|
Xəzər Universitetinin Hüquq Tədris Mərkəzində insan
hüquqları üzrə 4 aylıq kursların keçirilməsinə
başlanılıb. Qeyd edək ki, bu universitetlə Azərbaycan
Hüquqşünaslar Konfederasiyasının birgə layihəsi olan
mərkəz ABŞ Beynəlxalq İnkişaf Agentliyinin (USAID)
maliyyə dəstəyi ilə təhsil ocağının humanitar və sosial
elmlər fakültəsində yaradılıb.
Təlimin açılışı ilə bağlı təşkil edilən tədbirdəki
çıxışında HTM-in rəhbəri Cabir Xəlilov mərkəzin
fəaliyyəti və həyata keçiriləcək layihə haqqında
ətraflı məlumat verib.
Mərkəzin əlaqələndiricisi Leyla Niyazova təlimlərin
əhəmiyyətindən danışıb.
Bildirilib ki, tədris mərkəzinin fəaliyyəti, əsasən,
cari tədris ilində hüquqşünas tələbələr üçün insan
hüquqları üzrə təlim kurslarının keçirilməsi və vəkil
olmaq istəyən gənc hüquqşünasları imtahanlara
hazırlaşdırmaqdan ibarətdir.
Təlimdə Xəzər Universiteti, Bakı Dövlət Universiteti,
Milli Aviasiya Akademiyası və Azərbaycan Respublikasının
Prezidenti yanında Dövlət İdarəçilik Akademiyasının
tələbələri iştirak edirlər.
"Əsas insan hüquqları və azadlıqları" mövzusunda ilk
təlimi Avropa Şurası Bakı ofisinin proqram
əlaqələndiricisi və Xəzər Universitetinin müəllimi Aynur
Cəfərova aparıb.
Hicran ƏKBƏROVA,
"Azərbaycan müəllimi" |
