ARXİV

13 Dekabr 2013 - №48

Beynəlxalq təhsil xəbərləri

MDU 10 ən yaxşı universitet siyahısına düşüb 

M.V.Lomonosov adına Moskva Dövlət Universiteti  dünyanın dinamik inkişaf edən ölkələrin 10 ən yaxşı universitetləri siyahısına düşüb. "Uçitelskaya qazeta"nın yazdığına görə, bunu Böyük Britaniyanın "Times Higher Education" şirkətinin BRICS & Emerging Economies  təşkilatı ilə birgə apardığı tədqiqatların nəticələri söyləməyə əsas verir. 

Reytinq cədvəlinə  Çinin Pekin Universiteti başçılıq edir. Bu ali məktəb "Times Higher Education"un reytinq qiymətləndirməsində  100 mümkün baldan 65 bal toplayıb. İkinci yeri  daha bir Çin ali məktəbi, Sinxua Universiteti qazanıb. O, 63,3 bal toplayıb.  Üçüncü yerdə 50,5 balla Cənubi Afrika Respublikasının Keyptaun Universiteti qərarlaşıb.  BRICS ölkələrinin (Braziliya, Rusiya, Hindistan, Çin, CAR) siyahısında MDU-dan başqa Sankt-Peterburq Dövlət Universiteti də yer əldə edib. Bu universitet 23,7 balla 67-ci yerdə qərarlaşıb. Diqqətəlayiq  haldır ki, 10 ən yaxşı universitet arasında Türkiyənin 3 universiteti  - Boğaziçi Universiteti (5-ci yer- 44,3 bal), İstanbul Texnik Universiteti (7-ci yer-42,7 bal) və Orta Doğu Texnik Universiteti (9-cu yer - 41,5 bal)  təmsil olunur.

"Times Higher Education" şirkəti  BRICS & Emerging Economies təşkilatı ilə ilk dəfədir ki,  bu cür reytinq təşkil edir. Bu reytinq də "Times Higher Education World University Rankings"in metodologiyasına əsaslanır.  Bu metoda əsasən universitetlərin akademik uğurları  13 parametr üzrə 5 kateqoriyada - təhsil, tədqiqatçılıq fəaliyyəti, elmi əsərlərdən sitatgətirmə, gəlir və beynəlxalq aləmdə tutduğu yerə görə qiymətləndirilir. 

Şagird nailiyyətlərinin qiymətləndirilməsi üzrə növbəti hesabat açıqlanıb 

İqtisadi Əməkdaşlıq və İnkişaf Təşkilatı (OECD)   dekabrın 4-də şagird nailiyyətlərinin beynəlxalq qiymətləndirilməsi (PISA) üzrə növbəti  hesabatını açıqlayıb.    2000-ci ildən başlayaraq hər 3 ildən bir  keçirilən PISA qiymətləndirməsində  dünyanın 65 ölkəsindən 15 yaşlı 510 min şagird iştirak edib. Tədqiqata məhz 15 yaşlı uşaqların cəlb olunmasının əsas səbəbi onunla izah olunur ki, bir sıra ölkələrdə bu yaş dövründə məktəblərdə icbari təhsil başa çatır və müxtəlif ölkələrin təhsil proqramlarında ümumi  cəhətlər çoxdur.  Qeyd edək ki, PISA  tədqiqatlarında şagirdlərin riyaziyyat, oxu və təbiət elmləri sahəsində qabiliyyətləri  qiymətləndirilir. Bir sıra ölkələrin  təhsil sistemlərinin vəziyyətini əks etdirən qiymətləndirməyə  Asiya regionu ölkələri  başçılıq edir.  

Kateqoriyalar üzrə ilk onluqda təmsil olunan ölkələr və onların topladıqları ballar aşağıdakı kimidir:

Riyaziyyat üzrə:

1. Şanxay (Çin) - 613; 2. Sinqapur - 573;  3. Honkonq (Çin) - 561; 4. Çin (Taybey)-566; 5.Cənubi Koreya - 554; 6. Makao (Çin)-538; 7.Yaponiya - 536; 8. Lixtenşteyn - 535; 9. İsveçrə-531; 10. Hollandiya - 523.

Oxu üzrə:

1.Şanxay-(Çin)- 570; 2. Honkonq (Çin) - 545; 3. Sinqapur- 542; 4. Yaponiya- 538; 5. Cənubi Koreya -536; 6. Finlandiya - 524; 7. Çin- Taybey-İrlandiya -Kanada - 523; 8. Polşa- 518; 9. Lixtenşteyn-Estoniya - 516; 10.  Avstraliya - Yeni Zelandiya- 512. 

Təbiət elmləri üzrə: 1. Şanxay (Çin)- 580; 2. Honkonq-Çin- 555; 3. Sinqapur -  551; 4. Yaponiya - 547; 5. Finlandiya -545;  6. Estoniya - 541; 7.Cənubi Koreya - 538; 8.Vyetnam- 538; 9. Polşa -526; 10. Kanada və Lixtenşteyn- 525.

Qeyd edək ki, PISA proqramının məqsədi 15 yaşlı uşaqların məktəbdə qazandıqları biliklərin və əldə etdikləri bacarıqların insan həyatının müxtəlif sahələrində, ünsiyyət və sosial münasibətlərdə  həyati  əhəmiyyətli vəzifələrin tətbiqi qabiliyyətinin yoxlanılmasıdır.

PISA (Programme for International Student Assessment) - şagirdlərin təhsil nailiyyətlərinin qiymətləndirilməsi üzrə beynəlxalq proqramdır. Bu proqram dünyanın müxtəlif ölkələrində məktəblilərin savadını  və əldə etdikləri  biliklərin  praktikada tətbiq olunmasını qiymətləndirən testdir.

Britaniyada xarici dilin öyrənilməsi icbari olacaq 

Britaniya Şurasının apardığı tədqiqatların nəticələri göstərib ki, yaşlı britaniyalıların 3/4-ü  xarici dildə danışa bilmir. Hesabatda qeyd olunur ki, yaşlı əhalinin yalnız 1/4-i ingilis dilindən başqa digər xarici dildə elementar danışıq vərdişlərinə malikdir. Ölkədə ən çox yayılmış xarici dil fransız dilidir. Əhalinin yalnız 15 faizi bu dildə, 1/20-i  alman dilində danışa bilir. Digər zəruri dillər, Çin, ərəb və ya yapon dilləri ingilisdilli əhalinin əksəriyyəti üçün yaddır.  Tədqiqatlar göstərib ki, məktəblilər Avropanın digər istənilən ölkəsinə nisbətən xarici dildə nadir hallarda danışırlar. Artıq gələn ildən başlayaraq xarici dilin öyrənilməsi 7-14 yaşlı şagirdlər  üçün icbari olacaq.