|
Rusiya Federasiyası Təhsil və Elm Nazirliyinin saytında
məktəbəqədər təhsilin federal dövlət təhsil
standartlarının layihəsi dərc olunmuşdur. Onun iyunun
əvvəllərində Moskvada təqdimatı keçirilmişdir.
İşçi qrupunun başçısı, Təhsilin İnkişafı Federal
İnstitutunun direktoru Aleksandr Asmolov xatırlatmışdır
ki, belə sənəd ölkədə ilk dəfə yaradılmışdır: "Biz onu
uşaqlığın rəngarəngliyinə dəstək standartları
adlandırırıq. Biz sosial-mədəni planda çoxlu riskləri
araşdırmış, ictimaiyyətin bu standartlardan nələr
gözlədiyini təhlil etmiş və bütün bunları nəzərə almağa
çalışmışıq".
Standartların ən unikal aspektlərindən biri ondan
ibarətdir ki, burada təhsil proqramı biliklərin alınması
kimi deyil, psixoloji-pedaqoji dəstək, uşağın pozitiv
sosiallaşması proqramı kimi müəyyənləşdirilmişdir. Təbii
ki, uşaq bağçalarında tərbiyə alanlar üçün heç bir
imtahan nəzərdə tutulmamışdır. Burada yalnız uşağın
inkişafının monitorinqinə icazə verilir. Lakin bu da
özlüyündə qiymətləndirmə üçün deyil, uşaqda yeni
qabiliyyətlərin üzə çıxarılmasında, hər hansı problemi
dəf etməkdə pedaqoqa kömək edən üsulların aşkarlanması
üçündür. Bu cür tədqiqatlar yalnız uşağın
valideynlərinin və ya qanuni nümayəndəsinin razılığı ilə
aparıla bilər. Standartlarda habelə məktəbəqədər yaş
dövründə uşaqla aparılan işlərin necə olması, ona hansı
tələblərin verilməsi, hansı şəraitin bu işin səmərə və
keyfiyyətini yüksəltməsi və s. öz əksini tapıb. Sənəddə
habelə uşaqlarla işləyənlərə verilən tələblər
müəyyənləşdirilib.
"Uçitelskaya qazeta"dan
Hazırladı: Yusif ƏLİYEV |
