|
Təhsil Nazirliyinin tabeliyində olan internat
məktəblərində, lisey və gimnaziyalarda qidalanmanın
təşkilinin vahid mərkəzdən idarə edilməsinə
başlanılmışdır.
Nazirliyin tabeliyindəki xüsusi internat məktəbləri üçün
(əqli və fiziki qüsurlu uşaqlar, vərəm, revmatizm
xəstəliyi) müvafiq dietik menyular hazırlanmışdır.
Menyulara xəstəliklərin nozoloji formasına, gedişinə,
ağırlıq dərəcəsinə, remissiya və ya residiv dövrlərinə
uyğun fərdi dəyişikliklər edilmişdir. Bundan əlavə, qeyd
olunan bütün təlim-tədris ocaqlarında qidalanma yaş
qrupları, uşaq və yeniyetmələrin üzərinə düşən əqli və
fiziki yükün xüsusiyyətləri, bu müəssisələrdə dərs və iş
rejimi nəzərə alınmaqla təşkil edilmişdir.
Qidalanmanın təşkilinin vahid mərkəzdən idarə edilməsi
beynəlxalq və yerli standartların, sanitar-gigiyenik və
sanitar-epidemioloji tələblərin yerinə yetirilməsini
daim nəzarətdə saxlamaq və baş verən hər hansı bir
çatışmazlığın operativ şəkildə aradan qaldırılması
məqsədlərinə xidmət edir. Rasional və balanslaşdırılmış
qidalanma uşaqların sağlamlığını və harmonik inkişafını
təmin edən vacib və effektiv amillərdən biridir. Düzgün
qidalanma uşaqlarda beyinin, intellektin, mərkəzi sinir
sisteminin inkişafına və formalaşmasına önəmli təsir
göstərir. Uşaq və yeniyetmə yaşlarında düzgün qidalanma
qida maddələrinə olan gündəlik tələbatı ödəməklə yanaşı,
həm də onların hərtərəfli inkişaf ahəngini təmin edir.
Bundan əlavə, uşaq və yeniyetmələr arasında qidalanmanın
düzgün təşkili, yeməkxanaların nəfis dizaynı, süfrə
tərtibatı, xidmətin müvafiq qaydalar çərçivəsində
aparılması, yemək çeşidlərinin müxtəlifliyi və seçim
imkanının yaradılması uşaqların yüksək mədəni-estetik
zövqünün formalaşması baxımından mühüm əhəmiyyət kəsb
edir. Həmçinin qidalanma qaydalarından düzgün istifadə
iştahın artmasına, həzm prosesinin optimallaşmasına,
qidalanma mədəniyyətinin və müvafiq gigiyenik
vərdişlərin yaranmasına gətirib çıxarır. |
