-masteri
olmuşam. 2010-2011-ci tədris ilinin X və XI siniflər
üçün "Ümumi biologiya", VII və VIII siniflər üçün
"Zoologiya" dərsliyinin həmmüəllifi olmaqla yanaşı, həm
də 2012-ci ildə məktəbli kitabxanası üçün "Biologiya
lüğəti" kitabının həmmüəllifi olmaq şərəfinə də nail
olmuşam. 2012-ci ildə "Müəllimlər üçün sosial
servislər. Təhsil üçün ən populyar İnternet resursları"
adlı kitab üçün materiallar hazırlamış və həmin kitabın
redaktoru olmuşam.
Dəfələrlə müxtəlif yerli və xarici ölkələrin simpozium,
qurultay, konfrans, seminar və "dəyirmi masa"larında
iştirak edərək müxtəlif diplom və sertifikatlara layiq
görülmüşəm. 2010-cu və 2012-ci illərdə ayrı-ayrı
mövzular üzrə M.V.Lomonosov adına Moskva Dövlət
Universitetinin Moskva Pedaqoji Universiteti ilə
birlikdə təşkil etdiyi uzaqdan təhsil yoluyla
ixtisasartırma kursunu uğurla bitirmişəm.
2010-cu ilin Beynəlxalq Müəllim Günü ərəfəsində
Azərbaycan Respublikasının Prezidenti cənab İlham
Əliyevin sərəncamı ilə "Əməkdar müəllim" fəxri adı
almışam.
2013-cü ildə "İKT ili" çərçivəsində bir neçə uğurlara
nail olmuşam. 28-30 iyun 2011-ci il tarixlərində
M.V.Lomonosov adına Moskva Dövlət Universiteti və
Sankt-Peterburq Dövlət Universitetinin birgə
təşkilatçılığı ilə Moskvada keçirilən biologiya
müəllimlərinin I Ümumrusiya qurultayında Azərbaycandan
yeganə dəvət alımış nümayəndə kimi iştirak etmişəm.
Həmin qurultayda "Biologiyanın tədrisində İKT-nin
tətbiqi" mövzusunda məruzə ilə çıxış edərək sertifikata
layiq görülmüşəm.
2012-ci ildə Azərbaycan Respublikası Təhsil Nazirliyi
Elmi Metodik Şuranın "Biologiya" bölməsinin üzvü
seçilmişəm.
Həmin il Azərbaycan Respublikası Təhsil Nazirliyi Təhsil
Problemləri İnstitutunun fəlsəfə doktoru proqramı üzrə
doktoranturaya qəbul olunmuşam.
Belə ki, bu ilin 9-11 may tarixlərində Türkiyənin Ankara
şəhərində yerləşən Hacəttəpə Universitetində
"Müəllimlərin hazırlanmasında yeni istiqamətlər" adlı
beynəlxalq simpoziuma dəvət almışam. Həmin beynəlxalq
simpoziumda İKT ili ilə əlaqədar mövzu hazırlamış və
təqdimatla çıxış etmişəm.
Bu il "British Council Azerbaijan"ın Facebook
səhifəsində müəllimlər üçün "Keep Calm and..." adlı
yarışma keçirilmişdir. Mən də həmin yarışmaya qatılmış
və nəticədə qalib olaraq növbəti uğurumu əldə etmişəm.
9-10 sentyabr 2013-cü ildə Moskvada Rusiyanın Elm və
Təhsil Nazirliyi ilə Müasir Təlim Texnologiyaları
Mərkəzinin birgə təşəbbüsü çərçivəsində keçirilən
"Xarici ölkələrdə rusdilli məktəblər" adlı beynəlxalq
elmi-praktik konfransa ekspert qismində dəvət almış və
orada Azərbaycanın bu sahə ilə bağlı gördüyü işlər
barədə təqdimatla çıxış etmişəm.
Ən uğurlu nailiyyətlərimdən biri də 2013-cü ilin
sentyabr ayında Almaniyada keçirilmiş konfransda
təhsillə bağlı yaradılan Beynəlxalq Metodik Şuraya
Azərbaycandan ilk üzv seçilməyim olub.
Bütün həmkarlarımı qarşıdan gələn Dünya
Azərbaycanlılarının Həmrəylik Günü və yeni - 2014-cü il
münasibətilə ürəkdən təbrik edir və onlara pedaqoji
fəaliyyətlərində yeni-yeni yaradıcılıq uğurları
arzulayıram!
Almaz HƏSRƏT,
respublikanın əməkdar müəllimi |
