|
 Avropa
Elmlər Akademiyasının və Latviya Elmlər Akademiyasının
akademiki, "Kompozit Materiallar Mexanikası" beynəlxalq
elmi jurnalının baş redaktoru, Polimerlər Mexanikası
İnstitutunun şöbə müdiri, fizika-riyaziyyat elmləri
doktoru, professor Vitauts P.Tamujs Bakı Pedaqoji
Kadrların İxtisasartırma və Yenidənhazırlanma İnstitutu
rəhbərliyinin dəvəti əsasında 16-19 sentyabr 2013-cü il
tarixlərdə Bakıda səfərdə olmuşdur.
Səfər çərçivəsində akademik V.Tamujs Bakı Pedaqoji
Kadrların İxtisasartırma və Yenidənhazırlanma
İnstitutunun rektoru, professor Asəf Zamanovun müşayiəti
ilə Fəxri xiyabanda ümummilli lider Heydər Əliyevin
abidəsini, akademik Zərifə xanım Əliyevanın məzarını,
həmçinin Şəhidlər xiyabanını ziyarət etdi.
Bakı Pedaqoji Kadrların İxtisasartırma və
Yenidənhazırlanma İnstitutunda Heydər Əliyev
muzey-lektoriyası, Beynəlxalq əlaqələr şöbəsi,
kitabxana, kompüter mərkəzləri ilə tanışlıqdan sonra
akademik V.P.Tamujs ümuminstitut seminarında
professor-müəllim heyəti qarşısında "Kompozit
materiallar: keçmiş, bu gün, gələcək" mövzusunda geniş
məruzə etdi. Latviyalı alim rəhbərlik etdiyi elmi
jurnalla, həmçinin Latviya alimləri ilə institutumuzun
alimlərinin səmərəli əməkdaşlığından məmnunluğunu
bildirdi və kompozit materiallar mexanikasi sahəsində
institutun alimlərinin son illər aldığı elmi nəticələri
yüksək qiymətləndirdi.
Azərbaycan Respublikasının Prezidenti yanında Elmin
İnkişafı Fondunda V.Tamujs, A.Zamanov və fondun icraçı
direktoru E.Babayevin görüşündə Latviyanın Elm üzrə
Şurası, Mexanika üzrə Milli Komitəsi və Elmin İnkişafı
Fondu arasında gələcək əməkdaşlıq məsələləri, həmçinin
Azərbaycan və Latviya alimlərinin elmi layihələrdə birgə
iştirakı məsələləri müzakirə edildi.
Azərbaycan Milli Elmlər Akademiyasının prezidenti,
akademik Akif Əlizadə ilə görüşdə elmin və təhsilin
müxtəlif sahələrinə dair məsələlər müzakirə olundu.
Azərbaycan və Latviyanın elm və təhsil mərkəzləri ilə
ənənəvi əməkdaşlığının son illər uğurlu inkişafından,
elmi potensialın güclənməsi istiqamətində görülmüş
konkret işlərdən, hər iki ölkənin alimlərinin
Azərbaycanda və Latviyada keçirilən beynəlxalq elmi
konfransların Təşkilat Komitəsində səmərəli
fəaliyyətindən razılıq ifadə edildi. Azərbaycanın dövri
elmi jurnallarının beynəlxalq səviyyədə nəşri
məsələləri, Azərbaycan və Latviya elmlər akademiyaları
arasında elm sahəsində əməkdaşlığa dair 2010-cu ildə
imzalanmış müqaviləyə uyğun olaraq gələcək əməkdaşlığın
perspektivləri müzakirə edildi. "Springer"
nəşriyyatının dəstəyi ilə Nyu-Yorkda ingiliscə, Riqada
isə rusca 1965-ci ildən nəşr edilən impakt faktor
göstəricili "Kompozit Materillar Mexanikası" beynəlxalq
elmi jurnalının redaksiya heyətində ABŞ, Almaniya,
Belarus, İsveç, Koreya, Latviya, Qazaxıstan, Rusiya,
Turkiyə və Ukraynanın tanınmış alimləri ilə bərabər
professor Asəf Zamanovun fəaliyyəti yüksək
qiymətləndirildi.
Akademik V.P.Tamujsun AMEA-nın Riyaziyyat və Mexanika
İnstitutunda geniş elmi məruzəsi də səmərəli
müzakirələrlə başa çatdı.
Azərbaycanın mədəniyyət nümunələri ilə tanışlıq qonaqda
böyük təəssürat yaratdı. Qonaq Azərbaycanın, o cümlədən
Bakı şəhərinin dinamik inkişafından, ölkəmizin
beynəlxalq səviyyədə son illərdəki uğurlarından məmnun
olduğunu bildirdi.
Sevinc QULİYEVA,
BPKİYİ Beynəlxalq əlaqələr şöbəsinin müdiri |
