|
Sürətlə inkişaf edən Azərbaycan iqtisadiyyatının
tələblərinə müvafiq olaraq əmək bazarında mütərəqqi
texnologiyaların tətbiq edildiyi sahələr üzrə ixtisaslı
fəhlə kadrlara ehtiyac artmaqdadır.
Belə peşələrdən biri olan "Sənayenin
avtomatlaşdırılması" peşəsi üzrə Azərbaycanda ilk
peşə-ixtisas təhsilinin təşkili və müəllim-usta
hazırlığına dəstək məqsədilə Türkiyənin Milli Təhsil
Nazirliyinin (MEB), Türk Əməkdaşlıq və Koordinasiya
Agentliyi (TİKA) və Yaponiya Beynəlxalq Əməkdaşlıq
Agentliyinin (JICA) maliyyə yardımı ilə 9 nəfər
mühəndis-pedaqoji işçidən ibarət heyət Türkiyəyə yola
düşmüşdür.
Sənaye mərkəzləri Bakı, Sumqayıt və Gəncə şəhərlərində
yerləşən ilk peşə-ixtisas təhsili müəssisələrində
çalışan həmin mühəndis-pedaqoji işçilər İzmir, Kocaeli
və İstanbul şəhərlərində keçiriləcək təlimlərdə iştirak
edəcəklər. 16 sentyabr - 11 oktyabr 2013-cü il
tarixlərində keçiriləcək təlimin iştirakçıları
Azərbaycana döndükdən sonra təlim prosesini distant
formada davam etdirəcəklər. |
