|
Asif Nəbiyev 1978-ci ildə Azərbaycan Dövlət Pedaqoji
Universitetini bitirərək o vaxtdan həyatını müəllimliyə
bağlayıb. 30 ildən artıqdır ki, gənc nəslin
təlim-tərbiyəsi ilə məşğul olan Asif müəllim pedaqogika
üzrə fəlsəfə doktorudur. 20-dən çox metodiki məqalə və
bir metodiki vəsaitin müəllifidir. Bu yaxınlarda onun
"Boloniya sistemi böyük Avropa layihəsidir" adlı kitabı
işıq üzü görüb. Almaniyada Lap lambert nəşriyyatı
tərəfindən ingilis dilində nəşr olunan bu kitabda
müəllif nəzəri təhlil apararaq Boloniya prosesi, onun
hansı zərurətdən yarandığı haqqında fikirlər söyləyib.
Azərbaycanın da qoşulduğu bu təhsil layihəsinin
uğurları, Boloniya sisteminin məqsədləri haqqında
məlumat verilərək, əsas Boloniya prinsipləri ilə bağlı
geniş şərh verilib.
Kitabda kredit sistemi, diploma əlavələrin vahid
forması, təhsilin keyfiyyətinin yüksəldilməsi, ömürboyu
təhsil, Avropa təhsil məkanı və Avropa elm məkanı
haqqında faydalı məlumatlar verilib. Bundan başqa,
müəllif orta məktəblərin Boloniya sistemindən necə
faydalandığı və orta məktəblərdə təhsilin keyfiyyətinin
yüksəldilməsi haqqında fikirlərini bölüşərək qabaqcıl
orta məktəblərin adını da çəkib: Avropa Azərbaycan
məktəbi, Heydər Əliyev adına Müasir Təhsil Kompleksi,
akademik Zərifə Əliyeva adına lisey və s. Azərbaycanda
ilk olaraq Boloniya sisteminə Xəzər və Qafqaz
universitetləri keçiblər. Hazırda Azərbaycanın bütün
universitetlərində iki pilləli təhsilə keçilib,
imtahanlar kredit sistemi əsasında aparılır.
"2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı" uğurla yerinə
yetirilir. Qeyd olunur ki, Azərbaycan hökuməti təhsilin
bütün sahələrində keyfiyyətin artırılmasına diqqət
yetirir. Boloniya sistemində orta təhsilin keyfiyyətinin
yüksəldilməsi nəzərdə tutulub. Son dövrlərdə müasir
tələblərə cavab verən, yeni tipli orta təhsil ocaqları
yaradılıb ki, bunlara nümunə Avropa Azərbaycan
məktəbini, Heydər Əliyev adına Müasir Təhsil
Kompleksini, akademik Zərifə Əliyeva adına liseyi və
Türkiyə Dəyanət Vəqfinin Bakı Türk liseylərini və s.
göstərmək olar.
Yeni kitabının işıq üzü görməsi münasibətilə Asif
Nəbiyevi təbrik edir, ona yaradıcılıq uğurları
arzulayırıq.
Kərim CƏFƏRLİ,
Avropa Azərbaycan məktəbinin riyaziyyat kafedrasının
koordinatoru,
2008 və 2013-cü illərdə "Ən yaxşı müəllim" müsabiqəsinin
qalibi |
