|
 Hörmətli
qurultay nümayəndələri!
Müstəqil Azərbaycan dövlətinin qurucusu və memarı,
Azərbaycan təhsilinin böyük hamisi, ümummilli lider
Heydər Əliyevin xalqımız qarşısında ən böyük
xidmətlərindən biri də Azərbaycan təhsilini himayə
etməsi, təhsilin gələcək inkişaf yollarını
müəyyənləşdirməsidir. Heydər Əliyev şəxsiyyəti
olmasaydı, Azərbaycan təhsili də bugünkü səviyyəyə gəlib
çata bilməzdi.
Ulu öndər Heydər Əliyevin əsasını qoyduğu ənənələr,
bütövlükdə müasir təhsil siyasəti Azərbaycan
Respublikasının Prezidenti cənab İlham Əliyev tərəfindən
uğurla davam etdirilir. Azərbaycan Respublikasının bütün
bölgələrində olduğu kimi, Naxçıvan Muxtar
Respublikasında da ölkə Prezidentinin təhsil sahəsində
müəyyənləşdirdiyi vəzifələr uğurla həyata
keçirilməkdədir.
Son illər Naxçıvan Muxtar Respublikasının şəhər və
kəndlərində 200-dən artıq yüksək keyfiyyətli, dünya
standartlarına cavab verən, yeni avadanlıqlarla təchiz
edilən, kompüter dəstləri və elektron lövhələrlə təmin
olunan təhsil müəssisəsi tikilmiş və əsaslı təmir
olunaraq şagirdlərin istifadəsinə verilmişdir.
Heydər Əliyev Fondu tərəfindən də Naxçıvan Muxtar
Respublikasının rayon mərkəzlərində və ucqar dağ
kəndlərində, ümumilikdə 1072 şagird yerlik müasir
avadanlıqlarla tam təmin olunan məktəblər tikilib
istifadəyə verilmişdir.
Ölkə Prezidenti cənab İlham Əliyev Naxçıvan Muxtar
Respublikasına tarixi səfərləri zamanı təhsil
ocaqlarının açılışında iştirak etmiş, öz tövsiyə və
tapşırıqlarını, xoş arzularını ifadə edərək demişdir:
"Naxçıvanın uğurlu inkişafı məni xüsusilə sevindirir.
Muxtar Respublikanın rayonlarının abadlaşması, yeni-yeni
binaların tikintisi, iş yerlərinin açılması Naxçıvanı
möhkəmləndirir, Naxçıvanın yaşaması üçün bütün
infrastruktur layihələri həyata keçirilir".
Azərbaycan Respublikasının Prezidenti cənab İlham
Əliyevin 21 avqust 2004-cü il tarixli sərəncamı ilə
təsdiq olunmuş "Azərbaycan Respublikasında ümumtəhsil
məktəblərinin informasiya və kommunikasiya
texnologiyaları ilə təminatı Proqramı (2005-2007-ci
illər)"na və 10 iyun 2008-ci il tarixli sərəncamı ilə
təsdiq edilmiş "2008-2012-ci illərdə Azərbaycan
Respublikasında təhsil sisteminin
informasiyalaşdırılması üzrə Dövlət Proqramı"na uyğun
olaraq muxtar respublikanın ümumtəhsil məktəblərində 542
elektron lövhə quraşdırılmış, həp 14 şagirdə bir
kompüter düşməklə 3355 kompüter dəsti verilmiş, bu
kompüterlərin 84 faizi İnternetə qoşulmuşdur.
Naxçıvan Muxtar Respublikasının ümumtəhsil məktəblərində
təhsil alan şagirdlərə 1753282 nüsxə dərslik paylanmış,
ümumtəhsil məktəblərindəki kitabxanalara hədiyyə olaraq
620117 nüsxə bədii ədəbiyyat verilmişdir.
Həyata keçirilən uğurlu təhsil islahatı özünü ali
məktəblərə qəbulda da qabarıq şəkildə göstərir.
2012-2013-cü tədris ilində muxtar respublikanın
ümumtəhsil məktəblərini 4186 nəfər bitirmiş və onlardan
3238 nəfəri ali məktəblərə sənəd vermişdir. İmtahanda
iştirak edən abituriyentlərdən 1677 nəfəri ali
məktəblərə qəbul olmuşdur ki, bu da sənəd verənlərin
51,79 faizi deməkdir. Ali məktəblərə qəbul olanlardan
312 nəfəri 500-700 intervalında bal toplamışdır. Bu da
ötən ilə nisbətən 45 nəfər çoxdur.
Qeyd etmək yerinə düşər ki, 2012-ci ildə ali məktəblərə
qəbulda 500-600 arası bal toplayanlar 197 nəfər idisə,
2013-cü ildə bu göstərici 204 nəfər təşkil etmişdir.
Ötən il 600-700 arası bal toplayan 70 nəfər idisə, bu il
108 nəfər olmuşdur. Keçən il 650-700 arası bal toplayan
17 nəfər idisə, bu il 31 nəfər təşkil etmişdir.
2012-2013-cü tədris ilində orta ixtisas məktəblərinə
qəbul da yüksək səviyyədə aparılmış və ötən ilə nisbətən
irəliləyişlər olmuşdur. 2012-ci ildə 382 nəfər orta
ixtisas məktəblərinə daxil olmuşdusa, 2013-cü ildə 554
nəfər orta ixtisas məktəblərində oxumaq hüququ
qazanmışdır.
Muxtar respublikada hərbi peşəyə maraq ildən-ilə
artmaqdadır. 2013-cü ildə Heydər Əliyev adına hərbi
liseyə 995 nəfər sənəd vermiş, onlardan 257 nəfəri
liseyin kursantları sırasına daxil olmuşdur.
2013-cü ildə 6 nəfər məzun yüksək bal topladığına görə
Prezident təqaüdünə layiq görülmüşdür.
Ötən dərs ilində muxtar respublikada təhsildə yüksək
nəticələrə nail olan 20 şagirdə medal verilmişdisə, bu
il medal alanların sayı 24 nəfər olmuşdur. Həmin
məzunlar onlara göstərilən etimadı doğrultmuş, 3 nəfəri
550-600, 7 nəfəri 600-650, 14 nəfəri isə 650-700
intervalında nəticə göstərmişdir.
Muxtar respublikanın ümumtəhsil məktəblərində müəllim və
şagirdlər üçün vahid forma tətbiq olunur. Məktəbli
formasının tətbiqi tədris müəssisələrində
təlim-tərbiyənin yüksəldilməsinə, şagird intizamının
yüksək səviyyəyə qaldırılmasına, şagirdlər arasında olan
fərqin aradan götürülməsinə müsbət təsir göstərən
amillərdəndir.
Qeyd etmək yerinə düşər ki, muxtar respublikamızın ali
və orta ixtisas məktəblərində də müəllim və tələbə
heyəti üçün vahid forma tətbiq olunur. Bu da orta
ixtisas və ali məktəblərdə tədrisin keyfiyyətinin
yüksəldilməsində və tələbələr arasında intizamın
gücləndirilməsində mühüm rola malikdir.
Pedaqoji kollektivlərin fəaliyyətinin qiymətləndirilməsi
sahəsində həyata keçirilən tədbirlərin nəticəsidir ki,
2012-2013-cü tədris ilində keçirilmiş "Ən yaxşı
ümumtəhsil məktəbi" müsabiqəsinin nəticələrinə uyğun
olaraq Naxçıvan şəhər 10 nömrəli, Şərur şəhər 1 nömrəli
və Ordubad şəhər 3 nömrəli tam orta məktəbləri ölkə
Prezidentinin 6 avqust 2013-cü il tarixli sərəncamı ilə
mükafatlandırılmışlar. Son 6 ildə muxtar respublika üzrə
bu mükafata layiq görülən məktəblərin sayı 18-ə
çatmışdır.
2013-cü ildə muxtar respublikamızın 5 nəfər müəllimi
"Ən yaxşı müəllim" müsabiqəsinin qalibi olmuş və
beləliklə də muxtar respublikamızda həmin müsabiqənin
qaliblərinin sayı ümumilikdə 30-a çatmışdır.
Son 10 ildə Naxçıvan Muxtar Respublikasında təhsilin
inkişafındakı xidmətlərinə görə 54 nəfərə "Azərbaycan
Respublikasının əməkdar müəllimi" fəxri adı verilmiş, 52
nəfər isə "Tərəqqi" medalı ilə təltif edilmişdir. Bu
dövrdə 63 nəfər qabaqcıl təhsil işçisinə "Naxçıvan
Muxtar Respublikasının əməkdar müəllimi" fəxri adı
verilmişdir. 30 avqust 2013-cü il tarixində isə
Azərbaycan Respublikasının Prezidentinin müvafiq
sərəncamı ilə təhsil işçilərinin əməkhaqları
artırılmışdır. Bütün bunlar ölkə Prezidenti cənab İlham
Əliyevin təhsilə göstərdiyi qayğı və diqqətin bariz
nümunəsidir.
Azərbaycan təhsilində gedən keyfiyyət dəyişiklikləri və
ümumtəhsil məktəblərində aparılan yeniliklər, təhsilə
göstərilən ən yüksək dövlət qayğısı təhsil işçilərini
ürəkdən sevindirir, onları Azərbaycan müəllimlərinin XIV
qurultayında qəbul olunacaq qərarları layiqincə yerinə
yetirməyə ruhlandırır.
Hörmətli qurultay nümayəndələri!
Naxçıvan Muxtar Respublikasının təhsil işçiləri bundan
sonra da öz üzərlərinə düşən çətin və şərəfli işin
yerinə yetirilməsində məsuliyyətlərini daha da
artıracaq, vətənimizin çiçəklənməsi və Azərbaycan
xalqının rifahı üçün öz layiqli töhfələrini verəcəklər.
Diqqətinizə görə sağ olun! |
