|
"Böyük İpək Yolu" Beynəlxalq Gənclər İttifaqının Bakıda
keçirdiyi "Bərabər iştirak üçün birgə qatıl!" adlı
beynəlxalq seminarda iştirak edən xarici ölkələrdən olan
gənclər Şuşa şəhərindən məcburi köçkünlərin
məskunlaşdığı Bakının Ramana qəsəbəsində olublar.
"Azərbaycan Respublikası Dağlıq Qarabağ Bölgəsinin
Azərbaycanlı İcması" İctimai Birliyinin dəstəyi ilə baş
tutan bu görüşdə 10-dan artıq ölkəni təmsil edən gənclər
iştirak ediblər. Şuşa şəhərindən olan məcburi köçkünlər
əcnəbi gənclərlə söhbət zamanı Ermənistanın Azərbaycana
qarşı işğalçılıq siyasətinin acı nəticələrindən
danışıblar. Qonaqlara münaqişə nəticəsində evlərindən
qovulan bir milyondan artıq qaçqın və məcburi köçkün
barədə məlumat verilib.
Macarıstan, Rumıniya, Moldova, Türkiyə, Yunanıstan,
İtaliya, Ukrayna, Gürcüstan, Belarus, Latviya və
Rusiyadan gələn gənclər Şuşadan olan məcburi köçkünlərin
yaşayış səviyyələri ilə maraqlanıblar. Gənclər Dağlıq
Qarabağ münaqişəsinin tezliklə sülh yolu ilə həll
olunmasını arzu ediblər. |
