|
 Oktyabrın
25-də Azərbaycan Respublikası Təhsil Nazirliyi ilə
Dövlət Neft Şirkəti və "Azərsu" Açıq Səhmdar Cəmiyyəti
arasında ilk peşə-ixtisas təhsili müəssisələrinin
fəaliyyətinin dəstəklənməsi barədə ikitərəfli əməkdaşlıq
memorandumlarının imzalanması mərasimi keçirilmişdir.
Müvafiq memorandumların imzalanması Azərbaycan
iqtisadiyyatının yüksək templə davam edən inkişafına
töhfə vermək, regionların sosial-iqtisadi inkişafı
Dövlət Proqramına müvafiq olaraq əmək bazarının
tələblərinə uyğun ixtisaslı kadr hazırlığı sisteminin
təkmilləşdirilməsini, işəgötürən təşkilatlarla
əlaqələrin möhkəmləndirilməsini təmin etmək məqsədlərinə
xidmət edir. Həmçinin, memorandumlarda peşə təhsili üzrə
təhsilverənlərin və təhsilalanların bilik və
bacarıqlarının artırılması, onların elmi-texniki
yeniliklərə yiyələnməsi istiqamətində birgə tədbirlərin
həyata keçirilməsi və peşə təhsili sisteminin ictimai
statusunun yüksəldilməsi məsələləri əksini tapmışdır.
Tədbiri giriş sözü ilə açan Azərbaycan Respublikasının
təhsil naziri Mikayıl Cabbarov mərasim iştirakçılarını
salamlamışdır. Nazir Təhsil Nazirliyi ilə Dövlət Neft
Şirkəti və "Azərsu" Açıq Səhmdar Cəmiyyəti arasında ilk
peşə-ixtisas təhsili müəssisələrinin fəaliyyətinin
dəstəklənməsi barədə ikitərəfli əməkdaşlıq
memorandumlarının imzalanmasının əhəmiyyətindən bəhs
etmişdir. Təhsil Nazirliyi tərəfindən ilk peşə-ixtisas
təhsili müəssisələrinə qəbul planı müəyyənləşdirilərkən
Dövlət Neft Şirkəti və "Azərsu" Açıq Səhmdar
Cəmiyyətinin ehtiyaclarının nəzərə alınacağını
vurğulayan təhsil naziri əməkdaşlıq çərçivəsində müvafiq
ixtisaslar üzrə tələb olunan peşə təhsili
standartlarının, fənn kurikulumlarının birgə
hazırlanmasının nəzərdə tutulduğunu bildirmişdir.
 Nazir
ilk peşə-ixtisas təhsili müəssisələrinin şagirdləri üçün
istehsalat təcrübəsinin təşkili, onların ödənişli yay
təcrübəsi proqramına qəbul edilməsi, ilk peşə-ixtisas
təhsili müəssisələrində çalışan mühəndis-pedaqoji heyət
üçün müvafiq treninqlərin keçirilməsi məsələlərinin də
nəzərə alındığını söyləmişdir. İlk peşə-ixtisas
təhsilinin nüfuzunun yüksəldilməsi, yeniyetmələrin
texniki peşələrə yiyələnməyə həvəsləndirilməsinin
zəruriliyini bildirən təhsil naziri birgə proqramların
hazırlanması, həyata keçirilməsi, birgə araşdırmaların,
müzakirələrin və debatların təşkili baxımından qarşıda
duran vəzifələr barədə məlumat vermişdir.
Dövlət Neft Şirkətinin prezidenti Rövnəq Abdullayev ilk
peşə-ixtisas təhsili müəssisələrinin fəaliyyətinin
dəstəklənməsi və ehtiyac duyulan ixtisaslar üzrə
kadrların hazırlanması istiqamətində Təhsil Nazirliyi
ilə əməkdaşlığın uğurlu nəticələr verəcəyinə əmin
olduğunu bildirmişdir. Dövlət Neft Şirkətinin prezidenti
qeyd etmişdir ki, Azərbaycan iqtisadiyyatının sürətli
inkişafı nəticəsində ölkəmizin əmək bazarında daha
yüksək səviyyəli və ixtisaslaşmış işçi qüvvəsinə
yaranmış ehtiyacın ödənilməsində müvafiq əməkdaşlıq
münasibətlərinin mühüm rolu vardır.
"Azərsu" Açıq Səhmdar Cəmiyyətinin sədri Qorxmaz
Hüseynov ölkəmizin əksər yaşayış məntəqələrini içməli su
ilə təmin etmək üçün hazırlanmış layihələrin uğurla
həyata keçirildiyini nəzərə çatdırmışdır. Təhsil
Nazirliyi ilə qarşılıqlı əməkdaşlığın peşəkar
kompetensiyalara malik müvafiq mütəxəssislərin
hazırlanması işinə sistemli yanaşmağa imkan verdiyini
vurğulayan "Azərsu" ASC-nin sədri birgə səylərlə qarşıya
qoyulmuş vəzifələrin uğurla yerinə yetiriləcəyinə
əminliyini ifadə etmişdir.
Sonra Azərbaycan Respublikası Təhsil Nazirliyi ilə
Dövlət Neft Şirkəti və "Azərsu" Açıq Səhmdar Cəmiyyəti
arasında ilk peşə-ixtisas təhsili müəssisələrinin
fəaliyyətinin dəstəklənməsi barədə ikitərəfli əməkdaşlıq
memorandumları imzalanmışdır. |
