|
Sentyabrın 13-də Azərbaycan Respublikası Təhsil
Nazirliyi ilə Britaniya Şurası arasında işgüzar görüş
keçirilmişdir.
İkitərəfli görüş zamanı ingilis dilinin tədrisi üzrə
"21-ci əsrin müəllimi" layihəsinin həyata keçirilməsi
ilə bağlı rəsmi sənəd imzalanmışdır. Sənədi təhsil
nazirinin müavini Ceyhun Bayramov və Britaniya Şurasının
ölkə üzrə direktoru xanım Elizabet Vayt imzalamışdır.
Layihə çərçivəsində Azərbaycanın ümumi təhsil
müəssisələrinin ingilis dili müəllimləri tədris
prosesində daha yeni metod və vəsaitlərdən istifadə
imkanlarını öyrənəcək, eyni zamanda maraqlı dərslərin
təşkili üçün lazımi bilik və məlumatlarla təmin
olunacaqlar.
Qeyd edək ki, "21-ci əsrin müəllimi" layihəsi
çərçivəsində ötən illərdə Bakı şəhərində müvafiq iş
həyata keçirilmişdir. Bu il isə ilk dəfə olaraq
müəllim-təlimçilər respublikanın digər rayonlarında da
olacaqlar.
İngilis dili biliklərinin yüksəldilməsi üçün cari ildə
reallaşdırılacaq layihə əvvəlki illərdə həyata
keçirilmiş layihələrdən miqyası və yayılma arealı ilə
kəskin fərqlənəcəkdir. Belə ki, sentyabr ayında start
veriləcək layihəyə 15 rayondan 50 pilot məktəb cəlb
olunacaqdır. Təlimlər Qəbələ, Şəki, Quba, Şamaxı, Gəncə,
Mingəçevir, İsmayıllı, Xaçmaz, Zaqatala, Yevlax, Göyçay,
Şirvan, Lənkəran, Salyan və Qusarla yanaşı, Bakı və
Sumqayıtda da keçiriləcəkdir. Ümumilikdə, 520 müəllim bu
təlimlərdə iştirak edəcəkdir. Layihənin yekununda
ingilis dili müəllimlərinin müasir təlim metodları
sahəsində professional bilik və bacarıqlarının inkişaf
edəcəyi və ingilis dilinin təlim keyfiyyətinin daha da
yüksələcəyi gözlənilir. Layihədə Britaniya Şurasının 24
nəfər müəllim-təlimçisi iştirak edəcəkdir.
Təlim kurslarının sonunda iştirakçılara müvafiq
sertifikatlar təqdim ediləcək. Azərbaycan Respublikası
Təhsil Nazirliyi və Britaniya Şurası bu istiqamətdə
analoji layihələrini bundan sonra da daha geniş miqyasda
davam etdirəcəkdir. |
