|
Sentyabrın 2-də İmişli rayonunda təhsil işçilərinin
ənənəvi konfransı keçirilmişdir. Konfransda rayon təhsil
işçiləri ilə birgə İmişli Rayon İcra Hakimiyyətinin
başçısı Vilyam Hacıyev, Təhsil Nazirliyinin və Təhsil
Problemləri İnstitutunun nümayəndələri, rayonun idarə,
müəssisə rəhbərləri iştirak etmişlər.
Öncə iştirakçılar rayon mərkəzində ulu öndər Heydər
Əliyevin əziz xatirəsinə ucaldılmış abidəni ziyarət
edərək önünə gül dəstələri qoymuşlar.
Tədbiri giriş sözü ilə açan İmişli Rayon Təhsil
Şöbəsinin müdiri, əməkdar müəllim Ramiz Əmirov
"2012-2013-cü dərs ilinin yekunları və qarşıda duran
vəzifələr" mövzusunda geniş məruzə ilə çıxış etmişdir.
Qeyd edilmişdir ki, əsası ümummilli lider Heydər Əliyev
tərəfindən qoyulmuş təhsil sahəsində islahatlar bu gün
ulu öndərin layiqli davamçısı möhtərəm Prezidentimiz
cənab İlham Əliyev tərəfindən uğurla davam etdirilir.
Azərbaycan dünyada siyasi cəhətdən ən stabil ölkələr
sırasına çıxmış, iqtisadi inkişaf sürətinə görə lider
ölkəyə çevrilmiş və nəhayət, ölkəmizdə təhsilin inkişafı
üçün hərtərəfli şərait yaradılmışdır.
Bildirilmişdir ki, hazırda rayonda 63 ümumtəhsil məktəbi
fəaliyyət göstərir. Bu məktəblərdə 15 min 500-ə qədər
şagirdin təlim-tərbiyəsi ilə 1545 müəllim məşğul olur.
Ötən dərs ilində qazanılan bir çox uğurlardan söz açan
R.Əmirov nəzərə çatdırmışdır ki, respublika Prezidenti
cənab İlham Əliyevin sərəncamı ilə bir nəfər - Nurulu
kənd tam orta məktəbinin direktoru Bəşir Məmmədov
"Əməkdar müəllim" fəxri adına layiq görülmüş, şəhər 1
nömrəli məktəb-liseyin müəllimi Rahilə Şükürova və rayon
təhsil şöbəsi metodkabinetinin direktoru Sevdimalı
Hüseynov isə "Azərbaycan Respublikasının qabaqcıl təhsil
işçisi" döş nişanı ilə təltif edilmişlər.
Qeyd edilmişdir ki, ötən tədris ili ərzində rayon
təhsil şöbəsi tərəfindən təhsilin səviyyəsini daha da
yüksəltmək, pedaqoji kollektivlərə kömək etmək üçün
məqsədyönlü tədbirlər həyata keçirilmişdir. Təhsil
müəssisələrində təlim-tərbiyə prosesinin vəziyyətini
öyrənmək məqsədilə monitorinq və reydlər təşkil edilmiş,
müşahidə olunan nöqsanların vaxtında aradan qaldırılması
istiqamətində işlər aparılmışdır. Tədris ili ərzində
əmək intizamı, şagirdlərin məktəbə gündəlik
davamiyyətinin yüksək olması diqqət mərkəzində
saxlanılmış, məktəblərdə müəllimlərin müxtəlif
ixtisaslar üzrə "açıq dərs"lərinin dinlənilməsi təşkil
olunaraq onlara müvafiq təklif və məsləhətlər
verilmişdir.
R.Əmirov qeyd etmişdir ki, Təhsil Nazirliyinin müvafiq
əmrinə əsasən 2013-2014-cü tədris ilində İmişli rayonu
üzrə ümumtəhsil məktəblərinin ibtidai və V-VI
siniflərində dərs deyəcək və indiyədək təlimlərdən
keçməyən müəllimlər üçün fənn kurikulumlarının tətbiqi
üzrə təlim kurslarının təşkilinə ciddi hazırlıq işləri
görülmüşdür. Qazanılan uğurlardan danışan şöbə müdiri
bildirmişdir ki, 2013-cü ildə rayon üzrə respublikanın
dövlət və özəl ali təhsil müəssisələrinə 263 nəfər qəbul
olunmuşdur ki, onların da 205 nəfəri tam orta məktəbləri
2012-2013-cü dərs ilində bitirən məzunlardır. Ali
məktəbə qəbul olanlardan 8 nəfəri 600-dən yuxarı bal
toplamışdır.
Sonra məruzə ətrafında təhsil işçilərinin çıxışları
dinlənilmişdir.
Tədbirdə çıxış edən İmişli Rayon İcra Hakimiyyətinin
başçısı Vilyam Hacıyev konfrans iştirakçılarını yeni
dərs ilinin başlanması münasibətilə təbrik etmiş,
qarşıda duran vəzifələrdən söz açmışdır.
Konfransda rayondan bu il ali məktəblərə yüksək balla
qəbul olunmuş məzunlar qiymətli hədiyyələrlə
mükafatlandırılmışlar.
Niyazi RƏHİMOV |
