|
Bakı Şəhəri üzrə Təhsil İdarəsi 9 noyabr - Dövlət
Bayrağı Günü münasibətilə elan olunmuş inşa
müsabiqəsinin nəticələrini açıqlayıb. Bununla əlaqədar
Bakı Şəhəri üzrə Təhsil İdarəsinin, KİV
nümayəndələrinin, müsabiqə qaliblərinin iştirakı ilə
Dövlət Bayrağı Meydanında tədbir keçirilib.
Tədbirdə iştirakçılara Dövlət Bayrağı Meydanı haqqında
ətraflı məlumat verilib. Bildirilib ki, Prezident İlham
Əliyev 2007-ci il noyabrın 17-də Bakıda Dövlət Bayrağı
Meydanının yaradılması barədə sərəncam imzalayıb. Hər il
noyabrın 9-u Azərbaycanda Dövlət Bayrağı Günü kimi qeyd
olunur. Nəzərə çatdırılıb ki, Dövlət Bayrağı Meydanının
təməli 2007-ci il dekabrın 30-da Prezident İlham
Əliyevin iştirakı ilə qoyulub. 2010-cu il sentyabrın
1-də isə Azərbaycan Prezidenti, Silahlı Qüvvələrin Ali
Baş Komandanı İlham Əliyevin iştirakı ilə Dövlət Bayrağı
Meydanının təntənəli açılış mərasimi keçirilib. Dünyada
nadir muzeylərdən biri olan Dövlət Bayrağı Muzeyində
müxtəlif kitablar, fotoşəkillər, 1918-1920-ci illərdə
Azərbaycan Xalq Cümhuriyyətinin Türkiyədəki səfirliyinin
binası üzərində dalğalanmış bayraq, həmçinin Ginnes
dünya rekordları təşkilatının Azərbaycanın dövlət
bayrağı dirəyinin dünyada ən hündür bayraq dirəyi
olduğunu təsdiq edən sertifikatı nümayiş olunur.
Buradakı eksponatların çoxu ilk dəfə nümayiş etdirilir.
Muzeydə multimedia qurğusu da vardır. Məlumat verilib
ki, ümumi ərazisi 60 hektar olan meydanda bütün
infrastruktur yaradılıb. Meydanda inşa olunmuş bayraq
dirəyinin hündürlüyü 162 metrdir. Qurğunun ümumi çəkisi
220 tondur. Bayrağın eni 35 metr, uzunluğu 70 metr,
ümumi sahəsi 2450 kvadratmetr, çəkisi isə təqribən 350
kiloqramdır. Meydanda qurulmuş Azərbaycan
Respublikasının gerbi, dövlət himninin mətni və
ölkəmizin xəritəsi qızıl suyuna salınmış bürüncdən
hazırlanmışdır.
Bayraq meydanı ilə tanışlıqdan sonra inşa müsabiqəsi
haqqında iştirakçılara məlumat verən Bakı Şəhəri üzrə
Təhsil İdarəsinin müdir müavini Hüseyn Əsgərov Dövlət
Bayrağı Günü münasibəti ilə tədbir iştirakçılarını
təbrik edib. Bildirilib ki, ölkəmizin hər yerində 9
noyabr - Dövlət Bayrağı Günü böyük təntənə və iftixar
hissi ilə qeyd edilir. Azərbaycan bayrağı tarixin
müxtəlif sınaqlarına baxmayaraq, qədim məmləkətimizi
dünyaya tanıdan rəmzlərdən biridir. Onu qorumaq hər bir
azərbaycanlının borcudur.
Sonra inşa müsabiqəsinin qalibləri mükafatlandırılıb.
Rəşad RAMAZANLI,
"Azərbaycan müəllimi" |
