|
Xəbər verdiyimiz kimi, bu il iyulun 15-dən 24-dək Rusiya
Federasiyasının paytaxtı Moskva şəhərində 45-ci
Beynəlxalq Kimya Olimpiadası keçirilmişdir.
 Dünyanın
75 ölkəsindən 300 nəfərədək məktəblinin iştirak etdiyi
bu mötəbər bilik yarışmasında ölkəmizi 4 nəfərlik
komanda təmsil etmişdir. Komandamız olimpiadadan 2
medalla qayıtmışdır. Şirvan Özəl Türk Liseyinin şagirdi
Balaqardaş Bəşirov gümüş, Bakı Dövlət Universitetinin
nəzdindəki "Gənc istedadlar" liseyinin şagirdi Sona
Quluzadə isə bürünc medal almışlar. Aşağıda Balaqardaşın
olimpiada ilə bağlı təəssüratını təqdim edirik.
Balaqardaş Bəşirov 1996-cı il avqustun 19-da Salyanda
anadan olmuşdur. Təhsilinə 2001-ci ildə Salyan şəhər
Aşıq Pənah adına 1 nömrəli orta məktəbin I sinfində
başlamışdır. 7-ci sinifdən, yəni 2008-ci ildən təhsilini
Bakı Özəl Türk Liseyinin Şirvan filialında davam
etdirmişdir. Bu il liseydən məzun olmuşdur.
 Balaqardaş
olimpiada təəssüratlarını bizimlə belə paylaşdı:
- Moskvaya ilk qədəmlərimizi qoyduğumuz anda yağış
başladı. Bu artıq Moskva havasının bizim üçün çox da
uyğun olmayacağını göstərirdi. Sonra bizi avtobusla
Moskva Dövlət Universitetinə (MDU-ya) apardılar, orda
qeydiyyatdan keçdik. Yoldakı tıxaclar üzündən otelə gec
çatmağımız bizi qarşıda çətin günlərin gözlədiyini xəbər
verirdi. Növbəti gün açılış mərasimi idi. Etiraf
etməliyəm ki, mərasim çox gözəl keçdi. Mərasimdə MDU-nun
rektoru, akademik Viktor Sadovniçi, Rusiya Federasiyası
təhsil və elm nazirinin müavini V.Kaqanov və başqaları
bizi salamlayıb uğurlar arzuladılar. İyulun 18-də
olimpiadanın ilk praktik turu keçirildi. Praktik
imtahana gedərkən uzun yol keçməyimiz bizə psixoloji
təsir etmişdi, amma bu nəticələrimizdə özünü göstərmədi.
Praktik tur asan olsa da, vaxt limiti mənim 3 sualdan
sonuncusunu bitirə bilməməyimlə nəticələndi. Özü də bu
təkcə mənim başıma gəlməmişdi. Olimpiada
iştirakçılarından soruşduqlarımın hamısı sonuncu
tapşırıqları tam bitirməmişdi. Buna baxmayaraq praktik
tur ümumən yaxşı oldu. Lakin eyni sözləri tam olaraq
nəzəri tur üçün deyə bilmərəm. Çünki bu tur, məncə, daha
yaxşı ola bilərdi. Bir şeyi qeyd etməliyəm ki, həyəcan
hissinin olmaması imtahanda özümü rahat hiss edib
sualları daha yaxşı həll etməyimə imkan verdi. Amma
diqqətsizlik işi korladı. Nəticə olaraq qızıl medalı 0,6
balla əldən verdim və gümüş medal aldım.
Olimpiada imtahanlarındakı nəticələrindən o qədər də
razı qalmayan Balaqardaşa bu mötəbər bilik yarışmasının
imtahanlarından kənar proqramı xoş təsir bağışlamışdır.
O, bu barədə belə dedi:
- Son imtahana (nəzəri) kimi olan gəzintilərimiz əsasən
muzey tipli idi. Belə ki, məşhur "Qızıl meydan"da
Kremldə olduq. Mən daha çox Türkiyə, Türkmənistan,
Qırğızıstan, Qazaxıstan komandalarından olan
iştirakçılarla söhbət edərək vaxtımı keçirirdim. Bu
günlər ərzində ən çox yadımda qalan türkmənistanlı
qardaşlarla birlikdə keçirdiyimiz iftar sürəsi oldu.
Bundan əlavə, özümüzün təşkil etdiyimiz futbol matçı da
əyləncəli oldu. İmtahanlar bitdikdən sonrakı gün oyun
günü idi. Amma insan sayının çox olması və adambaşına
təxminən 10 dəqiqəlik vaxt verilməsi səbəbindən boş
vaxtımız çox qalırdı. Mən bu vaxtın daha əyləncəli
olması üçün rəhbərimiz tərəfindən bizə hədiyyə edilən
1000 parçalıq Puzzle-ı bitirmək üçün lobbidə digər
iştirakçılarla birlikdə çalışdım. Çox əyləncəli alındı
və günün sonunda bitirdikdən sonra bizim haqqımızda
məqalə yazıldı. Son gündə bizi aqua-parka aparacaqdılar.
Mən artıq uzun yoldan yorulduğum üçün oteldə qaldım.
Oteldə velosiped servisi vardı. Neçə illər idi ki,
velosiped sürmürdüm. Buna görə məhz elə günümü belə
keçirməyi qərara aldım. Yeni zelandiyalı iştirakçı
Cindy-nin mənə qoşulması maraqlı oldu. Günün qalan
hissəsini də oteldə qalmış iştirakçılarla oyun oynamaqla
keçirdim.
 Ümumi
olaraq 9 günlük olimpiadanın sadəcə 10 saatı imtahan
idi. Amma bizim olimpiadaya getməkdə məqsədimiz elə bu
10 saatdır. Ümid edirəm ki, müəllimlərimiz tərəfindən
bizim üzərimizdə çəkilən zəhmətin, az da olsa, bir
qismini ödəmişik.
Olimpiadadan ayrılarkən vidadaşmaq nə qədər çətin olsa
da, olimpiada ilə bizi dost saxlayan elə bu son
vidalaşma mərasimidir.
Bizim üçün maraqlı bağlanış mərasimi təşkil olunmuşdu.
Mərasimdə olimpiadanın təşkilatçıları qalibləri təbrik
etdilər, maraqlı konsert proqramı nümayiş olundu.
Sonda onu da qeyd edək ki, bu il Moskvada keçirilmiş
45-ci Beynəlxalq Kimya Olimpiadasında əldə etdiyi gümüş
medal Balaqardaşın yeganə mükafatı deyildir. Onun son
illər belə mükafatları çox olmuşdur. Belə ki, Balaqardaş
2010-cu ildə Nigeriyada keçirilən Beynəlxalq Təbiət
Elmləri Olimpiadasında (İJSO) bürünc, 2011-ci ildə
Cənubi Afrika Respublikasında keçirilən Beynəlxalq
Təbiət Elmləri Olimpiadasında (İJSO) gümüş medal
almışdır. O həm də ənənəvi keçirilən Beynəlxalq
Mendeleyev Olimpiadasının bürünc və gümüş
mükafatçısıdır. Bürünc medalı 2012-ci ildə Qazaxıstanda
keçirilən BMO-da, gümüş medalı isə bu ilin aprelində
keçirilən olimpiadada almışdır.
İstedadlı gənc ötənilki Beynəlxalq Kimya Olimpiadasında
da uğurla iştirak edərək ABŞ-da keçirilən bu mötəbər
yarışmadan bürünc medalla qayıtmışdır.
B.Bəşirovun ən böyük uğuru isə 2012-ci ildə Nigeriyada
keçirilən III Beynəlxalq Fənn Olimpiadasında (İSO)
olmuşdur. Həmin bilik yarışmasından o, qızıl medal
almışdır.
Yusif ƏLİYEV |
