|
 İ.M.Seçenev
adına Birinci Moskva Dövlət Tibb Universitetində (MDTU)
Heydər Əliyev Fondunun vitse-prezidenti Leyla Əliyevanın
təşəbbüsü ilə 2011-ci ildən həyata keçirilən "Gənclər
QİÇS-ə qarşı" təbliğat kampaniyasının davamı olaraq "İÇV
infeksiyasının profilaktikası" mövzusunda maarifləndirmə
aksiyasına start verilmişdir.
Noyabrın 23-də MDTU-da Rusiya Azərbaycanlı Gənclər
Birliyinin (RAGB), YUNİSEF, "Qırmızı lent" təşkilatı və
MDTU-nun təşkilatçılığı ilə təbliğat aksiyasının
təqdimatı keçirilmişdir. Tədbirdə universitetin
tələbələri və professor-müəllim heyəti iştirak etmişlər.
RAGB-nin idarə heyətinin üzvü, tibb elmləri namizədi
Samir Əliyev AzərTAc-a müsahibəsində bildirmişdir ki,
Heydər Əliyev Fondunun vitse-prezidenti Leyla xanım
Əliyevanın təşəbbüsü ilə keçirilən "İÇV infeksiyasının
profilaktikası" aksiyası QİÇS-lə mübarizəyə dair BMT-nin
"Avropa İÇV test həftəsi" kampaniyası çərçivəsində
gerçəkləşdirilir. İ.M.Seçenev adına Birinci Moskva
Dövlət Tibb Universitetində başlanan aksiya Rusiyanın
digər regionlarında, o cümlədən Vladimir və Kaluqa
vilayətlərində davam etdiriləcəkdir. Aksiyanın sonuncu
tədbiri noyabrın 29-da Azərbaycan Dövlət Tibb
Universitetində keçiriləcəkdir. Aksiya çərçivəsində ali
və orta məktəblərdə mühazirələr oxunacaq,
maarifləndirici broşürlər paylanacaqdır.
İ.M.Seçenev adına Birinci Moskva Dövlət Tibb
Universitetinin beynəlxalq fəaliyyət üzrə prorektoru
P.Litvitski tədbirdə bildirmişdir ki, QİÇS dünyada
sürətlə yayılan xəstəliklərdəndir. Bütün xəstəliklər
kimi, İÇV virusunun da sərhədi yoxdur. P.Litvitski
demişdir: "Düşünürəm ki, gənclərin bu xəstəliyin
profilaktikası və müalicəsi qaydaları ilə tanış edilməsi
olduqca vacib məsələdir".
Tədbirdə iştirak edən 2011-ci il "Rusiya gözəli"
müsabiqəsinin qalibi Natalya Qantimurova cəmiyyətdə
QİÇS/İÇV xəstələrinə tolerant münasibətin
formalaşdırılmasının vacibliyinə diqqəti çəkmişdir. O
vurğulamışdır ki, bu cür tədbirlər cəmiyyətdə QİÇS
probleminin açıq müzakirə olunmasına yol açır.
Tədbirdə iştirakçılara QİÇS-lə mübarizə rəmzi olan
qırmızı lentlər, maarifləndirici broşürlər paylanmışdır. |
