|
Məlum olduğu kimi, hər ilin 21 sentyabr tarixi dünyada
"Beynəlxalq Sülh Günü" kimi qeyd edilir. Ölkəmizdə isə
Azərbaycan Respublikasının İnsan Haqları üzrə
Müvəkkilinin təşəbbüsü ilə Beynəlxalq Sülh Günü
ərəfəsində "Sülh aylığı" keçirilir.
Avqustun 21-dən sentyabrın 21-dək davam edən və artıq
ənənə şəklini almış aylıq çərçivəsində əhalinin hüquq
mədəniyyətinin inkişaf etdirilməsi, sülhün və dözümlülük
mədəniyyətinin, xalqımızın milli mənəvi dəyərlərinin
təbliğinə həsr olunmuş maarifləndirmə tədbirləri təşkil
olunur.
Bölgələrdən aldığımız məlumata görə, bu il də ölkəmizin
təhsil müəssisələrində "Sülh aylığı" ərzində
bir-birindən maraqlı tədbirlər keçirilmiş, onların
təşkili zamanı Təhsil Nazirliyi tərəfindən yerlərə
göndərilmiş 3 sentyabr tarixli tövsiyə məktubu əsas
götürülmüşdür.
Belə ki, "Sülh aylığı" çərçivəsində sülh və insan
hüquqlarına həsr olunmuş "dəyirmi masa"lar, "Dünyanı
sülh xilas edəcək", "Sülh inkişafın təməlidir",
"Gənclərin vətəndaşlıq tərbiyəsində sülh mədəniyyətinin
və insan hüquqlarının təbliğinin rolu", "Azərbaycanın
sülh siyasəti", "Sülh içində yaşa", "Dünyaya sülh", "Biz
sülh istəyirik" və s. mövzularda konfranslar,
ədəbi-bədii gecələr, səhərciklər keçirilmiş,
"Hüquqlarımızı qoruyuruq" devizi altında bədii qiraət,
inşa, rəsm, divar qəzetləri müsabiqələri, hüquq-mühafizə
orqanlarının işçiləri ilə görüşlər, idman yarışları
təşkil olunmuşdur.
Tədbirlərdə dünya sülh hərəkatı, beynəlxalq sülh
hərəkatının görkəmli liderləri, müstəqil Azərbaycan
dövlətinin sülhsevər xarici siyasəti haqqında məlumatlar
verilmiş, dünyada baş verən müharibələrdən, onların
insanlara gətirdiyi fəlakət və bəlalardan, uşaqların
şən, firavan və aydın səma altında yaşaması üçün Yer
üzündə sülhün bərqərar olmasının vacibliyindən söz
açılmışdır.
Ermənistan-Azərbaycan, Dağlıq Qarabağ münaqişəsində
həmvətənlərimizin hüquq və azadlıqlarının kobud şəkildə
pozulması, Ermənistanın Azərbaycana qarşı təcavüzü,
azərbaycanlılara qarşı etnik təmizləmə siyasəti ilə
üzləşən xalqımızın müharibə dəhşətlərini öz taleyində
yaşaması, bu münaqişə nəticəsində kütləvi şəkildə insan
hüquqlarının pozulması, münaqişənin sülh yolu ilə həlli
istiqamətində ölkəmizin və beynəlxalq təşkilatların
səyləri tədbirlərdə xüsusi vurğulanmışdır.
Yusif ƏLİYEV |
