|
Dekabrın 6-da Azərbaycanın İndoneziya, Sinqapur,
Filippin və Timor-Lestedəki səfiri Tamerlan Qarayev Bakı
Slavyan Universitetinin (BSU) "Səfir saatı" klubunun
qonağı olmuşdur.
BSU-nun mətbuat xidmətindən AzərTAc-a bildirmişlər ki,
universitetin professor-müəllim heyətinin və tələbələrin
iştirak etdikləri görüşdə bu ali təhsil ocağının
rektoru, AMEA-nın müxbir üzvü Kamal Abdullayev
T.Qarayevin diplomatik fəaliyyətindən danışmışdır. O,
tələbələrin xarici ölkələrin səfirləri ilə yanaşı,
Azərbaycanı xarici ölkələrdə təmsil edən səfirləri ilə
görüşlərinin faydalı olduğunu vurğulamışdır.
Səfir dəvətə görə minnətdarlığını bildirmişdir. Qonaq
indiyədək fəaliyyət göstərdiyi Çin, Hindistan,
Banqladeş, Maldiv adaları, İndoneziya, Filippin,
Sinqapur, Timor-Leste və digər ölkələrlə bağlı
təəssüratlarından, həmin ölkələrlə Azərbaycan arasındakı
çoxşaxəli əlaqələrdən geniş söhbət açmışdır. Diplomat
Sinqapur, İndoneziya və Filippin kimi ölkələrin təhsil
ocaqları ilə BSU arasında əlaqələrin qurulmasının, bu
ölkələrdə fəaliyyət göstərən universitetlərdə Azərbaycan
dili və Mədəniyyəti mərkəzlərinin yaradılmasının
ölkələrarası əlaqələrin möhkəmlənməsinə, xalqımızın
tarixinin, mədəniyyətinin tanınmasında mühüm rol
oynayacağına inandığını söyləmiş, bu istiqamətdə ciddi
addımların atılacağına əminliyini ifadə etmişdir.
Sonda T.Qarayev müəllim və tələbələrin suallarını
cavablandırmış, BSU-nun "Fəxri Qonaqlar Kitabı"na ürək
sözlərini yazmışdır. |
