|
 Naxçıvan
Dövlət Universitetində Cənubi Koreyanın Kimçonq
Universitetində tələbələrin təhsillərini başa vurmaları
münasibətilə tədbir keçirilmişdir. NDU-nun rektoru,
biologiya elmləri doktoru, professor Saleh Məhərrəmov
çıxış edərək Cənubi Koreya ilə ölkələrarası siyasi,
iqtisadi, mədəni əlaqələrin inkişafında elmin, təhsilin
və dilin müstəsna rolundan danışdı. Rektor universitetin
Cənubi Koreyanın ali təhsil ocaqları ilə əməkdaşlığının
əhəmiyyətindən, Naxçıvan Muxtar Respublikası Ali
Məclisinin sədri Vasif Talıbovun və Cənubi Koreyanın
Azərbaycandakı səfirliyinin bu sahəyə göstərdiyi diqqət
və qayğıdan bəhs etdi. Qeyd olundu ki, Naxçıvan Dövlət
Universiteti Cənubi Koreyanın Kimçonq və Busan Kyumqsunq
universitetləri ilə hərtərəfli əməkdaşlığa malikdir.
Boloniya sisteminin prinsiplərinə uyğun olaraq Cənubi
Koreyanın Kimçonq Universiteti ilə tələbə mübadiləsi
aparılmışdır.
Koreyanın qrant yardımı və texniki əməkdaşlıq
proqramlarını həyata keçirən KOICA dövlət agentliyi ilə
universitetə müasir informasiya texnologiyalarının
alınması, elektron idarəetmə sisteminin yaradılması ilə
bağlı birgə layihə reallaşdırılması haqqında da məlumat
verildi. Qeyd olundu ki, universitetin beynəlxalq
münasibətlər və xarici dillər fakültəsində
"Koreyaşünaslıq" seçmə fənni tədris olunur. Buradakı
Cənubi Koreya Mərkəzi uğurla fəaliyyət göstərir.
Mərkəzdə Koreya dili üzrə hazırlıq kurslarının fəaliyyət
göstərməsi isə Koreya dilinin, ədəbiyyatının, tarixinin,
mədəniyyətinin öyrənilməsi baxımından böyük önəm
daşıyır. Cənubi Koreyada 5 ay müddətində təhsillərini
yekunlaşdıran tələbələr də məhz bu kurslarda fəal
iştirak etmiş və bir neçə tələbənin arasından seçilərək
Kimçonq Universitetinə göndərimişdir. Tələbə mübadiləsi
məqsədilə Naxçıvan Dövlət Universitetindən 3 nəfər
tələbə - tərcümə, hüquqşünaslıq və stomatologiya
ixtisasları üzrə birinci kurs tələbələri Nəsir Neymətli,
Əkbər Həsənli və Şahin Tağıyev Cənubi Koreyanın Kimçonq
Universitetində 5 ay müddətində təhsillərini başa vurub
geri dönmüşlər.
Tədbirdə Əkbər Həsənli və Şahin Tağıyev çıxışlarında
Cənubi Koreyada yaxşı qarşılandıqları, ölkəmiz və
Naxçıvan Dövlət Universiteti haqqında onlarda müsbət
fikirlərin formalaşdığını, ölkəmizi Cənubi Koreyada
layiqli təmsil etdiklərini bildirdilər.
Sonda universitetin rektoru Saleh Məhərrəmov Kimçonq
Universitetində təhsillərini müvəffəqiyyətlə başa vurmuş
tələbələrə qiymət cədvəlini təqdim etdi.
Mina QASIMOVA |
