|
Hər birimiz ömür boyu müxtəlif kollektivlərlə birlikdə
çalışırıq. Necə olur ki, fərqli xarakterli insanlarla
asanlıqla dil tapa, uyğunlaşa bilirik? Çünki bunu bizə
uşaqlıqdan, hətta körpəlikdən aşılayırlar. Harada? Təbii
ki, getdiyimiz uşaq bağçalarında...
Uşaqlar ilk həyat məktəbində çox şey öyrənirlər. Sözün
həqiqi mənasında, ayaq üstə durmağı, dostluğu bölüşməyi,
bir-birinə dayaq olmağı, ünsiyyət mədəniyyətini,
vətən-valideyn-müəllim sevgisini... Elə təhsilin ilkin
təməli də burada qoyulur. Buraya körpə kimi daxil olub
məktəb həyatına tam hazır şəkildə bağçaya əlvida edənlər
unudulmaz xatirələrini də özləri ilə aparırlar. Bu
xatirələr onların yaddaşına əbədilik həkk olur. Belə
bağçalardan biri - Bakının Xətai rayonundakı 235 nömrəli
xüsusi təyinatlı körpələr evi-uşaq bağçası fəaliyyətə
başlamasının 30 illiyini bu günlərdə qeyd etmişdir. Bu
münasibətlə təşkil olunan tədbirdə digər qonaqlarla
yanaşı, bağçanın ilk məzunları da iştirak edirdilər.
Bağçanın müdiri Səlahət Musayeva toplantını giriş sözü
ilə açaraq yubiley iştirakçılarını salamladı və bu
təqvimin onların hər biri üçün böyük önəm daşıdığını
vurğuladı. Bağçanın 30 illik fəaliyyətinə nəzər salan
S.Musayeva tərbiyə və təlim müəssisəsinin məzunlarından,
onların vətənə, millətə layiqli vətəndaş kimi
yetişmələrindən danışdı və hamını bağçanın yaradıcı
qrupunun yubiley münasibətilə hazırladığı maraqlı
konsert proqramına baxmağa dəvət etdi.
"Bənövşə" uşaq xorunun ifasında Dövlət himni
səsləndirildikdən sonra xor "Arzular gül açır" mahnısını
təqdim etdi. Aparıcılar - Rəvan və Xədicə qonaqları
yubiley münasibəti ilə təbrik edərək konserti açıq elan
etdilər.
Uşaqlar musiqi rəhbəri Nüşabə Nuriyevanın müşayiəti ilə
bağçanın himnini ifa etdilər.
Tərbiyəçi Səmayə Musazadənin yetirmələrinin çıxışı
alqışlarla qarşılandı. Məktəbəhazırlıq qrupunun
ifasından sonra bağçanın fəaliyyətinə həsr olunmuş
videoçarx nümayiş etdirildi. "Bizim Cəbiş müəllim"
filmindən məşhur valsın sədaları altında Tamerlan-Ləman,
Telli-Rəhman, Səid-Fatimə, Amin-Bahar, Rəvan-Leyla,
İslam-Azərin cütlüklərinin rəqsi də böyük maraqla
izlənildi. Akif, Elza və Nigarın söylədikləri şeirlərdən
sonra 12 uşağın - Araz, Şamxal, Zeynəb, Ayla, Süleyman,
Nihad, Telli, İslam, Arzu, Ayan və Ayselin iştirakı ilə
maraqlı səhnəcik göstərildi.
Uşaqlar şarlarla iki sırada düzülərək bağçalarının
nömrəsini və yaşını göstərən "235-30" rəqəmlərini
nümayiş etdirdilər.
Sonra aparıcılar doğma bağçadan söz açdılar. Binanın
2008-ci ildə əsaslı təmir olunduğunu qeyd edən uşaqlar
bu işdə zəhməti olan bütün insanlara təşəkkürlərini
çatdırdılar.
Sonra söz yenidən yaradıcı qrupa verildi. Onların
təkrarsız və fərqli ifaları hər dəfə iştirakçıların
sürəkli alqışları ilə dəyərləndirildi. Yubiley tortunun
kəsilməsi də sürprizsiz ötüşmədi.
Bağçanın müdiri qonaqlara yubiley tədbirində fəal
iştiraka görə təşəkkür etdi. O, habelə uzun illər
səmərəli fəaliyyətlərinə görə bağçanın işçilərini fəxri
fərmanla təltif etdi. Tədbirdə məzunlar və valideynlər
də öz ürək sözlərini çatdırdılar. Yubiley şənliyi
tərbiyəçilərin birgə oxuduğu nəğmə ilə başa çatdı.
Yusif ƏLİYEV |
