|
 1992-ci
il iyunun 5-də Bakıda anadan olmuşam.
1998-2009-cu illərdə Bakıdakı 46 nömrəli tam orta
məktəbdə təhsil almışam. Orta məktəbdə oxuyarkən ən çox
xoşladığım texniki fənlər olub. Məktəb illərində fənn
olimpiadalarının fəal iştirakçısı olmuşam. 2009-2013-cü
illərdə Bakı Dövlət Universitetinin tətbiqi-riyaziyyat
fakültəsində təhsil almışam.
Universiteti bitirdikdən sonra orta məktəbdə riyaziyyat
və informatika fənnini tədris etmişəm. Orta məktəb və
ali təhsil illərində ən böyük arzum gələcəkdə
riyaziyyatçı və kompüter proqramçısı kimi işləmək
olub. 2013-cü ildə "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində Rusiya Federasiyasının ən nüfuzlu
ali təhsil müəssisələrindən hesab olunan Moskva
Fizika-Texnik İnstitutuna (MFTİ) tətbiqi-riyaziyyat və
informatika ixtisası üzrə magistr ixtisasına qəbul
olunmuşam.
"2007-2015-ci illərdə Azərbaycan gənclərinin xaricdə
təhsili üzrə Dövlət Proqramı"nı çox yüksək
qiymətləndirirəm. 2013-2014-cü tədris ili üçün
tələbələrin seçim prosesi çox yüksək səviyyədə təşkil
olunub. Mən də tələbə seçimi prosesinin çox düzgün və
şəffaf keçməsinə inanaraq Təhsil Nazirliyinə müraciət
etdim. Çox şadam ki, ən yaxşı, istedadlı tələbələr
seçilərək xarici ölkələrin ali məktəblərində təhsil
almağa göndərilir. Dövlət proqramı tələbələrimiz üçün
gözəl imkanlar açır. Proqram həm tələbələrin gələcək
həyatı, həm ölkəmizin, həm də təhsilimizin perspektiv
inkişafı baxımından mühüm əhəmiyyət daşıyır.
Təhsil aldığım Moskva Fizika-Texnik İnstitutu Rusiyanın
müasir elm və texnikanın müxtəlif sahələrində yüksək
ixtisaslı, peşəkar mütəxəssis hazırlığını həyata
keçirən ali təhsil müəssisəsidir. Ali təhsil ocağının
tarixi haqqında qısa məlumat vermək istəyirəm. 1946-cı
il noyabrın 25-də Moskva Dövlət Universitetinin nəzdində
fizika-texnik fakültəsi təşkil olunub. 1951-ci il
oktyabrın 1-də isə onun əsasında Moskva Fizika-Texnik
İnstitutu yaradılıb. İnstitutda mütəxəssis hazırlığının
orijinal sistemi yaradılıb. Burada fundamental təhsil,
mühəndislik fənləri, tələbələrin elmi-tədqiqat işləri
bir-birini tamamlayır. Ali məktəbin çox şanlı və
zəngin tarixi var. İnstitutun ilk yaradıcıları və
əməkdaşları, sovet və dünya elminin görkəmli
nümayəndələri, Nobel mükafatı laureatları - Pyotr
Kapitsa, Nikolay Semenov və bakılı Lev Landau olublar.
İnstitutun məzunları arasında da Nobel mükafatına layiq
görülmüş alimlər var. 2010-cu ildə ali məktəbin iki
yetirməsi - Andrey Qeym və Konstantin Novoselov fizika
sahəsində ali elm mükafatına layiq görülüblər.
İnstitutun bir çox professorları ölkənin aparıcı
alimləridir. Onların arasında Rusiya Elmlər
Akademiyasının 80-dən artıq akademiki və müxbir üzvü
var.
Moskvada təhsilimə gəldikdə, deməliyəm ki, universitet
həyatı çox maraqlı və yüksək səviyyədə keçir. Tələbə
həyatı olduqca maraqlı və rəngarəngdir. Boş vaxtlarım
çox azdır, institutumuzda müxtəlif elmi konfranslar
keçirilir. Mən mümkün qədər bu tədbirlərdə iştirak
etməyə çalışıram. Burada mən bir neçə yeni fənləri
öyrənirəm. Əsas ixtisasım "aeromexanika və uçuş
aparatları"dır. Təhsil ocağında çoxsaylı elmi bölmələr
fəaliyyət göstərir. Bu bölmələrdə iştirak etməyə can
atır, boş vaxtlarımda bir sıra proqramlara maraq
göstərir və müəllimlərimin verdiyi müxtəlif layhələr
üzrə tapşırıqları yerinə yetirirəm. Öz müəllimimə elmi
kitabın yazılmasında kömək etmişəm. Moskvadakı
təhsilim çox xoşuma gəlir. Burada oxumaq və olduqca
cəlbedici mövzularda tədqiqatlar aparmaq maraqlıdır.
Biz tələbələrə bir neçə fəndən layihələr təqdim olunur.
Əldə etdiyimiz bilikləri və öyrəndiklərimizi bu
layihələrdə göstərməyə çalışırıq. Moskva Fizika-Texnik
İnstitutunda tələbələrin yüksək səviyyədə təhsil
almaları, səmərəli elmi tədqiqatlarla məşğul olmaları
üçün hər cür imkanlar mövcuddur. Öz vaxtlarını elmə və
təhsilə həsr edən tələbələrin bir çoxu müxtəlif
olimpiadaların fəal iştirakçısıdırlar və elmi
tədqiqatlarda mühüm nailiyyətlər əldə edirlər.
Bu ali məktəb Moskva ətrafındakı Jukovsk şəhərində
yerləşir və Rusiya aviasiyasının elmi mərkəzi hesab
olunur. Bu şəhər çox sakit elm-mədəni bir mərkəz kimi
diqqətimi çəkir. Burada mənim öyrənməli olduğum çox
sahələr var. Bu gün MFTİ müxtəlif sahələr üzrə yüksək
ixtisaslı kadrlar, eyni zamanda gözəl iqtisadçılar,
siyasətçilər, iri müəssisələrin rəhbərlərini
hazırlayır. Bu təhsil ocağının tələbələrinə tez-tez
Amerika, Almaniya, Böyük Britaniya kimi ölkələrin
aparıcı elmi tədqiqat mərkəzlərində öz təcrübələrini
artırmaq imkanı yaradılır. Mənim planlarıma da
təhsilimi Avropa ölkələrində, xüsusən də Almaniyada
davam etdirmək daxildir. Bizim institutda da tələbələr
üçün gələcəkdə ixtisasartıma imkanları mövcuddur. Mən
kompüter proqramçısı olmaq və ya innovasiyalar
texnologiyaları sahəsində işləməyi arzulayıram.
Qeyd edim ki, gələcəkdə xarici ölkələrin ali
məktəblərində, universitetlərində təhsil alan
tələbələrimiz öz uğurları ilə Azərbaycan təhsilini daha
ləyaqətlə təmsil edəcək və ölkəmizin adını daha
yüksəkliklərə qaldıracaqlar. Xarici ölkədən baxdıqda
biz tələbələr Azərbaycanın, Azərbaycan təhsilinin yüksək
inkişafını görürük.
İlahə AĞAYEVA,
Moskva Fizika-Texnik İnstitutunun tələbəsi
|
