|
Azərbaycan Respublikasının vətəndaşı, Tehran
Universitetinin magistri Səmra İsmayılzadə "Azərbaycanın
qadın şairlərinin təzkirəsi" mövzusunda fars dilində
diplom işi müdafiə edib.
Tarixin uzun zaman kəsiyində öz yaradıcılığı və ictimai
fəallığı ilə seçilən 50 şairənin yaradıcılığını
araşdıran magistr onların müxtəlif şeirlərini fars
dilinə tərcümə edib.
AzərTAc xəbər verir ki, diplom işində Məhsəti Gəncəvi,
Xurşidbanu Natəvan, Mirvarid Dilbazi, Mədinə Gülgün,
Zivər Ağayeva və başqalarının yaradıcılığına müraciət
edən S.İsmayılzadə vurğulayıb ki, Vətənə tükənməz
məhəbbət, şəhidlərimizin ruhuna ehtiram, ata və anaya
sevgi, təlim və təhsilin üstünlüyü, təbiət gözəllikləri
şairələrimizin ən çox toxunduqları mövzulardır.
Azərbaycan və İranın arxiv materiallarından, mötəbər
tarixi mənbələrdən, nadir kitablardan istifadə edən
magistrin fikrincə, onun diplom işi Azərbaycan
ədəbiyyatının inkişafında qadınlarımızın rolunun İranda
təbliği istiqamətində mühüm vəsaitdir. Tədqiqatçı
əsaslandırır ki, Azərbaycan qadını sülh və sabitlik,
tərəqqi və inkişaf tərəfdarı, səxavət və qayğıkeşlik,
düzlük və təmizlik, əxlaq və qeyrət nümunəsidir. |
