|
Lənkəran Dövlət Universitetində "Azərbaycanın təhsil
siyasəti: nəticələr və qarşıda duran vəzifələr"
mövzusunda respublika elmi-praktik konfransı keçirildi.
Lənkəran Şəhər İcra Hakimiyyəti, Lənkəran Dövlət
Universiteti və AMEA Lənkəran Regional Elm Mərkəzinin
birgə keçirdiyi konfransı universitetin rektoru,
fizika-riyaziyyat elmləri doktoru, əməkdar elm xadimi,
professor Asəf İsgəndərov açaraq konfransın məqsəd və
vəzifələrindən danışdı.
Azərbaycan Respublikasının Dövlət himni səsləndi.
Sonra universitetin rektoru A.İsgəndərov bildirdi ki,
ümummilli lider Heydər Əliyevin müəyyənləşdirdiyi və
Azərbaycan Prezidenti İlham Əliyev tərəfindən uğurla
davam etdirilən müasir Azərbaycan elmi və təhsili
beynəlxalq təcrübəyə əsaslanaraq inkişaf edir. Qeyd
edilib ki, müstəqillik illərində bir sıra mərhələlərdən
və sınaqlardan keçən Azərbaycan təhsili bu gün yüksək
inkişaf dövrünü yaşayır. Hazırda təhsil sistemi
qarşısında kamil insan və rəqabətə qabil şəxsiyyət
hazırlamaq kimi yüksək tələblər durur.
Lənkəran Rayon Təhsil Şöbəsi müdirinin müavini Güloğlan
Bağırov, Lənkəran Tibb Kollecinin direktoru, tibb
elmləri namizədi İqbal Əmənullayev, Lənkəran Humanitar
Kollecinin direktoru Şaban Şəfiyev, Astara Humanitar
Kollecinin direktoru, fəlsəfə elmləri namizədi Əlihəsən
Həmzəyev, Cəlilabad Rayon Təhsil Şöbəsi metodkabinetinin
müdiri Nadir Babayev, Masallı Rayon Təhsil Şöbəsinin
əməkdaşı Adıgözəl Eminov və başqaları məruzə edərək
Azərbaycanın təhsil siyasətindən, qazanılan uğurlardan,
beynəlxalq təhsil sisteminə inteqrasiya istiqamətində
görülən işlərdən və təhsil islahatları ilə bağlı qarşıda
duran vəzifələrdən danışdılar.
Konfransda ölkədə milli təhsil quruculuğu
strategiyasının uğurla həyata keçirilməsində dövlət
başçısının çoxcəhətli və yorulmaz fəaliyyəti yüksək
qiymətləndirildi.
Qeyd edildi ki, təhsilimiz müasir tələblərə uyğun
qurulmaqla tədrisin keyfiyyəti daha da
yaxşılaşdırılmalıdır. Konfransda həmçinin məktəblərin
maddi-texniki bazasının gücləndirilməsi ilə bağlı
təkliflər səsləndi.
Təkliflərin ümumiləşdirilib müvafiq orqanlara
çatdırılması tövsiyə edildi.
Konfransın sonunda Azərbaycan Respublikasının Prezidenti
cənab İlham Əliyevə müraciət qəbul edildi.
Konfransda respublikamızın müxtəlif ali məktəblərinin,
qonşu rayonların elm, təhsil müəssisələrinin və Lənkəran
ictimaiyyətinin nümayəndələri iştirak edirdilər.
Hacı Etibar ƏHƏDOV,
LDU-nun Mətbuat və informasiya xidmətinin rəhbəri |
