|
Bakıdakı Osman Mirzəyev adına 190 nömrəli tam orta
məktəbdə aktyorlarla görüş keçirildi. Görüşdə
respublikanın xalq artisti Rafiq Əzimov, əməkdar
artistlərdən Sabir Məmmədov, Mehriban Xanlarova və
əməkdar mədəniyyət işçisi Atabala İsmayıl oğlu iştirak
edirdi. Tədbiri giriş sözü ilə məktəbin direktoru,
əməkdar müəllim Afət Bakıxanova açaraq qonaqları
salamladı və teatr haqqında fikirlərini söylədi.
Məktəbin təlim-tərbiyə işləri üzrə direktor müavini,
pedaqogika üzrə fəlsəfə doktoru, əməkdar müəllim Qənirə
Əmircanova əsası XIX əsrdə M.F.Axundov tərəfindən
qoyulmuş Azərbaycan dramaturgiyasından söz açdı.
Bildirildi ki, yetişən nəslin təlim- tərbiyəsində canlı
ünsiyyət olan teatrın xidmətləri əvəzsizdi.
Tədbirdə çıxış edən respublikanın xalq artisti Rafiq
Əzimov yaradıcılığından söhbət açaraq çəkildiyi
filmlərdən, oynadığı rollardan danışdı. Əməkdar
artistlərdən Sabir Məmmədov, məktəbin məzunu Mehriban
Xanlarova səmimi söhbətləri və onlara ünvanlanmış
suallara cavabları ilə tədbiri daha maraqlı etdilər.
Sonda məktəbin "Təbəssüm" rəqs qrupunun çıxışı və V
sinif şagirdi Əzizəxanımın söylədiyi şeirləri
alqışlarla qarşılandı. Məktəbin direktoru A.Bakıxanova
dəyərli vaxtlarını uşaqlara sərf edib məktəbə gəldikləri
üçün sənət adamlarına təşəkkür edib, işlərində uğurlar
arzuladı.
Leyla MÜRSƏLİYEVA |
