|
Bu günlərdə Azərbaycan Tələbə Gənclər Təşkilatları
İttifaqında "Tələbələrarası birinci tərcümə festivalı"
layihəsinin qaliblərinin mükafatlandırılması mərasimi
keçirilmişdir.
Qeyd edək ki, adıçəkilən layihə Azərbaycan Tələbə
Gənclər Təşkilatları İttifaqı tərəfindən
tercumefestivali.com saytı vasitəsilə
reallaşdırılmışdır.
Tədbirdə məlumat verilmişdir ki, layihənin ilk
mərhələsində respublikanın ali təhsil müəssisələrində
müxtəlif ixtisaslar üzrə təhsil alan 580-dək tələbə
iştirak etmişdir. Birinci mərhələdə iştirakçılar
münsiflər heyəti tərəfindən hazırlanmış mətn parçasını
ingilis dilindən Azərbaycan dilinə tərcümə etmişlər. Bu
mərhələdə uğur qazanmış 57 tələbə növbəti - sinxron
tərcümə mərhələsində iştirak etmək hüququ qazanmışdır.
Nəticələrə əsasən, Azərbaycan Dövlət İqtisad
Universitetinin tələbəsi Günay Miriyeva I, Qafqaz
Universitetinin tələbəsi Sevinc Babayeva II, Azərbaycan
Respublikasının Prezidenti yanında Dövlət İdarəçilik
Akademiyasının tələbəsi Sərxan Sabirli isə III yerlərə
layiq görülmüşlər.
Mərasimin sonunda qaliblərə diplom və qiymətli
hədiyyələr təqdim olunmuşdur.
Samirə KƏRİMOVA |
