|
 Dekabrın
9-da Qafqaz Universitetinin mexanika mühəndisliyi
laboratoriyalar kompleksi istifadəyə verilmişdir.
Laboratoriyalar kompleksi bp şirkəti və Qafqaz
Universitetinin birgə layihəsi çərçivəsində bu şirkətin
dəstəyi ilə yaradılmışdır.
AzərTAc xəbər verir ki, müvafiq qurumların
nümayəndələrinin, Milli Məclisin deputatlarının, təhsil
işçilərinin iştirak etdikləri açılış mərasimində Qafqaz
Universitetinin rektoru, professor Əhməd Saniç ulu öndər
Heydər Əliyevin təhsilə daim xüsusi önəm verdiyini,
müdrik rəhbərin ideyalarının Azərbaycan Prezidenti İlham
Əliyev tərəfindən uğurla həyata keçirildiyini
bildirmişdir.
bp şirkəti ilə Qafqaz Universiteti arasındakı
əməkdaşlığın əhəmiyyətini vurğulayan rektor bu
əməkdaşlıq çərçivəsində reallaşdırılan tədbirlərdən
danışmışdır.
Qeyd olunmuşdur ki, bp şirkəti 2009-cu ildə Qafqaz
Universitetinin kimya mühəndisliyi fakültəsinin
yaradılmasına və 2011-ci ildə bu fakültə üçün dünya
səviyyəli 5 laboratoriyanın təşkil olunmasına dəstək
vermişdir. 2011-ci ildə şirkət universitetin mexanika
mühəndisliyi fakültəsini yaratmış və hazırda isə bu
fakültə üçün 11 laboratoriyanın qurulmasına dəstək
göstərmişdir.
Professor Ə.Saniç universitetlərarası əlaqələrin
vacibliyini də diqqətə çatdırmışdır.
bp şirkətinin Azərbaycan, Gürcüstan və Türkiyə üzrə
regional prezidenti Qordon Birrel bildirmişdir ki, dünya
səviyyəli yerli mütəxəssislərin hazırlanması
istiqamətində Azərbaycan Respublikası Dövlət Neft
Şirkəti və Təhsil Nazirliyinin göstərdiyi səylərə dəstək
olmaq üçün onlarla sıx əməkdaşlıq edirik. Hazırlanan
mütəxəssislər Xəzər regionundakı gələcək böyük
layihələrimizə cəlb olunacaqlar.
Qeyd edilmişdir ki, mexanika mühəndisliyi
laboratoriyalar kompleksi üçün 1,3 milyon ABŞ dolları
məbləğində vəsait xərclənmişdir. bp şirkəti indiyədək
universitetə iki fakültənin açılması və
laboratoriyaların qurulması üçün layihələrə, ümumilikdə
2,5 milyon ABŞ dollarından artıq vəsait xərcləmişdir.
Universitetdə müasir tələblərə cavab verən, bacarıqlı
mütəxəssislərin hazırlanacağına əminliyini vurğulayan
Q.Birrel müəllim və tələbələrə təhsildə uğurlar
arzulamışdır.
Azərbaycan Respublikası Dövlət Neft Şirkətinin
prezidenti Rövnəq Abdullayev ümummilli lider Heydər
Əliyev siyasətinin uğurlu nəticələrindən bəhs etmiş, bu
xəttin Azərbaycan Prezidenti İlham Əliyev tərəfindən
əzmlə davam etdirildiyini vurğulamışdır.
Dövlətimizin başçısı İlham Əliyevin təhsil sahəsi ilə
bağlı imzaladığı sənədlərin əhəmiyyətini diqqətə
çatdıran R.Abdullayev "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində azərbaycanlı gənclərin ayrı-ayrı
ölkələrin nüfuzlu universitetlərində oxuduqlarını
söyləmişdir.
Mexanika mühəndisliyi laboratoriyalar kompleksi barədə
fikirlərini diqqətə çatdıran R.Abdullayev, yüksək
ixtisaslı mütəxəssislərin hazırlanmasında onun mühüm
rolu olacağını bildirmişdir.
Təhsil nazirinin müavini Ceyhun Bayramov Azərbaycan
Prezidenti İlham Əliyevin "Azərbaycan Respublikasında
təhsilin inkişafı üzrə Dövlət Strategiyasının təsdiq
edilməsi haqqında" 2013-cü il 24 oktyabr tarixli
Sərəncamının əhəmiyyətindən danışmışdır.
Nazir müavini Qafqaz Universitetində təhsilin inkişafı
üçün reallaşdırılan tədbirlər, qazanılan uğurlar barədə
fikirlərini də diqqətə çatdırmışdır.
Sonra tədbir iştirakçıları ən müasir avadanlıqla təchiz
edilmiş mexanika mühəndisliyi laboratoriyalar kompleksi
ilə tanış olmuşlar. |
