|
İyulun 23-də Azərbaycan və Fransa arasında imzalanmış
dövlətlərarası Sazişə əsasən təsis edilmiş Bakı fransız
liseyinin idarəetmə komitəsinin növbəti iclası
keçirilmişdir.
AzərTAc xəbər verir ki, iclası liseyin idarəetmə
komitəsinin sədri, Azərbaycan Respublikası Dövlət Neft
Şirkətinin (ARDNŞ) kadr, rejim və informasiya
texnologiyaları üzrə vitse-prezidenti Xalik Məmmədov
açaraq ilk toplantıdan keçən müddətdə görülmüş işlər
barədə məlumat vermişdir. O, Fransanın Azərbaycandakı
səfirliyinin əməkdaşlarının iclasda iştirakından
məmnunluğunu ifadə etmiş, məktəbin formalaşmasında
səfirliyin dəstəyi yüksək qiymətləndirilmişdir.
ARDNŞ-in sosial məsələlər üzrə vitse-prezidenti Bədəl
Bədəlov məktəbin tikinti layihəsi haqqında məlumat
vermişdir. Məktəbin təşkili, büdcəsi və ştatı, direktor
və müəllimlərin işə qəbulu məsələləri müzakirə
olunmuşdur.
Bildirilmişdir ki, əvvəllər Stokholmda Fransız
İnstitutunun direktoru, Praqada Fransa səfirliyinin
mədəniyyət müşavirinin müavini, Parisdə "Jan de Beranje"
və "Lavuazye" kolleclərinin direktoru, Burkina Fasoda
Təhsil və Elm Nazirliyinin müşaviri, orta təhsil
layihəsinin meneceri vəzifələrində çalışmış, uzun müddət
Mərakeşdə, Qabonda, Kot dTİvuarda müxtəlif məktəblərin
məsləhətçi direktoru, layihə meneceri vəzifələrində
işləmiş xanım Klod Ronsen Bakı fransız liseyinin
direktoru vakansiyası üzrə təqdim olunmuşdur. Eyni
zamanda, müxtəlif illərdə Mərkəzi Afrika Respublikası,
Madaqaskar, Seneqal, Cibuti, Mavritaniya, Brundi, Konqo
Demokratik Respublikasında fəaliyyət göstərmiş Alen Mant
və Paris IV Sorbonn Universitetini kommunikasiya üzrə
magistr dərəcəsi ilə bitirmiş, 1998-ci ildən pedaqoji
işdə çalışan xanım Ənn-Qall Dömyenin liseydə müəllim
vəzifələrində işləməsi barədə MLF-Xaricdəki Fransız
Məktəblərinin İdarəetmə Departamenti tərəfindən
təqdimatların daxil olduğu bildirilmişdir.
Vakansiyaların baxılması idarəetmə komitəsinin növbəti
iclaslarına saxlanılmışdır. Daha sonra fransız
məktəbində təhsil haqqı məsələləri, liseyə qəbul üçün
qeydiyyat prosesi barədə məlumat verilmiş, uşaqların
qeydiyyata alınması məsələləri ətrafında fikir
mübadiləsi aparılmışdır.
Bildirilmişdir ki, Bakı Fransız Liseyi 2014/2015-ci
tədris ilində fəaliyyətə başlayacaqdır. 2013-cü ilin
sentyabrında isə liseydə 3 bağça qrupu və I-V siniflər
fəaliyyətə başlayacaqdır. |
