|
 Azərbaycan
Diplomatik Akademiyasının (ADA) Xəzər Enerji və Ətraf
Mühit Mərkəzinin Azərbaycan Respublikasının Dövlət Neft
Şirkəti (ARDNŞ) ilə birgə təşkil etdiyi sayca 7-ci Bakı
yay enerji məktəbi başa çatmışdır.
ADA-dan AzərTAc-a bildirmişlər ki, Azərbaycanın xarici
işlər naziri Elmar Məmmədyarov məktəb iştirakçıları
qarşısında "Xəzər hövzəsi və onun ətrafında enerji
siyasətinin tarazlaşdırılması" mövzusunda məruzə ilə
çıxış etmişdir.
Xarici siyasət idarəsinin başçısı Azərbaycan üçün siyasi
prioritetlərdən biri olan enerji diplomatiyasının
tarixinə nəzər salmış, əsası ümummilli lider Heydər
Əliyev tərəfindən qoyulmuş və Prezident İlham Əliyev
tərəfindən davam etdirilən uğurlu neft strategiyasının
müstəqil ölkəmizin inkişafı üçün həlledici rolundan bəhs
etmişdir.
Məktəb iştirakçılarına, həmçinin Cənubi Qafqaz
bölgəsində cərəyan edən son geosiyasi proseslər və
Ermənistan-Azərbaycan, Dağlıq Qarabağ münaqişəsi üzrə
aparılan danışıqlar barədə ətraflı məlumat verilmişdir.
Yay enerji məktəbinin son günündə iştirakçılar
qarşısında, həmçinin Rusiya Federasiyasının
Azərbaycandakı səfiri Vladimir Doroxin, Qazaxıstanın
ölkəmizdəki səfiri Amangeldi Cumabayev, eləcə də Türkiyə
və Gürcüstan səfirliklərinin nümayəndələri çıxış edərək
təmsil etdikləri dövlətlərin Xəzər dənizinin hüquqi
statusuna dair rəsmi mövqeləri barədə fikirlərini
bölüşmüşlər.
Yeddinci Bakı yay enerji məktəbinin 38 məzununa iki
həftəlik akademik proqramı uğurla bitirdiklərinə görə
xarici işlər naziri Elmar Məmmədyarov və ADA-nın rektoru
Hafiz Paşayev tərəfindən sertifikatlar təqdim
edilmişdir.
Yeddinci Bakı yay enerji məktəbi iyulun 6-dan 20-dək
davam etmiş və 15 müxtəlif ölkədən enerji sahəsi üzrə
təhsil alan və çalışan mütəxəssisləri bir araya
gətirmişdir. İştirakçılar bu günlər ərzində Azərbaycanın
enerji sektorunu təmsil edən ARDNŞ, Ekologiya və Təbii
Sərvətlər, Sənaye və Energetika nazirlikləri, Azərbaycan
Respublikasının Dövlət Neft Fondu, həmçinin ölkəmizdə
fəaliyyət göstərən xarici neft və qaz şirkətlərinin
nümayəndələri, dünyanın aparıcı ali məktəblərinin
beynəlxalq enerji məsələləri üzrə professorlarının
təqdimatlarını və mühazirələrini dinləmişlər. Onlar bu
müddətdə enerji siyasətinin iqtisadi, siyasi əsasları,
ətraf mühitə təsiri, regional inkişafa töhfəsi və digər
məsələlər barədə biliklərini artırmışlar. Bundan əlavə,
məktəbin iştirakçıları Azərbaycanda neft-qaz sahəsinin
inkişafında tarixi əhəmiyyəti olan yerlərə də baş
çəkmişlər.
ADA-nın Xəzər Enerji və Ətraf Mühit Mərkəzinin direktoru
Elnur Soltanov bildirmişdir ki, hər il Avropa, Asiya,
Afrika və digər bölgələrdən onlarla iştirakçının
Azərbaycanda yay enerji məktəbinə qatılması ölkəmizin
qlobal enerji təchizatı və təhlükəsizliyi, təbii
resurslardan əldə edilən gəlirlərin istifadəsi ilə bağlı
siyasətin işlənilməsi kimi məsələlərin araşdırılması və
öyrənilməsində nüfuz mərkəzi kimi formalaşdığını
göstərir. |
