|
Ali təhsil müəssisələri hansını seçməlidir?
Hələ sovetlər birliyi dövründən ali təhsil
müəssisələrində "diplom işi" adlanan indiki buraxılış
işi tələbələrin təhsilinin son mərhələsi hesab edilirdi.
Bəzi mütəxəssislərin qənaətinə görə, istiqamət (ixtisas)
üzrə alınan nəzəri və təcrübi biliklərin
sistemləşdirilməsi, möhkəmlənməsi və genişləndirilməsi,
analitik və yaradıcı düşüncənin inkişaf etdirilməsi,
konkret standart məsələlərin həlli vərdişlərinin
aşılanması və digər bacarıqların formalaşmasında
buraxılış işlərinin rolu böyükdür. Bəziləri isə bunu
sovet təhsil sisteminin qalığı hesab edərək formal
xarakter daşıdığını, dünyanın inkişaf etmiş ölkələrinin
təhsil sistemlərində, yeni təhsil modellərində diplom və
buraxılış işləri anlayışlarına rast gəlinmədiyini
bildirirlər. Bolonya təhsil sisteminin prinsiplərinə
əsasən krediti ödəyən tələbənin artıq məzun adı aldığını
əsas götürürlər. Ölkəmizin bir çox ali məktəbləri də
irəli gedərək buraxılış işlərini dövlət imtahanları
ilə əvəz ediblər. Bu məsələlər təhsil müəssisələrinin
səlahiyyətlərində olduğu üçün ali təhsil müəssisələri
hələ də bu qiymətləndirmə formalarından fərqli qaydada
istifadə etməkdədirlər. Mövzu ilə bağlı suallarımıza
aydınlıq gətirmək üçün mütəxəssislərin rəyini öyrənmək
və onların fikirlərini oxuculara çatdırmaq qərarına
gəldik.
Jurnalistika fakültəsində buraxılış işlərinin
yaradıcılıq işləri ilə əvəzlənməsi daha yaxşı olar
 Cahangir
MƏMMƏDLİ,
BDU-nun jurnalistikanın nəzəriyyəsi və təcrübəsi
kafedrasının müdiri, professor
Buraxılış işləri tələbənin 4 il ərzində əldə etdiyi
biliklərin yekun işidir. Əvvəllər buraxılış işləri bizim
üçün çox böyük əhəmiyyətə malik idi. Amma sonralar bu
işlərə bir etinasızlıq yarandı və buraxılış işləri
tələbələr tərəfindən əvvəlki kimi həvəslə yazılmırdı.
Hazırda universitetimizdə tələbələrin qalıq bilikləri və
təhsil aldığı müddətdə hansı bilik və bacarıqlara
yiyələnməsini öyrənmək məqsədilə buraxılış işləri və
yekun buraxılış imtahanından istifadə olunur. Bildiyiniz
kimi, hazırda buraxılış işləri 4 il ərzində yüksək
balla oxuyan tələbələrə verilir. Digər tələbələr isə
yekun buraxılış imtahanı verirlər. Düşünürəm ki,
jurnalistika fakültəsində buraxılış işlərinin əvəzinə
yaradıcılıq işləri olsa daha yaxşı olar. Çünki
jurnalistika sırf yaradıcılıq tələb edir. Mənim yaxşı
xatirimdədir ki, hələ sovetlər birliyi dövründə
İncəsənət Universitetinin tələbələrinin buraxılış
işlərindən ibarət qısametrajlı filmlər və teatr
tamaşaları səhnələşdirilirdi. Məncə, bu praktika bizim
fakültədə də tətbiq olunsa tələbələr üçün daha faydalı
olar. Bununla bağlı universitetin Elmi Şurasına təkliflə
müraciət etməyi planlaşdırmışıq.
Buraxılış işləri, bir qayda olaraq, elmi və ya praktiki
əhəmiyyətə malik olmalıdır. Buraxılış işlərinin
mövzularına gəldikdə isə düşünürəm ki, onlar məzunların
istehsalatla bağlı standart məsələləri elm və texnikanın
müasir tələbləri baxımından təhlil edə bilməsinə, bu
istiqamətə və ya ixtisasa uyğun magistratura
pilləsindəki ixtisaslaşmaya hazır olmağa yönəlməli, eyni
zamanda tələbələrin ali məktəbin bakalavr pilləsində
qazandıqları nəzəri və təcrübi biliklərin həcm və
məzmununa uyğun olmalıdır. Buraxılış işlərinin mövzuları
müvafiq kafedra tərəfindən müəyyənləşdirilir və fakültə
elmi şurasında təsdiq olunur. Bu zaman tələbəyə də mövzu
seçmək hüququ verilir. Lakin həmin mövzu əvvəlcədən
müzakirə və təsdiq üçün kafedraya təqdim olunmalıdır.
Bundan başqa, tələbə buraxılış işinə həvəslə və çox
ciddi şəkildə hazırlanmalıdır. Buraxılış işlərinin
standart olaraq səhifələşdirilməsinin də tərəfdarı
deyiləm. Çünki yaradıcılıqda standart deyilən bir şey
yoxdur. Məsələn, standartlarda 40, 60 səhifə nəzərdə
tutulur. Ancaq ola bilər ki, tələbə 30 səhifəlik bir
buraxılış işində mövzunu tam şəkildə əhatə edər.
Hamımıza məlumdur ki, əvvəllər buraxılış işləri bəzi
tələbələr üçün formal xarakter daşıyırdı. Onlar müxtəlif
vasitələrlə, o cümlədən plagiatlıqdan istifadə edərək
hazırladıqları buraxılış işləri təqdim edirdilər.
Görünür, belə halların qarşısının alınması məqsədilə
hazırda buraxılış işləri hər bir tələbəyə verilmir. Mən
tələbələrə buraxılış işlərindən səmərəli yararlanmağı və
yaradıcılıq işlərinə daha diqqətlə yanaşmağı tövsiyə
edirəm.
Dövlət imtahanı - yekun buraxılış attestasiyası mütləq
olmalıdır
 Əfqan
ABDULLAYEV,
Azərbaycan Dillər Universitetinin dekanı, Senator
Fulbrayt mükafatının iki dəfə qalibi, professor
Bu məsələ bizim hər birimizi düşündürür. Xarici
universitetlərdə olan təcrübəmin əsasında deyə bilərəm
ki, bu yalnız bizim universitetlərin tələbələrinin daha
çox narahatçılığına səbəb olur. Son kurs tələbələrini də
düşündürən məhz budur - dövlət imtahanı (əslində bu
yekun buraxılış dövlət attestasiyasıdır, tələbələrə və
valideynlərə bu termin yeni olduğuna görə biz də dövlət
imtahanı terminindən istifadə edirik) olsun, olmasın?
Tez-tez, bu məsələdən xəbərdar olan da, olmayan da
xarici təhsil sistemlərini misal gətirərək Bolonya
prosesini əldə əsas kimi göstərirlər. Elə isə məsələyə
aydınlıq gətirmək üçün bir çox dünya universitetlərində
bakalavriat təhsil pilləsində tələbələrin dövlət
imtahanının necə keçirilməsini araşdıraq. Birinci
başlayaq Boloniya Bəyannaməsinə qoşulmuş ölkələrin
təcrübəsindən.
Bakalavriat səviyyəsinin ixtisas üzrə təhsil proqramında
bakalavr dərəcəsi almaq üçün 240 kredit
müəyyənləşdirilir. Bu 240 kreditin içində dövlət
imtahanına da kredit ayrılır. Yəni, hazırlanan
mütəxəssisin yekunda aldığı ixtisas üzrə biliklərinin
ümumi yoxlanması nəzərdə tutulur. Çünki hər bir
universitet hazırladığı kadrın keyfiyyətinə cavabdehlik
daşıyır. Ölkə Prezidenti cənab İlham Əliyevin bu
yaxınlarda təsdiq etdiyi Təhsil Strategiyasında da
nəticəyə çox böyük diqqət yetirilir. Amma bu nəticənin
necə yoxlanması universitetin səlahiyyəti daxilində
olmalıdır, yəni universitet özü bu imtahan formasını
müəyyən etməlidir (istiqamətdən, ixtisasdan asılı
olaraq). Dövlət imtahanını bir universitet buraxılış işi
kimi təşkil edə bilər, digəri yazılı imtahan kimi, başqa
birisi isə 4 illik təhsil dövrünün yazılı hesabatı kimi
keçirə bilər (məsələn, Dillər Universitetində təşkil
olunduğu kimi). Tələbələr təhsil aldıqları dövrdə
keçdikləri fənlərin təsvirini, tələbə-universitet
münasibətlərini, tələbəlik həyatının onların həyatında
oynadığı rolu və s. cavablandırırlar. Bu hesabatlar
Yekun Buraxılış Dövlət Attestasiyasını təşkil edən
komissiya tərəfindən qiymətləndirilir və buna görə
tələbəyə 9 kredit verilir.
İndi isə Bolonya Bəyannaməsinə qoşulmuş ölkələrin
bəzilərindən nümunələrə nəzər yetirək. Məsələn,
Almaniyanın 10 ən böyük universitetindən olan
Düisburq-Essen Universitetində bakalavriat təhsili
adətən 3 illik proqramla tamamlanır. Tələbələr son 3 ay
müddətində bakalavr tədqiqat işi (bizim anlamda kurs və
ya bakalavr işi) yazıb tamamlamalıdır. Bu iş tələbənin
müstəqil yaradıcılıq işi hesab olunur və
qiymətləndirilir. Bremendəki Yakobs Universitetində də
bakalavr dərəcəsi 6 semestrə verilir və bütün tələbələr
6-cı semestrdə mütləq bakalavr işini tamamlayıb müdafiə
etməlidirlər.
İsveçdəki Lund Universitetində də bakalavr proqramları 3
ili əhatə edir. Həmin müddətdə tələbə 180 kredit
toplamalıdır və təhsil bakalavr işinin müdafiəsi ilə
qurtarır. Avstraliyanın Kvinsland Universiteti isə 4
illik bakalavr proqramları təklif edir və tələbələr
təhsil pilləsini müstəqil yazılı layihə ilə başa
vurmalıdırlar.
Nəhayət, gələk ABŞ universitetlərinə. Burada həm
mürəkkəb, həm də çox sadə bir təhsil sistemi var. Hətta
ABŞ-da təhsil sistemi haqqında belə bir ifadə var: "ABŞ
təhsil sistemi onun sistemsizliyindədir". Yəni, ABŞ-da
mövcud olan təxminən 4500 universitetin bəlkə də
hamısında təhsil pillələri haqqında özlərinin öz
tələbləri var. Çünki tələbələrə universitetlər öz
diplomlarını verirlər. Ona görə də hər bir universitet
özünün verdiyi diplomun sahibinin professionallıq
səviyyəsindən ötrü dəridən-qabıqdan çıxır. Məsələn,
Konnektikut Universitetində (1881-ci ildən fəaliyyət
göstərir, 31000 tələbə, 14 fakültəsi, 1,9 milyardlıq
büdcəsi var) bakalavr dərəcəsi almaq üçün tələbə 120
kredit (ABŞ kredit transfer sistemi üzrə) toplamalıdır
və bütün fənlər üzrə orta bal 2.0+ (4.0 ballıq
sistemlə) olmalıdır. Heç bir bakalavr layihə işi tələb
olunmur. İldə 3 dəfə tələbələrin universiteti
qurtarmaları haqqında qərarlar çıxarılır, başqa sözlə,
tələbə ilin hansı dövründə diplom tələblərini yerinə
yetirirsə, onda da diplomunu alır. Bu qayda ilə də
universitetlərə tələbə qəbul olunur.
Və nəhayət, təkcə ABŞ-da yox, eləcə də dünya təhsil
sisteminin zirvəsi olan Harvardda bu necə təşkil
olunur? Burada tələbə bakalavr dərəcəsi almaq üçün 128
kredit toplamalıdır və orta bal göstəricisi 2.0+
olmalıdır. Harvardda nəinki universitetin özündə, hətta
fakültələrdə verilən ixtisaslarda belə tələblər
fərqlidir. Məsələn, biomühəndislik ixtisasında
oxuyanlardan kimsə fərqlənmə, ya da daha yüksək
fərqlənmə diplomuna namizəddirsə onlar diplom-kurs işi
yazırlar. Bu başqalarına aid deyil. Diplom işinin də
həcmini heç kim müəyyən etmir. İrəli sürülən
arqumentləri tamamlayana qədər yaza bilərsən.
Mənim fikrimcə, istər bakalavriat, istərsə də
magistratura təhsil pillələri olsun, hər bir təhsil
müəssisəsi dərəcənin verilmə prinsipini, qoyulan
tələbləri özləri müəyyən etsə, daha yaxşı olar. Dövlət
imtahanı - yekun buraxılış attestasiyası isə mütləq
olmalıdır. Amma bunu bir şou kimi hər dəfə tələbəyə
göstərmək lazım deyil. Onsuz da tələbədə bu gün imtahan
sözünə qarşı bir dözülməzlik, bir aqressiya var. İmtahan
sessiyası yaxınlaşanda əksər tələbələrin yuxuları belə
yoxa çıxır. Məhz bu səbəbdəndir ki, bütün semestr
ərzində dərsə həvəslə gələn tələbə imtahana sanki
məhkəmə qərarını gözləyən müttəhim kimi gəlir. Bu işdə
biz müəllimlərin də günahı az deyil. İmtahan ölçmə,
dəyərləndirmə, qiymətləndirmədən daha çox cəzalandırma
vasitəsi olmuşdur. Tələbəni inandırmalıyıq ki, imtahan
onun üçündür və bu da ona imkan verir ki, öz
hazırlığını, bilik-bacarığını dəyərləndirsin.
Diplom işi və attestasiya imtahanı Bolonya prosesində
məcburi şərt deyil 
Ədalət İBADOV,
Qafqaz Universiteti Tədrisin Keyfiyyətinə Nəzarət
Komissiyasının sədri, dosent
Ali məktəblərdə bakalavr təhsilini başa vuran tələbələr,
bir qayda olaraq, bəzi ixtisas fənlərindən dövlət
attestasiyası imtahanında iştirak edirlər və müvəffəq
olanlar diplom alma haqqını əldə edirlər. Bununla
bərabər bəzi universitetlərdə dövlət attestasiyası
"buraxılış işi" formasında da həyata keçirilir. Bəzi
universitetlər bu iki formatı paralel tətbiq
etməkdədirlər. Kreditli təhsil və Bolonya prosesi
əslində ali məktəb tələbələrinin məzun olmaları üçün
müəyyən miqdarda kreditin yığılmasını əsas götürür ki,
bu da 180-240 kredit arasında dəyişir. Bu kreditlər
ayrı-ayrı semestrlərə bölünərək tədris proqramlarında
müəyyən edilir. Bolonya prosesi və kredit sistemi
tələbələrin bu kreditləri hansı dərslərdən əldə
edəcəkləri ilə bağlı qəti bir qayda qoymur. Yəni tətbiq
edilən bu yeni təhsil sistemləri yekunda bir attestasiya
və ya diplom işinin olması şərtini gətirmir. Ancaq hər
universitet (ölkə) bu sistemi tətbiq edərkən tədris
proqramlarında attestasiya imtahanları və ya buraxılış
işləri nəzərdə tutmaqda sərbəstdir. Yalnız bir şərtlə
ki, tələbəyə bu fəaliyyətləri üçün tədris
proqramlarında kreditlər qabaqcadan müəyyən edilmiş
olsun.
Burada bir məqamı təkrar qeyd etməliyəm ki, diplom işi
və ya attestasiya imtahanı Bolonya prosesi və kreditli
sistemin tələbələrin məzun olmasına qoymuş olduğu
məcburi bir şərt deyil. Ancaq ölkəmizdə Nazirlər
Kabineti tərəfindən təsdiq edilmiş təhsil
standartlarında dövlət attestasiyası və ya buraxılış işi
nəzərdə tutulmuş və bunun üçün kreditlər ayrılmışdır.
"Bu gün ali məktəb tələbələrinin məzun olması və diplom
alması üçün belə bir attestasiya keçirilməsinə və ya
buraxılış işi yazmalarının şərt qoyulmasına ehtiyac
varmı" sualına birmənalı yanaşma düzgün deyil. Əvvəla
onu qeyd edim ki, dövlət attestasiya imtahanı bizim
ölkəmizdə universitetlər tərəfindən qabaqcadan müəyyən
edilmiş başlıca ixtisas fənlərindən keçirilir.
Beynəlxalq təcrübədə belə tətbiqə az rast gəlinir. Ancaq
onu da qeyd etmək lazımdır ki, ABŞ və Avropa məkanında
universitetlərin vermiş olduqları tədris ayrı-ayrı
müstəqil qurumlar tərəfindən attestasiyadan keçirilir.
Bu zaman daha çox üstünlük tələbələrin bizdə olduğu kimi
test imtahanları vasitəsi ilə yoxlanılmasına deyil, o
universitetin mövcud proqramından məzun olanların iş
dünyasında yerinə, iş həyatında əldə elədikləri
nailiyyətlərə, əmək bazarında bu məzunlara olan tələbata
və elm sahələrindəki uğurlarına görə verilir. Təbii ki,
belə bir attestasiyanı həyata keçirmək üçün bu gün
ölkəmizdə işəgötürənlərlə universitetlər arasındakı
münasibətlərin fərqli formatda yenidən qurulmasına
ehtiyac var.
Məzun olacaq tələbələrin (hazırda universitetlərimizin
bir çoxunda tətbiq olunduğu kimi) buraxılış işi
yazmaları məsələsinə gəldikdə, deyə bilərəm ki, burada
sahələrə görə fərqli yanaşmalara üstünlük verilməlidir.
Bir universitetdə kütləvi bir formada bütün tələbələrə
diplom işi tətbiq edilməsini və bunun hər il
təkrarlanmasını nəzərə alsaq burada ali məktəblər mövzu
müəyyənləşdirmə, elmi rəhbər təyini, yazılan diplom
işinin keyfiyyəti və s. məqamlar baxımından problemlərlə
üzləşəcəkdir. Beynəlxalq təcrübəyə baxanda da fərqli
yanaşmaların olduğunu görürük. Belə ki, Türkiyə
universitetlərində mühəndislik sahələrində tələbələrdən
buraxılış işi tələb edilir və bu işlər də bir qayda
olaraq praktiki layihələrdən ibarət olur. Yenə Türkiyə
ali məktəblərində pedaqoji kadrların hazırlandığı
fakültələrdə diplom işi tətbiq edilir. İqtisadiyyat,
idarəetmə, mühasibat, maliyyə və s. kimi bir çox sahədə
tələbələr hər hansı bir buraxılış işi və attestasiya
imtahanına girmədən, sadəcə lazımi kreditləri toplayaraq
məzun olurlar. Türkiyədəki bu təcrübə Avropa məkanındakı
təcrübəyə daha yaxındır. ABŞ və İngiltərə kimi ölkələrin
təcrübəsində isə daha fərqli yanaşma mövcuddur. Belə ki,
bu ölkələrdəki universitetlərdə tədris proqramlarında
fərqli ixtisas dərsləri ilə əlaqəli ayrıca tədqiqat
dərsləri də nəzərdə tutulur. Tələbələr hansı dərslə
bağlı tədqiqat aparmaq istəyirsə, o dərsi və müəllimi
seçir. Burada bu tədqiqat dərsi nəticəsinin necə
qiymətləndiriləcəyini tədqiqata rəhbərlik edən müəllim
təyin edir. Yəni nəticədə burada diplom işi də ortaya
qoyula və ya bir imtahan keçirilə bilər. Əhəmiyyətli
olan burada tələbənin məzun olması üçün belə bir dərs
seçmiş olması və bu dərsdən müvəffəqiyyət əldə
etməsidir. Şübhəsiz, bu cür tədqiqat dərslərində iştirak
etməsi, buraxılış işləri və layihələr hazırlaması
tələbələrin araşdıraraq öyrənmə qabiliyyətlərinin
inkişafına kömək edir. Ölkəmizdə tətbiq edilən buraxılış
işi yazma məsələsinə gəldikdə isə onu deməliyəm ki, əgər
universitetlər bu cür bir attestasiya metodu seçirsə,
ilk növbədə, həmin universitetdə tədris proqramlarına
tədqiqat metodları ilə bağlı dərslər daxil edilməlidir.
Bu dərslərdə tələbələrə tədqiqat metodlarını, İnternet
mənbələrini əldə etmə imkanları və mənbələrdən istifadə
qaydaları öyrədilməlidir. Hesab edirəm ki, ancaq bu kimi
qabiliyyətlərə yiyələnmiş bir tələbədən keyfiyyətli
buraxılış işi gözləmək olar. Burada bir məqamı da
vurğulamaq istəyirəm; fikrimcə, tələbəyə buraxılış işi
yazması tələbi qoyularkən, burada tələbə görə yanaşma
da olmalıdır. Yəni, tələbə əgər araşdırma etməkdə
maraqlıdırsa, təhsilini magistr və doktorantura
səviyyələrində davam etdirməyi hədəfləyirsə, yaxud orta
qiyməti müəyyən bir səviyyənin üstündədirsə, belə
tələbələri buraxılış işi yazmaları barəsində
istiqamətləndirmək daha doğru olardı.
Hər bir ali təhsil müəssisəsi öz profilinə uyğun addım
atmalıdır
 Rafiq
SADIQOV,
Azərbaycan Dövlət Mədəniyyət və İncəsənət
Universitetinin tədris işləri üzrə prorektoru,
professor
Düşünürəm ki, bu məsələyə bir çox yanaşma tərzi
mövcuddur. Hər bir ali təhsil müəssisəsi öz profilinə
uyğun olaraq addım atmalıdır. Məsələn, bizim
universitetdə buraxılış işləri mövcuddur və aşağıdakı
istiqamətdə həyata keçirilir. Qabiliyyət tələb edən
ixtisaslarda: -"Aktyor sənəti" üzrə tamaşa, "Rejissor
sənəti" üzrə tamaşa, film, ədəbi-bədii kompozisiya,
"Musiqi " ixtisasları üzrə musiqi proqramları,
"Xoreoqrafiya sənəti" üzrə xalq rəqsləri, balet
tamaşaları, "Rəssamlıq sənəti" üzrə isə rəssamlıq
ixtisaslaşmalarının tələblərinə uyğun olaraq rəsm
əsərləri, portret, qrafik əsərlər, xalça, moda
nümunələri, teatr və kino dekor tərtibatı nümunələri,
qrim sənətinə dair nümunələr və s. nümayiş etdirilir.
Qabiliyyət tələb edən ixtisaslarda buraxılış işləri,
tamaşa, film nümayişi, ifaçılıq sənəti, bədii proqram,
sərgi və s. formalar üzrə dövlət imtahan komissiyası
tərəfindən imtahanlar qəbul edilir. Bu imtahanları
fərqləndirən xüsusi cəhətlərdən biri də odur ki, bəzi
buraxılış işləri tələbə əməkdaşlığı formasında
işlənilir. Hər hansı bir buraxılış işinin
hazırlanmasında tamaşa aktyorluq kursu tərəfindən
hazırlanarkən ora rəssam tələbə, musiqi tərtibatçısı
tələbə, bədii tərtibatçı tələbə, tamaşanın rəyi üçün
teatrşünas tələbə cəlb olunur. Yaxud buraxılış filmi
çəkilərkən filmin ssenarisi ssenarist ixtisası üzrə
tələbə, rejissoru - rejissor ixtisası üzrə tələbə,
aktyoru- aktyor ixtisası üzrə tələbə, operator -
kinooperator üzrə tələbə, musiqi və bədii tərtibatçı
tələbələrdən ibarət olur. Bu zaman kinoşünas tələbənin
də rəyi nəzərə alınır. Beləliklə, bəzi buraxılış
işləri tələbələrin birgə yaradıcılıq zəhməti
nəticəsində hasil olunur.
Universitetin nəzəri ixtisaslarında isə "Kinoşünas,
teatrşünas, ədəbi iş və ekran dramaturgiyası"
ixtisaslarında 50 səhifə həcmində diplom mövzusu
işlənilir. Hər bir müvafiq kafedrada 5-10 illik mövzu
bankı vardır. Bu mövzular kafedranın professor-müəllim
heyəti tərəfindən tərtib və müzakirə olunur. Mövzular
tələbələrə paylanmamışdan qabaq fakültə və böyük elmi
şuralarda müzakirə və təsdiq edilir, sonra tələbələrə
paylanılaraq elmi rəhbərlər təyin olunur. Mövzular
sənətin bu və digər məsələlərinə dair müasir, tarixi,
aktual və elmi xarakter daşıyır. Mövzuların tərtibi
zamanı tələbələrin təklif etdiyi mövzular da müzakirə
edilərək nəzərə alınır. Tələbələrin buraxılış işlərinin
çəkilməsi üçün universitetin daxilində televiziya və
kino, montaj və səsyazma studiyalarında, tədris
teatrında, səhnələşdirilmiş auditoriyalarda şərait
yaradılır. Lazım olan tərzdə çəkiliş üçün tələb olunan
məkan və təşkilatlara müraciətlər edilir, dövlət
teatrlarının səhnələrində, sərgi salonlarında,
telekanallarda bədii səviyyəsi yüksək olan buraxılış
işləri nümayiş etdirilir. Buraxılış işlərinə dövlət
imtahan komissiyası ilə yanaşı Mədəniyyət və Turizm
Nazirliyinin, yaradıcı təşkilatların, kütləvi
informasiya vasitələrinin nümayəndələri dəvət olunur.
Hazırladı: Niyazi RƏHİMOV,
"Azərbaycan müəllimi" |
