|
Ölkəmizin hər yerində olduğu kimi, Lənkəran Dövlət
Universitetində də yeni dərs ili - Bilik Günü qeyd
edilmişdir.
Universitetin rektoru, fizika-riyaziyyat elmləri
doktoru, əməkdar elm xadimi, professor Asəf İsgəndərov
yeni dərs ilinin başlanması münasibətilə tələbələri
təbrik etmiş, onlara xoş arzularını çatdırmışdır.
Bildirmişdir ki, ümummilli lider Heydər Əliyevin
müəyyənləşdirdiyi və Azərbaycan Respublikasının
Prezidenti İlham Əliyev tərəfindən uğurla davam
etdirilən müasir Azərbaycan elmi və təhsili beynəlxalq
təcrübəyə əsaslanaraq inkişaf edir. Rektor sözünə davam
edərək bildirmişdir ki, müstəqil respublikamızın
yetirməsi olan Lənkəran Dövlət Universiteti bu gün
Azərbaycanın qabaqcıl ali məktəbləri sırasında layiqli
yer tutur.
Qeyd edilmişdir ki, yeni dərs ilində universitetdə 21
ixtisas üzrə 2 minə yaxın tələbə təhsil alacaq. 601
gənc ilk dəfə tələbə kimi universitetə qədəm qoyur.
Bunun 46 nəfəri magistrantdır. Həmçinin qeyd olunmuşdur
ki, hazırda universitetdə 4 fakültə, 11 kafedra
fəaliyyət göstərir. 1997-ci ildən indiyədək ali məktəbi
5 minə yaxın tələbə bitirmişdir. Bu il universitetdə
"Qida məhsulları mühəndisliyi", "Kompüter mühəndisliyi",
"İbtidai sinif müəllimliyi" və "Maliyyə" ixtisasları
açılmışdır.
Deyilmişdir ki, yeni dərs ili ərəfəsində universitetdə
təmir, abadlıq və yenidənqurma işləri aparılmışdır.
İnformatika laboratoriyaları müasir tələblərə uyğun
qurulmuş, universitetin maddi-texniki bazası əsaslı
şəkildə gücləndirilmişdir. Universitetin qazandığı
beynəlxalq qrantlar hesabına müasir elektron şəbəkəsi və
tərcümə mərkəzi açılmışdır.
Lənkəran Ağsaqqallar Şurasının sədri Kamal Kələntərli,
valideynlərdən Ayna Əhmədova, Nəzakət Əliyeva çıxış
edərək tələbələrə elm və təhsildə uğurlar arzulamışlar.
Tələbələr adından çıxış edən, 600-dən yuxarı balla ali
məktəbə daxil olmuş Şəbnur Əlizadə, Ulduz Əliyeva, Jalə
Şəfizadə, yuxarı kurs tələbələrindən magistrant Uğur
Qurbanzadə ürək sözlərini söyləmiş, təhsildə və
universitetin ictimai həyatında fəal iştirak
edəcəklərini bildirmişlər.
Universitetə yüksək balla daxil olanların bir qrupuna
tələbə bileti təqdim edilmişdir. Sonra yuxarı kurs
tələbələri bədii yaradıcılıqlarını nümayiş etdirmişlər.
Tədbirdə Azərbaycan Respublikasının Prezidenti İlham
Əliyevə müraciət qəbul edilmişdir. İştirakçılar dövlət
başçısına elmə və təhsilə göstərdiyi diqqət və qayğıya
görə minnətdarlıqlarını və növbəti prezident
seçkilərində də onu müdafiə edəcəklərini bildirmişlər.
Həmin gün universitetdə birinci kurs tələbələrinin
valideynləri ilə görüş keçirilmişdir. Universitetin
rektoru, professor Asəf İsgəndərov valideynləri
universitetin həyatı ilə tanış etmiş və maraqlandıqları
suallara cavab vermişdir.
Tədbirdə rayonun elm, təhsil müəssisələrinin və
ictimaiyyətin nümayəndələri iştirak etmişlər.
Hacı Etibar ƏHƏDOV,
LDU-nun Mətbuat və informasiya mərkəzinin rəhbəri |
