|
"Gələcək naminə" Vətəndaş Cəmiyyətinin İnkişafına Dəstək
İctimai Birliyi Azərbaycan Respublikasının Prezidenti
yanında Gənclər Fondunun dəstəyi ilə "İctimai davranış
qaydaları - gəncliyimizin qarantıdır!" adlı layihənin
icrasına başlayıb. Adıçəkilən layihənin məqsədi
regionlarda vətəndaşlar arasında ictimai davranış
qaydalarının təbliği, region gənclərini ətraf aləmə,
cəmiyyətə, insanlığa daha duyarlı və diqqətli olmağa
təşviq etmək, gənclərin ictimai davranış qaydalarının
təbliği sahəsində fəaliyyətlərini dəstəkləmək və
koordinə etmək, region gəncləri ilə paytaxt gəncləri,
həmçinin qeyri-hökumət təşkilatları arasında
əlaqələndirici rolunu oynamaq, regionda yaşayan və
fəaliyyət göstərən xüsusi xidmət orqanlarının
əməkdaşları ilə yerli vətəndaşlar arasında ictimai
yaxınlığı daha da artırmaqdır.
Məlumat üçün bildirək ki, bu layihə Hacıqabul və
Mingəçevirdə icra ediləcək. Hər bir regionda gənclərin
ictimai davranış qaydaları haqqında ətraflı
maarifləndirilməsi üçün görüşlər keçiriləcək.
Layihə müddətində gənclərin iştirakı ilə küçələrdə
ictimai davranış qaydaları mövzusunda müxtəlif problemli
situasiyalar qurulacaq və onların həmin situasiyalarda
iştirakı təmin olunacaqdır. Bundan başqa, layihə
çərçivəsində gənclərdən ibarət qrupun təşkil olunması
nəzərdə tutulur.
Bu qrup vasitəsi ilə ictimai davranış qaydalarının
təbliği daha geniş bir coğrafiyanı əhatə edəcək və
bununla da həmin layihədən faydalanacaq şəxslərin sayı
artacaqdır.
Samirə KƏRİMOVA |
