|
Sumqayıt Dövlət Universitetində
Azərbaycan Respublikasının Dövlət Müstəqilliyi Günü ilə
bağlı tədbir keçirilib. Universitetin rektoru, professor
Nadir Qəhrəmanov çıxış edərək bildirib ki, 22 il öncə
xalqımızın apardığı azadlıq mübarizəsi nəticəsini verdi,
Azərbaycan öz müstəqilliyinə qovuşdu. Ölkəmizin
müstəqillik tarixi barədə danışan rektor deyib ki, bu
tarixi iki dövrə ayırmaq olar: 1991-93-cü illər və
1993-cü ildən sonrakı mərhələ. İkinci mərhələ xalqımızın
dahi lideri Heydər Əliyevin həyata keçirdiyi uğurlu
daxili və xarici siyasət, apardığı islahatlarla
xarakterik olub. Dahi siyasətçinin gördüyü təcili
tədbirlər Azərbaycan xalqını və dövlətini uçurumdan
xilas edib. Sonrakı illərdə ulu öndərin
müəyyənləşdirdiyi və həyata keçirdiyi siyasət
Azərbaycanı güclü dövlətə, regionun liderinə çevirib.
N.Qəhrəmanov vurğulayıb ki, bu günlərdə keçirilən
prezident seçkilərinin nəticəsi isə Azərbaycan xalqının
və dövlətinin növbəti böyük qələbəsi idi.
Sonra universitetin ümumi tarix kafedrasının müdiri,
professor Şirxan Səlimovun və Azərbaycan tarixi
kafedrasının müdiri, dosent Əmirxan İsayevin
Azərbaycanın müstəqillik tarixi ilə bağlı məruzələri
dinlənilib.
***
Azərbaycan Müəllimlər İnstitutunun Qazax filialında
Dövlət Müstəqilliyi Günü qeyd edilib. Tədbirdə
vurğulanıb ki, müstəqilliyi qoruyub saxlamaq onu
qazanmaqdan qat-qat çətindir. Tale elə gətirib ki,
Azərbaycan bir əsrdə iki dəfə müstəqillik əldə etmək,
özünün suveren dövlətini yaratmaq imkanı qazanıb. Bu gün
Azərbaycanın Dövlət Müstəqilliyi Günü - Azərbaycan
tarixinin ən mühüm günlərindən biridir. AMİ-nin Qazax
filialının direktoru, dosent Afaq Qasımova tədbiri giriş
sözü ilə açıb, professor-müəllim və tələbə heyətinin
iştirak etdiyi tədbirdə iştirakçılara videoçarx təqdim
edilib. Tələbələrin çıxışları tədbiri daha da rəngarəng
edib.
***
Bakıdakı 291 nömrəli Ekologiya liseyində
dövlət müstəqilliyinin 22-ci ildönümü ilə əlaqədar
"Müstəqil Azərbaycan - 22" adlı tədbir keçirilib.
Azərbaycan Respublikasının Dövlət himni ilə açılan
tədbirdə valideynlər, liseyin müəllimləri və şagirdlər
iştirak ediblər.
10-cu sinif şagirdi Nərmin Məmmədova Azərbaycanın çağdaş
tarixinə qısa ekskurs edərək Dövlət Müstəqilliyi Günü
ilə bağlı ətraflı məlumat verib. O bildirib ki,
Azərbaycan bir əsrdə iki dəfə müstəqillik əldə etmək,
özünün suveren dövlətini yaratmaq imkanını qazanıb.
Təəssüf ki, 1918-ci ildə qurulmuş Azərbaycan Xalq
Cümhuriyyəti cəmi 23 ay yaşayıb. İkinci tarixi imkan
1991-ci ilin oktyabrında yaranıb və ölkəmiz oktyabrın
18-də müstəqilliyini bərpa etdiyini bütün dünyaya bəyan
edib. Aparıcı vurğulayıb: bu gün onlar xoşbəxtdirlər ki,
müstəqil Azərbaycanda yaşayır və təhsil alırlar.
Sonra səhnə 6-cı sinif şagirdlərinin ixtiyrına
verilib. Onlar vətən haqqında şeirlər söyləyib, milli
geyimdə rəqs ediblər. 7-ci və 9-cu sinif şagirdlərinin
ifasında "Azərbaycan" mahnısı səslənib. Bir-birinin
ardınca ifa olunan musiqi nömrələri tədbirə əsl bayram
əhval-ruhiyyəsi bəxş edib. 7-ci sinif şagirdi
A.Zeynallının özünəməxsus ifasında M.Arazın "Azərbaycan"
şeiri gurultulu alqışlarla qarşılanıb. Tədbirin ən
yaddaqalan məqamlarından biri isə 3-cü sinif şağirdləri
İ.Tağıyeva və M.Qasımlının oynadığı "Azər və Baycan"
səhnəciyi olub.
Sonda liseyin təşkilat işləri üzrə direktor müavini
Z.Qasımova çıxış edərək bildirib ki, müstəqilliyi
qorumaq hər birimizin borcudur. Z.Qasımova bayram
münasibətilə iştirakçıları təbrik edib və tədbirin
ərsəyə gəlməsində zəhməti olanlara minnətdarlığını
bildirib.
***
Bakıdakı T.Heybətov adına 126 nömrəli tam orta məktəbdə
18 oktyabr - Dövlət Müstəqilliyi Günü münasibətilə
tədbir keçirilib. Tədbir iştirakçıları öncə ümummilli
lider Heydər Əliyevin Binəqədi rayonunda yerləşən
əzəmətli heykəli önünə əklil və gül dəstələri düzüb,
xatirəsini ehtiramla yad ediblər.
Tədbirdə çıxış edən məktəbin direktoru Şəmsi Qocayev
ümummilli lider Heydər Əliyevin "Müstəqilliyi qoruyub
saxlamaq onu qazanmaqdan qat-qat çətindir" fikrini
xatırladıb. Bildirib ki, 1918-ci ildə qurulan
Azərbaycan Xalq Cümhuriyyəti cəmi 23 ay yaşadı. İkinci
tarixi imkan bir də 70 il sonra yarandı. Sovet
imperiyasının dağılması Azərbaycan xalqına öz milli
müstəqilliyini bərpa etmək imkanı verdi. 1991-ci il
oktyabrın 18-də Azərbaycan Respublikası Ali Sovetinin
sessiyasında "Azərbaycanın dövlət müstəqilliyi haqqında
Konstitusiya Aktı" qəbul olundu. Bu mühüm tarixi sənədlə
xalqımız uzun illərdən bəri həsrətində olduğu azadlığına
qovuşdu.
Sonra şagirdlər məktəbin kitabxanasında dövlət
müstəqilliyi gününə həsr edilmiş guşə ilə tanış
olublar. Məktəbin tarix müəllimi Elmira Həsənova
tərəfindən şagirdlərə müstəqilliyimiz haqqında ətraflı
məlumat verilib.
Məktəbin VIII "a" sinif şagirdi Səltənət Əliyeva
Azərbaycanın istedadlı şairi Əhməd Cavadın 1914-cü ildə
yazdığı "Çırpınırdı Qara dəniz" şeirinə məşhur
Azərbaycan bəstəkarı Üzeyir Hacıbəyli tərəfindən 1918-ci
ildə bəstələnmiş mahnını ifa edib.
Fəridə Cəfərova, Gülzar Həsənova, Rövşanə Müzəffərli
həmyaşıdlarını Azərbaycanımızın tarixinə səyahətə
səsləyiblər.
Sonda akt zalında "Müstəqillik yollarında" adlı film
nümayiş olunub.
Y.ƏLİYEV |
