|
Şəki Regional Debat Mərkəzinin təşkilatçılığı, şəhər
Gənclər və İdman İdarəsinin dəstəyi ilə könüllülük
fəaliyyətinin təşkilinə dair məktəblərarası debat forumu
keçirilib.
AzərTAc xəbər verir ki, şəhər 8 nömrəli tam orta
məktəbdə keçirilən tədbirdə 11 məktəb komandasını təmsil
edən 55 məktəbli iştirak edib.
Forumun açılış mərasimində çıxış edən Şəki Regional
Debat Mərkəzinin rəhbəri Dəyanət Elmansoy ildə bir dəfə
keçirilən tədbirin məktəblilərin intellektual bilik və
bacarıqlarını daha da artırmaq, dünyagörüşlərini
zənginləşdirmək məqsədi daşıdığını diqqətə çatdırıb.
Qeyd edilib ki, mərkəzin qarşısında duran əsas
vəzifələrdən biri də gələcəkdə Şəki Məktəbli Debat
Liqasının yaradılmasına nail olmaqdır.
Komandalar püşkatma əsasında üç mərhələdə yarışaraq öz
intellektual bacarıqlarını nümayiş etdiriblər.
Komandaların çıxışları mərkəzin hakim heyəti tərəfindən
qiymətləndirilib. Finalda şəhər 10 nömrəli tam orta
məktəbin "İrəli" və 14 nömrəli məktəbin "Səbuhi"
komandaları qarşılaşıblar. Hakimlərin rəyinə əsasən
"İrəli" komandası forumun qalibi olub.
Forum finalçılarına şəhadətnamələr, qalib komandaya isə
kubok təqdim edilib. |
