|
"Dünyaya baxış" beynəlxalq humanitar təşkilatının
ölkəmizdəki nümayəndəliyi tərəfindən həyata keçirilən
"Əlilliyi olan şəxslərin həyatında müsbət dəyişikliklər"
layihəsi çərçivəsində Azərbaycan Diabet Liqası (ADL)
uzun illər əldə edilən təcrübəni, görülən işlərin
əhəmiyyətliliyini ictimaiyyətə təqdim etmək üçün "Xüsusi
qayğıya ehtiyacı olan uşaq və gənclər üçün istirahət
düşərgələrinin təşkili" mövzusunda tədbir keçirib.
Beynəlxalq Mətbuat Mərkəzində keçirilən tədbirdə dövlət
qurumlarının, qeyri-hökumət təşkilatlarının
nümayəndələri və həkimlər iştirak ediblər.
İlk öncə ADL-ın fəaliyyətindən bəhs edən videoçarx
nümayiş olunub. Milli Qeyri-Hökumət Forumunun səhiyyə
sektorunun rəhbəri Yeganə Sultanova çıxış edərək
bildirib ki, tədbirin keçirilməsində məqsəd
sağlamlıqlarında problemləri olan uşaq və gənclər üçün
xüsusi şəraitli istirahət düşərgələrinin təşkilinin
əhəmiyyətini ictimaiyyətə çatdırmaq və bu istiqamətdə
birgə səylər göstərilməsinə nail olmaqdır. Qeyd edilib
ki, Azərbaycan Diabet Liqası (ADL) 2000-ci ildən xüsusi
qayğıya ehtiyacı olan diabetli uşaqlar və yeniyetmələr
üçün istirahət düşərgələri təşkil edən ilk ictimai
birlikdir. Azərbaycan Respublikasının Səhiyyə
Nazirliyinin Endokrinoloji Mərkəzi bu təşkilatı hər
zaman tibb işçiləri və tibbi ləvazimatlar ilə təmin
edir. ADL 1999-cu və 2001-ci illərdə Türkiyə Diabet
Fondunun və Türkiyə Uşaq və Yeniyetmələr Dərnəyinin
dəvəti ilə təcrübə mübadiləsi üçün bu ölkədə yay
düşərgələrinin təşkilində iştirak edib. 2007-ci ildə
isə ABŞ-ın Ohayo ştatında Klivlend Diabet
Assosiasiyasının təşkil etdiyi daimi düşərgələrin
təşkilində təcrübə toplayıb.
Sağlamlıqlarında problemləri olan uşaq və yeniyetmələrə
xüsusi şəraitli düşərgələrin təşkilinin əhəmiyyətli
olduğunu diqqətə çatdıran Y.Sultanova bildirib ki,
istirahət düşərgələri hər bir uşaq və yeniyetmənin
yaradıcılıq imkanlarını üzə çıxarır, inkişaf etdirir,
yeni sosial münasibətlərin qurulmasını, fərdi maraq və
tələbatlarını təmin edir. Onların cəmiyyətə
inteqrasiyası üçün bu düşərgələrin böyük əhəmiyyəti
vardır.
Tədbirdə "Qeyri-infeksion xroniki xəstəlikləri olan uşaq
və yeniyetmələrin reabilitasiyası üçün istirahət
düşərgələrinin hazırlanması ilə bağlı tövsiyələr" kitabı
iştirakçılara təqdim olunub.
Sifai SƏFƏROVA |
