|
 Yeni layihənin eksklüziv görüntüləri ilk dəfə
qəzetimizdə
Son illər respublikamızda aparılan
abadlıq-quruculuq işləri, müxtəlif sahələrdə
infrastrukturların yaxşılaşdırılması
istiqamətində atılan addımlar ictimaiyyət
tərəfindən müsbət qarşılanır. Ölkə Prezidenti
cənab İlham Əliyevin xüsusi diqqət və qayğısı
nəticəsində təhsil müəssisələrinin maddi-texniki
bazası müasir tələblərə uyğun olaraq
gücləndirilir. Bu sahədə atılan addımlardan biri
də respublikamızda öz təhsil ənənələri ilə
tanınan Bakı Dövlət Universitetinin yeni tələbə
şəhərciyinin yaradılmasıdır. Qeyd edək ki,
BDU-nun 100 illik yubileyinə hazırlıq məqsədilə
həyata keçiriləcək tədbirlər planı çərçivəsində
universitetin tələbə şəhərciyi innovativ üsulla
tamamilə yenidən qurulacaq.
Nəzərə çatdıraq ki, ötən əsrin 60-cı illərində
inşa olunan tələbə şəhərciyi artıq istifadəyə
yararsız vəziyyətdədir və müasir tələblərə cavab
vermir. BDU-nun inzibati-təsərrüfat işləri üzrə
prorektoru Nəbi Ramazanlıdan aldığımız məlumatda
bildirilir ki, bu məqsədlə ərazidə 5 yeni
yataqxana
binasının tikilməsi nəzərdə tutulur.
Binaların layihəsi yüksək ixtisaslı
mütəxəssislər tərəfindən universitetin xüsusi
arzu və istəkləri səviyyəsində hazırlanıb.
Təxminən 200 milyon manat dəyərində ehtimal
edilən layihədə tələbələrin rahatlığını təmin
edən hər bir şey nəzərdə tutulub. Layihəyə görə,
şəhərcikdə binaların hündürlüyü həmin ərazinin
relyefindən asılı olaraq dəyişəcək. Yerin
relyefi yüksəldikcə mərtəbələrin sayı azalacaq.
Məsələn, Mətbuat prospekti tərəfdən olan ərazidə
16-17, daha yuxarı qalxdıqca yerin
hündürlüyündən asılı olaraq 14, 13, 12 və s.
mərtəbəli binalar inşa olunacaq. Ən son
hündürlükdə tikiləcək bina 6 mərtəbəli olacaq.
Binalarda Avropa və dünyanın ən qabaqcıl
universitetlərinin tələbə şəhərcikləri
(kampusları) səviyyəsində müasir standartlara
cavab verən bütün şərait yaradılacaq. Hər bir
binada tələbələr üçün yeməkxana, kitabxana,
İnternet şəbəkəsi, mağazalar və s. təşkil
olunacaq. Burada bütün infrastruktur, o cümlədən
ən müasir informasiya və kommunikasiya
texnologiyaları ilə təchizat məsələləri yüksək
səviyyədə olacaq. Şəhərcikdə müasir universal
multimedia taksofonları, genişzolaqlı İnternet
xidmətləri tələbələrin ixtiyarına veriləcək.
Təxminən 6 minə yaxın tələbənin yerləşə biləcəyi
şəhərcikdə xarici tələbələr üçün xüsusi bina
nəzərdə tutulub.
Niyazi RƏHİMOV
|
