|
 Sentyabrın
16-da Bakı Dövlət Universitetinin nəzdində fəaliyyət
göstərən "Gənc istedadlar" liseyində Bilik Günü
münasibətilə tədbir keçirilmişdir. Tədbirdə BDU-nun
rektoru, akademik Abel Məhərrəmov, liseyin müəllim-şagird
kollektivi, KİV nümayəndələri və valideynlər iştirak
etmişlər. Azərbaycan Respublikasının Dövlət himni
səsləndikdən sonra tədbiri giriş sözü ilə açan BDU-nun
rektoru, akademik Abel Məhərrəmov tədbir iştirakçılarını
bu münasibətlə təbrik edərək liseyin qazandığı
uğurlardan söz açmışdır. Rektor liseyin qısa müddət
ərzində fəaliyyət göstərməsinə baxmayaraq, bir çox
uğurlar qazandığını və liseyi bitirmiş məzunların
hamısının ali məktəblərə daxil olduqlarını, bununla da
BDU-nun adına böyük şərəf gətirdiklərini söyləmişdir.
Liseyi bu il bitirən 39 məzunun hamısının nüfuzlu ali
məktəblərə qəbul olunduğu və onlardan 12 nəfərinin 600-dən,
24 nəfərinin isə 500-dən çox bal topladığı, məzunlardan
7 nəfərinin isə qızıl medala layiq görüldüyü diqqətə
çatdırılmışdır. A.Məhərrəmov "Gənc istedadlar" liseyinin
2012/2013-cü tədris ilində Prezident İlham Əliyevin
imzaladığı sərəncamla "Ən yaxşı ümumtəhsil məktəbi"
müsabiqəsinin qaliblərindən biri olduğunu qeyd etmişdir.
Rektor bu il liseyin 5-ci sinfinə qəbul olmuş
şagirdlərin də yaxşı oxuyacağına, universitetə şərəf
gətirəcəyinə ümid etdiyini bildirmişdir.
Tədbirdə liseyin direktoru, professor Qasım Hüseynov
çıxış edərək müəllim və şagirdləri yeni dərs ilinin
başlanması münasibəti ilə təbrik etmiş, onlara uğurlar
arzulamışdır. Liseyin əldə etdiyi nailiyyətlərdən söz
açan Q.Hüseynov qeyd etmişdir ki, şagirdlər fənn
olimpiadalarının şəhər və respublika turlarında,
müxtəlif müsabiqə və yarışlarda, beynəlxalq
olimpiadalarda liseyin adını şərəflə qoruyaraq bir çox
uğurlara imza atmışlar. Belə ki, liseyin şagirdi Sona
Quluzadə 2012-ci ildə Qazaxıstanın Astana, 2013-cü ildə
isə Özbəkistanın Daşkənd şəhərlərində keçirilmiş
Beynəlxalq Mendeleyev Olimpiadasında bürünc medallara
sahib olmuşdur. Uğurunu davam etdirən S.Quluzadə bu ilin
iyul ayında Rusiyanın Moskva şəhərində keçirilən
Məktəblilərin Ümumdünya Kimya Olimpiadasında da
müvəffəqiyyətlə çıxış edərək bürünc medal qazanmışdır.
Bundan başqa, liseyin 3 şagirdi 2013-cü ilin may ayında
ABŞ-ın Arizona ştatında keçirilən "Sabahın alimləri"
beynəlxalq müsabiqədə respublikamızı təmsil etmişdir.
Liseyin məzunlarının dünyanın bir çox nüfuzlu
universitetlərində, o cümlədən 2 nəfərin Kanadanın
Vaterloo Universitetində, 3 nəfərin Rusiyanın, 8 nəfərin
isə Türkiyənin müxtəlif universitetlərində təhsil aldığı
nəzərə çatdırılmışdır. Liseydə bir çox tədbirlərin
keçirildiyini deyən professor qeyd etmişdir ki,
şagirdlərin yaradıcılıq potensialını inkişaf etdirmək,
onlarda elmə həvəs yaratmaq məqsədilə 2013-cü ilin aprel
ayında liseyin bazasında istedadlı şagirdlərin
respublika elmi konfransı keçirilmişdir.
Valideynlərdən Lamiyə Rəhimova tədbirdə çıxış edərək
5-ci sinfə yüksək balla qəbul olmuş övladının bu
liseydə təhsil alacağından fərəh hissi keçirdiyini və
belə bir təhsil müəssisəsinin yaradılmasında təşəbbüs
göstərmiş akademik Abel Məhərrəmova minnətdarlığını
bildirmişdir.
Tədbirdə şagirdlərin ifasında şeirilər səslənmişdir.
Niyazi RƏHİMOV |
